Walamuzi 8 - Luganuzi Luswanu Kuli Wanhu Wose 2002

Nghanghulo ye ndumilizo yo wusumwe we Wamidiyani

¹ Lulo wanhu wa Efulayimu, wakamuziza Gideyoni wakamutya, “Nhawule siwacicema ase lono mwali kubita kuwahoma Wamidiyani? Nhawule wacitendela nhavivi?” Wakamuhosa muno muno so nghani yiyo.

² Nayo mwene yakawatya, “Ninga cono nitumile 'ne, sicosuma kwihwananizwa na cono mwitumile 'nye. Kanyhi hamba yiwe nha nghani ndodo yono anye mo wanhu wa Efulayimu mwetuma, ninga yina cambuzi ciwaha si nha zose zono we mhuga yangu wetuma.

³ Hamonga na zizo kwe vilungo vyo Mulungu, mwawawulaga watemi wejete we Wamidiyani Olebu na Zeyebu, alu ane ma, netuma hayi zono zinha zizo?” Yaza kulonga nhavivyo nhondo likuwo likawa kupola.

⁴ Lulo Gideyoni hamonga ne wanhu wakwe magana madatu, wali wakondya kufika he 'kolongo lya Yoludani wakondya kulilowoka. Wali wakatala muno, ninga hamba nhavivyo wali wakali wajendeleye du kuwawinjiliza walugu.

⁵ Na lono waza kuwa wafika ha Sukoti, yakawalonjela wanhu wa he 'tumbi yakawatya, “Nghumunenenyi muno muwapele wanhu wangu mikate walye, hambi nha wakatala muno. Nane nghali kumulondelela Zeba na Zalumuna i watemi wa Midiyani.”

⁶ Ninga walongola wa ha Sukoti wakamutya Gideyoni, socici ciwapele wasilikale wako zindigwa? Akuno ho mukali hamba si nawebata Zeba na Zalumuna?

⁷ Gideyoni yakawatya, “Ale hodu, ninga kolo Muwaha Mulungu yawenjiza mu miwoko yangu Zeba na Zalumuna. Nane nomukunanjenyi ne mikotya ye mitupa ne minghunungu ya mu nyika, yono yina mamiya!”

⁸ Baho Gideyoni yakawa kubita sunga Penuweli, kuko nako yakalomba kanyhi zindigwa so wanhu wakwe. Ninga nawo i wanhu wa ku Penuweli, wakamupitula nha vyono wanhu wa ku Sukoti wamupitula.

⁹ Baho nayo yakawatya, “Ale ane nahelela, ninga hono nize mbuye kanyhi baha nili muswanu, nolowukumula munala wuwu.”

¹⁰ Zeba na Zalumuna, wali wali ku Kalikoli hamonga ne lipuga lyawo lye wasilikale. Na mwi'walo lye wasilikale wose we zimbeyu zono zekalaga mu nyika, wali wasigala wasilikale waficile elufu yikumi na yihano du. Ninga wasilikale elufu yigana limonga na makumi mejete, awo wose wawulagwa.

¹¹ Gideyoni yakatuluka, yakakolela mu nzila ya mu mwalambalo we nyika, ku lubavu lwa kucilima ya Noba na Yogebeha, yakalihoma lipuga lye wasilikale nhinicizo.

¹² Ne watemi wejete we Wamidiyani, Zeba na Zalumuna wakatiza lumangho. Ninga yakawalonda sunga yakawebata. Ne lipuga lyawo lyose lye Wasilikale, likenjilwa ho woga nhinicizo.

¹³ Nayo Gideyoni lono yawuyaga yakulawilila ku wulugu, yakoleye mu nzila ya Helesi.

¹⁴ Yakamwibata muzelelo yunji, munya Sukoti, yakamuwuza za kuko. Nayo muzelelo yuyo yakamwandicila Gideyoni, matagwa makumi mupunghati na mupunghati ge walongola wose wa mu Sukoti.

¹⁵ Hobaho Gideyoni yakabita kuli wanhu wa ha Sukoti yakawatya, “Mukumbucile 'lu vyono 'nye mwalema kunhaza! Mukatya vyono simosumila lukulu kuwapela zindigwa wasilikale wangu, wono wali wakataye muno, vyono ane ti nali nghali nawateka watemi Zeba na Zalumuna. Ale viswanu, ninga, wo awano 'lu.

¹⁶ Hobaho yakasola mikotya ye mitupa ne minghunungu ya mu nyika yono yina mamiya yakayitumamila ko kuwalipiciza i walongola wose wa ha Sukoti.

¹⁷ Kanyhi yakawukumula no munola wa ha Penuweli yakawawulaga wanhu wose wa mwi'kaya lilyo.”

