Walawi 10 - Luganuzi Luswanu Kuli Wanhu Wose 2002

U wubi wa Nadabu na Abihu

¹ Nawo wana wa Haluni, Nadabu na Abihu, wakasola munhu ne zaye lyakwe, wakapala moto munhu na wakwe, wakawa kusola wuvumba wakawutajila mu myoto yawo, wakawa kumulavizya Muwaha Mulungu. Ninga wuwo moto wono wene wawupala, si wali moto wono welile, hambi Muwaha Mulungu nha si yali yawalajilize wetume zizo.

² Holeka Muwaha Mulungu yakawa kuwagumilila moto nhinicizo, wukawa kuwawulajila baho ha mwande yo Muwaha Mulungu.

³ Hodu, Musa yakamulonjela Haluni yakatya, “Gwe Haluni, ayi yo nghani yono Muwaha Mulungu yayilongaga, lono yatya nhavi, ‘Munhu wo wose mono yakunyitumamila, yimunojeye yawupele cogopo u wele wangu, nane holeka noyilajila nhojo yangu kuli wanhu.’ ” Ninga mwene Haluni hamba si yapitula cinji yaye.

⁴ Hodu Musa yakawa kuwacema Mishayeli na Elizafani i wana wa Uziyeli, u mwihwawe wa Haluni, yakawalonjela yakatya, “Nzonyi muyidinghule miwili ye wandugu zenyu, muyiwuse mwi Hema lisiwanulwe, mubite mukayiwice kunze ye nghambi.”

⁵ Nawo wakaza wakawa kuyidinghula miwili, wakawa kuyitegula kunze ye nghambi, nha vyono Musa yalajiliza.

⁶ Hanyuma Musa yakamulonjela Haluni hamonga ne wanagwe, Eleyezali na Itamali, yakawatya, “Mulece kuzileka zimvwili zenyu zikale si swamule, hamba mulece kuyidemulanga myenda yenyu muwe kulajila vyono mwina cililo. Vyono hono munoze nhavivyo du, mofwa, kanyhi moleka no Muwaha Mulungu yawakolelwe likuwo mhuga yose. Langa wayenyu Waisilayeli wose wakomboywe, wasumile kulila ku soko ye lifwa lili, lyono liletigwe no moto, wono Muwaha Mulungu yawugumiye.

⁷ Kanyhi mulecele lukulu kuwuka ha mulango we lihema, hono muwuce, hodu mofwa, hambi anye nha mwasiwanulwa so mafuta go witile go Muwaha Mulungu.” Nawo waketuma, nha vyono Musa yalonga.

Malajilizo kuli Wakohani

⁸ Muwaha Mulungu yakamulonjela Haluni yakatya,

⁹ “Mulecele lukulu kwinjila mwi 'Hema lyono lyelile lono mwakondya kung'wa divayi mwakolwa, gwegwe hamba wanago. Vyono hono mwinjile, mofwa. Ne lilajilizo lili linojeye likamiswe muno mu zindelo zenyu zose.

¹⁰ Kanyhi munojeye mwiyijize kuzisiwanula, muli zono zimunojeye Mulungu, na muli zono zinojeye mu witumamilwe we nhondo zose, kanyhi kuzisiwanula muli zono zelile, na muli zono si zelile.

¹¹ Kanyhi munojeye muwejize wanhu wa Isilayeli, imalajilizo gose gono namupelenyi mu nzila ya Musa.”

¹² Musa yakamulonjela Haluni hamonga ne wanagwe, Eleyezali na Itamali, yakatya, “Ale, musole cilavywa co wusaje, cono cisigaye ku wulawa mu ndigwa yono yalavywa kuli Muwaha Mulungu. Munoze mukate wono wusina cisase, muwulile baho ha cikumbicilo. Hambi i cilavywa cici, nha celile muno.

¹³ Muwulile baho i hanhu hono helile, hambi nha lyo ligawo lyako hamonga ne wanago, ligawo lyono lilawiliye mu ndigwa ndavywe kuli Muwaha Mulungu. Na vyo Muwaha Mulungu yandajilize 'ne.

¹⁴ Ninga anye ne zimhuga zenyu, molya nyama ye ng'hwa, hamonga ne cima, vyono vinuywe hali Muwaha Mulungu, hambi nha lyo ligawo kuli wakohani. Nanye mosuma kuvilila hanhu ho hose hono helile. Hambi vilavywa vivi, nha kupegwa gwegwe, hamonga ne wanago we cilume na we cicekulu, ligawo lyako lyono likulawilila mu vilavywa vyo mulamu, kuli wanhu wa Isilayeli.

¹⁵ Yiwanojeye walete cico cima cinulwe hamonga ne nyama ye ng'hwa, sinjiswe mu cipango cono mhama yikulavywa nha cilavywa ce ndigwa sinjiswe hali Muwaha Mulungu. Na gago gowa go magawo gako, gwegwe hamonga ne wanago cibitilila, nha vyono Muwaha Mulungu yalajilize.”

¹⁶ Musa yakawuza ze mhene yono yali so cilavywa co wubi, nayo yakamanya vyono mhene yiyo yakondya kukongogwa. Na ku soko yiyo, Musa yakawakolelwa likuwo muno muno Eleyezali na Itamali. Musa yakawawuza yakatya,

¹⁷ “Alo nhawule si mucililiye cilavywa co wubi mu hanhu hono helile? Hambi nha celile muno. Nayo Muwaha Mulungu kamupelenyi, ho mwitumamile so mulimo wo kudinghula wubi we zimhuga no kuwanozeza wilamule hali Muwaha Mulungu?

¹⁸ Vyono sakami yayo si yaletwa mugati ye Lihema lyono lyelile, holeka yali yinojeye mucilile mumo mu hanhu hono helile, cico cilavywa, nha vyono nalajiliza.”

¹⁹ Nayo Haluni yakapitula yakatya, “Wule! Hono nali nilye cilavywa co wubi izuwali, Muwaha Mulungu yali yendezwe? Hambi wanhu nha waleta cilavywa co wubi kuli Muwaha Mulungu izuwali, kanyhi waleta ne cilavywa cawo cinyanywe, holeka zizi ziwa kunyagana.”

²⁰ Nayo Musa yali yaza kuzihulika zizo, hodu yakendezwa nazo.