Walawi 11 - Luganuzi Luswanu Kuli Wanhu Wose 2002

Vilimu vyono vinojeye kuligwa

¹ Muwaha Mulungu yakawapela Musa na Haluni malajilizo

² gono getyatizye, ku so wanhu wa Isilayeli, yakatya, Mosuma kulya nyama ye zinimu zose mono'nze.

³ Nimu zono zina mabangho gatemanuce, na zono zina magulu gapanduce, kanyhi zono zikusindula, zizo zo mudahile kulya.

⁴ Ninga mulecele lukulu kulya ngamiya,

⁵ hamba mhimbi,

⁶ ne sungula wugombe. Azi zose nha nyavu hali 'nye. Hamba ziwe zisindulaga, ninga mabangho gazo si gatemanuce yaye.

⁷ Kanyhi mulece kulya ngubi, hambi nha si zelile kuli 'nye, hamba ziwe zina mabangho gatemanuce, ninga sizisindulaga yaye.

⁸ Holeka mulecele lukulu kulya zinimu zizino, hamba kuyipamiza midunhu yazo, hambi nha nyavufywe.

⁹ Ninga mosuma kulya zisomba ze mawala gose, zono zina malebeto ne makaka.

¹⁰ Langa, cilimu co cose cono cikalaga mu malenga, cono cisina malebeto ne makaka, aco mulece kulya avi iwifyo kuli'nye.

¹¹ Vilimu vye liwala lilyo, si vitelevu yaye. Holeka mulecele lukulu kuvilavya, hamba kuyipamiza midunhu yavyo.

¹² Holeka mulecele lukulu kulya cinhu co cose cono cikalaga mu malenga, cono cisina malebeto ne makaka.

¹³ Kanyhi mulecele lukulu kulya zindeje ze liwala alino, hambi nha iwifyo kuli'nye, 'ndi, numba, mwanziwa,

¹⁴ nyaciko, nyacikwanghwala ku luto lwayo.

¹⁵ Ne mahowe gose ku luto lwayo.

¹⁶ Ne nyacihema ne maluwatu, no mulundi, ne mwewe

¹⁷ No mugulo, ne limulowa, ne nhuwi,

¹⁸ ne limuzinji, no mujimbo, ne mwambogo.

¹⁹ Ne mhuje, ne nyhinyinha, ne li mung'wa ne libudibudi.

²⁰ Navyo vitambala hasi vyose vyono vina mabawa, vyono vijendaga ne migulu mine, vivyo navyo iwifyo kuli'nye.

²¹ Ninga, avi vitambala hasi vinji, vyono navyo vina mabawa, kanyhi vikujenda ne migulu mine, kanyhi vina ne milundi, ne vima mu mazayo gayo vyo kuzumhila zumhila, avyo mosuma kulya.

²² Kanyhi mudahile kulya zinzije, nhendelefute, nyenye, na mhanzi.

²³ Ninga vitambala hasi vyose, vyono vina mabawa avyo langa iwifyo kuli'nye.

²⁴ Na muli wose, mono koyipamiza midunhu ye vilimu avino vyono vityatizye, yuyo kowa yeyavufya, sunga kono lyoswela lizuwa.

²⁵ Vilimu vyose vyono visindulaga vyono vina mabangho, na vyono vina magulu gapanduce.

²⁶ Ne vilimu vyose vyono vina migulu mine, hamonga ne makombazala.

²⁷ Munhu wowose mono kodinghula mudunhu wavyo, yimunojeye munhu yuyo yayikanze myenda yakwe.

²⁸ Ninga hamba nhavivyo, kojendelela kuwa yeyavufye sunga kono lyoswela lizuwa.

²⁹ Navyo vitambala hasi vyono vitambalaga kononze, vyono vyowa iwifyo kuli'nye nha vyovi. Funde, ne ngule, ne mbulu,

³⁰ ne nhunu, nyhodo, ne libandagazi, ne likaka, no lwivu.