¹⁸ Hobaho Gideyoni yakawawuza Zeba na Zalumuna yakawatya, “Alu wanhuci wono mwawawulaga ku Taboli?” Nawo wakamupitula wakamutya, “I wanhu wawo wali wehwanile gwegwe du. Nawo wose wali kotya nha wana wo mutemi.”

¹⁹ Nayo Gideyoni yakawatya, “Woyi hee! Wali wawaha zangu, wose calelwa 'nda monga kwa yaya. Alu nghumwilahilenyi vyono hono mwali mulece kuwawulaga, nane si nali nimuwulajenyi ng'o.”

²⁰ Hobaho yakawa kumulonjela Yeteli u mwanagwe u mulongozi kulelwa yakamutya, “Ale winuce wuwawulaje!” Ninga muzelelo hamba siyawusomola mumaje wakwe yaye, yakogopa, hambi mwene, nha yali yakali muzelelo mudodo.

²¹ Hobaho nawo Zeba na Zalumuna wakamutya Gideyoni, “Ale winuce mbela, wuciwulagaje gwegwe go mweneco, hambi 'gwe nha yo wuli mulume we vilungo vinji.” Hobaho Gideyoni yakawa kuwawulaga, yakasola no wihambo wose wono wali wali mu zisingo ze zingamiya zawo.

²² Wulawilila baho, Waisilayeli wakamutya Gideyoni, “Alu wuteme gwegwe muli 'se, hamonga ne wanago wono wokutyatya. Hambi nha kuciponya mu miwoko ye Wamidiyani.”

²³ Nayo Gideyoni yakawapitula yakatya, “Sinosuma 'ne kuwa mutemi wenyu, hamba mwanangu yaye. Langa Muwaha Mulungu yo kowa mutemi wenyu.”

²⁴ Yakajendelela kanyhi kulonga yakatya, “Ninga nali sace nghami monga du kuli 'nye wose, mumhele ziheleni zose zono mwaziteka kuli Wamidiyani.” Vyono Wamidiyani wali wehwanile ne wanhu wa mu nyika, wavwalaga mu makutu heleni za Zahabu.

²⁵ I wanhu wakamupitula wakatya, “Ase cina welecele du kukupela.” Lo lulo lulo wakatandika mutote hasi, wanhu wakanza kutajila wihambo wawo wa mu makutu wono wali wawusola kuli Wamidiyani.

²⁶ Wihambo wawo we ziheleni wono yalomba wamupele, wali na wuzito wa kilo makumi mejete ga zahabu. No wihambo wuwo si wawalilizwa hamonga no wihambo we mikufu wo kuvwala mu singo, ne myenda ye mawala maswanu yono watemi wa Midiyani wavwalaga, sunga ne mikufu yono wavwalizaga zi Ngamiya zawo mu zisingo.

²⁷ Gideyoni yakanoza cihwani ca zahabu. Yakaciwika mu kaya yakwe ku Ofila. Ne Waisilayeli wose wakamuleka Muwaha Mulungu, wakawa wakubita kucihemba cihwani cico. Ne nghani yiyo yikawa mutego kuli Gideyoni hamonga ne mhuga yakwe.

²⁸ Na ku wulawilila baho, nhondo Wamidiyani wakawa wasumilwa lukulu ne Waisilayeli. Hamba si wawogofya kanyhi Waisilayeli. Ne yisi yikekala yipolile no mulamu myaka makumi mane, sunga Gideyoni yakafwa.

U wufwe wa Gideyoni

²⁹ Nhondo Gideyoni mono yacemwaga Yelubaali u mwana wa Yowashi yakawa kuwuya kwikala kwawo.

³⁰ Gideyoni yali yena wana we cilume makumi mupunghati, hambi nha yali yatolile wagolece wenji.

³¹ Kanyhi yali yena mujitulwa yunji ku Shekemu. Yakamulelela mwana monga wa cilume, yakamucemela litagwa lya Abimeleki.

³² Gideyoni u mwana wa Yowashi yakafwa yali mu wukombi wutelevu, yakazikwa mu citenjelo cono yazikwa u sogwe Yowashi ku Ofila, mwi'tumbi lyono wekalaga we mhuga ya Abiyezeli.

³³ Yaza kuwa Gideyoni yafwiza, Waisilayeli, wakamuleka kanyhi u Muwaha Mulungu, wakajendelela kuhemba milungu ya Baali. Wakanoza cilagane na Baali-beliti yawe mulungu wawo.

³⁴ Lulo hamba si wamukumbucila kanyhi kumuhemba Muwaha Mulungu wawo mono yawataza muli walugu wenji, wono wali wawapilime.

³⁵ Hamba siwawalumba we mhuga ya Gideyoni, mono yacemwaga Yelubaali, so wuswanu wose wono yawanozeza Waisilayeli.