³¹ Na muli wose mono koyipamiza midunhu yavyo, kowa yeyavufya sunga kono lyoswela lizuwa.

³² Na hono midunhu yazo yigwile muli cinhu co cose, i cinhu cico naco, hodu cowa cavufywa. Ne nghani yiyino, yowa yili muli vinhu vye mawala gose, iviya vye mabici, myenda, nyhingo, hamba mhinda hamba cinhu cocose du cono citumamilwaga, hamba ciwe vyono cinha, cinhu cico cinojele cizabikwe mu malenga, hamba nhavivyo cowa cavu sunga kono lyoswela lizuwa.

³³ Na hono midunhu yavyo yigwile mu nyungu, hodu vyono vili mumo vyowa vyawa iwifyo, holeka yowa yikunojeye wuyitule nyungu yiyo.

³⁴ Ne ndigwa yoyose yono yali yinojeye yiligwe, ninga ho yiwe yimwajiciywe malenga gono gakulawa mu njilo yono yina liwifyo, ne ndigwa yiyo yaweza iwifyo, ne malenga gono gali mu njilo yiyo gose gaweza iwifyo.

³⁵ Ne ciya cocose cono cogwilwa ne midunhu yiyo, ciya cico cowa iwifyo, lunji nyungu hamba mafigwa, yinojeye vinhu vivyo vitulangwe.

³⁶ Ninga muvwilo we malenga, hamba lisima, mono malenga galawile, avyo vyowa vitelevu du, hamba yiwe ivinji vyose, vyono vipamize midunhu yazo, vyawa iwifyo.

³⁷ Na hono cimonga ca muli vitambala hasi vivyo, cigwile mu mbeyu yono yali yakondya kuwikanizwa yikahadikwe, i mbeyu yiyo, yowa nhelevu du.

³⁸ Langa hono yiwe mbeyu yakondya kulowekwa mu malenga, na cinji co cose co mudunhu cigwile mu mbeyu yiyo, hodu mbeyu yiyo yowa yeza iwifyo.

³⁹ Na hono mutugo wo wose wono wunojeye wuligwe, ninga hono wifwile weneco, munhu wo wose mono kowupamiza mudunhu wayo, u munhu yuyo kowa yeyavufya, sunga kono lyoswela lizuwa.

⁴⁰ Na hono munhu wo wose yejelele yalye mhonje ye nyama yo mutugo wuwo, munhu yuyo yanojeye yakanze myenda yakwe. Ninga hamba nhavivyo, kowa yeyavufya sunga kono lyoswela lizuwa. No munhu wo wose mono kodinghula mudunhu wayo, yimunojeye munhu yuyo yayikanze myenda yakwe. Ninga hamba nhavivyo, kojendelela kuwa yeyavufye sunga kono lyoswela lizuwa.

⁴¹ Kanyhi mulecele lukulu kulya i vilimu vyo vyose i vidodododo vyono vikujenda hasi.

⁴² Hamba viwe vyono vikutambala hasi, hamba viwe vyono vikujenda kwe migulu yavyo mine, hamba vyono vina migulu minji.

⁴³ Holeka mulecele lukulu kwiyavufya so wulya vilimu vye liwala lili.

⁴⁴ Hambi 'ne, nha yo nene mono nili Muwaha Mulungu wenyu. Holeka munojeye mweze mwelile, hambi 'ne nha nelile.

⁴⁵ Hambi 'ne nha yo nene Muwaha Mulungu wenyu, mono namuwusenyi ku yisi ya Misili, ho niwe Mulungu wenyu. Holeka munojeye mweze mwelile, hambi 'ne nha nelile.

⁴⁶ Nalyo lilino lyo lilajilizo lya kuli vilimu vyose hamonga ne zindeje, na kuli vinhu vyose vyono vikujenda mu'si.

⁴⁷ Holeka yinojeye mulanjilile muno muno, ho musume kusiwanula muli vinhu vye liwifyo na vyono vyelile. Na muli vilimu vyono vidahile kuligwa, na vyono si vidahile kuligwa.