Walamuzi 7 - Luganuzi Luswanu Kuli Wanhu Wose 2002

Gideyoni yakuwasuma Wamidiyani

¹ Zuwa linji Gideyoni mono yacemwaga Yelubaali, yakenuka hakali mitondo muno muno, hamonga ne wanhu wakwe, wakasimya nghambi behi ne cikolongo ca Halodi. Nawo Wamidiyani, wali wasimizye nghambi yawo mwi'lolo, lubavu lwa kusumuka ye litunda lya Mole.

² Muwaha Mulungu, yakamulonjela Gideyoni, yakatya, “I wanhu wono wina nawo, wenji muno, ho sume kuwapela wusume kuli Wamidiyani. Hambi nha wokwihwesa vyono, wawasuma Wamidiyani kwe vilungo vyawo weneco. Na ku soko yiyo, siwolajila cogopo kuli'ne kanyhi.

³ 'Holeka, wuwalonjelaje wanhu, vyono wo wose mono yakogopa, yawuye ku kaya, nase cosigala baha he 'tunda lya Gileyadi.” Baho wanhu elufu makumi mejete na nyejete wakawuya ku zikaya zawo, wakawa kusigala wanhu elufu yikumi du.

⁴ Ninga Muwaha Mulungu, yakawa kumulonjela kanyhi Gideyoni, yakamutya, “Sunga na lulu wukali wina wanhu wenji. Holeka luno, wuwaletaje kwi'kolongo lye malenga, nane nowajela ho nghuhagulile wono wakwiliye. Nane hono nghulonjele vyono, munhu ayu, yo mobitana, ale yuyo yo mobitana. Na hono nghulojele nitye vyono, munhu ayuno mulece kubitana nayo, ale wulece kubita nayo.”

⁵ Ale, Gideyoni yakawategula wanhu sunga kwi 'kolongo lye malenga. Nayo Muwaha Mulungu yakamutya, Alu, wumusiwanule munhu wo wose mono kong'wa malenga, mu nzila yo kukabanga no lulimi nha vyono likabangaga li'bwa, musiwanulaje na awalya wono wakung'wa malenga wafugame.

⁶ Wakejela wanhu magana madatu du wono wang'wezaga malenga wakugumila ne mawoko gawo mu milomo. Ninga wanji wose wakafugama hasi wakanza kung'wa malenga wafugame.

⁷ Muwaha Mulungu yakamulonjela kanyhi Gideyoni yakamutya, “Nomuponyenyi, kanyhi nowatajila Wamidiyani mu miwoko yenyu mu nzila ye wanhu wawa magana madatu wono wakabanjile malenga. Holeka wawalonjele wanji wose wawuye ku zikaya zawo.”

⁸ Lulo Gideyoni yakawagomola Waisilayeli wose ku zikaya, zawo yakasigaza wawalya du we magana madatu, wawo wo wakasola vitwalo vyose, hamonga ne zindulele. Ne nghambi ye Wamidiyani yali yili kusika yawo mwi'lolo.

⁹ Na mu cilo cico Muwaha Mulungu yakamulajiliza Gideyoni yakamutya, “Winukaje, wuyihome nghambi yawo, hambi nha noyitajila mu miwoko yenyu.

¹⁰ Ninga nagwe hone wuwe wukogopa kuwahoma, ale wutenenhuce cinyele, gwegwe no mwitumami wako Pula, sunga ha nghambi yawo.

¹¹ Ho kozihulika zono wakulonga, nagwe kotuga vilungo vyo kuwahoma.” Hobaho Gideyoni hamonga no mwitumami wakwe Pula, wakatenenhuka sunga ha mwejelele we nghambi ye walugu wawo.

¹² Nawo Wamidiyani, ne Waamaleki hamonga ne wanhu wono wekalaga mu nyika, wali weyagaye mwi'lolo kotya yiwumbi lya nzije. Kanyhi wali wena Ngamiya nyinji muno muno kotya musawawa wa mu mwejelele we lilenga.

¹³ Nayo Gideyoni yali yaza kufika du, yakahulika munhu yunji yakumuloloseza muyagwe ze ndoto yakwe yakutya, “Ndota vyono mukate, wuzubujila mu nghambi ye Wamidiyani wuwa kulikundujiza lihema lyetu liwa kugwa hasi.”

¹⁴ Muyagwe nayo yakamupitula yakatya, awo wo mumaje wa Gideyoni Muisilayeli, u mwana wa Yowashi. Hasina nhunizo yinji yo yose, langa hono si yiyo du. Muwaha Mulungu yakondya kuwenjiza Wamidiyani hamonga ne wasilikale wawo mu miwoko yakwe.

¹⁵ Nayo Gideyoni yali yeza kuzihulika ze ndoto yo munhu yuyo, hamonga ne nhunizo yayo. Hobaho yakafugama kwe cogopo, yakamuhemba Muwaha Mulungu. Yakawa kuwuya ne nyuma ku nghambi ye Waisilayeli, yakawatya, “Mwinukaje! Hambi Muwaha Mulungu, nha yakumupelenyi 'lu wusume kuli wasilikale we Cimidiyani!”

¹⁶ Hobaho yakawagawa wasilikale wakwe magana madatu mu vipuga vidatu, yakawapela munhu yumonga yumonga, ndulele hamonga ne njilo yono yisina malenga na mugati yayo, zikawa zina mazeza.

¹⁷ Yakawatya, “Ane kolo neza kufika ha mwejelele we nghambi, anye mweze munanjiliye, ho mwitume zono nokiwituma baho.

¹⁸ Nane, hamonga ne cipuga cangu, kolo ceza kutowa zindulele, hobaho nanye wose, mutowele hamonga zindulele zenyu, muyipilime nghambi, akuno mukuzoza mukutya, ‘So Muwaha Mulungu, na ku so Gideyoni!’ ”

¹⁹ Lulo Gideyoni hamonga ne cipuga cakwe ce wanhu yigana limonga, wakabita ha mwejelele we nghambi mu cilo mugati, lono wali wakali nafika i walindilizi mu wikawanize wo wilecele wawo. Baho wakatowa zindulele no kutula zinjilo zono wali webate.

²⁰ Ne vipuga vyejete vyono vyali visigaye, navyo vikanoza nhavivyo. Wose wakebata mazeza mu miwoko yawo yo kucekulu, ne zindulele, mu miwoko yawo yo kulume, wakawa kuzoza wakutya, “Mumaje so Muwaha Mulungu, na ku so Gideyoni.”

²¹ Wose wakema munhu na hanhu hakwe wayipilime nghambi, walugu wakamangha muno akuno wazozize so woga.

²² Lono wanhu wa Gideyoni watowaga zindulele zawo. Muwaha Mulungu, yakawatajila wivyajizwe walugu, wakawa kwanza kwitemanga weneco wose ne mimaje yawo, wakawa kutiza wakamanyhila ku Zeletani sunga ku Betishita, wakafika sunga kwi'tumbi lya Abeli-mehola behi na Tabati.

²³ Hobaho i wanhu wo mulango wa Nafutali, na wa Asheli na wa Manase wa kucilima na wa kumwezi, wakacemwa wakajendelela kuwawinjiliza Wamidiyani.

²⁴ Gideyoni yakawatuma wanhu wabite wakawalonjele wanhu wose wono wakaye mu yisi yose ye matunda ya Efulayimu wawatye nhavi. “Ale mutenenhuce wose muze ciwahome Wamidiyani. Mwibataje ne likolongo lya Yoludani hamonga ne vikolongo vyose vyono vili ku mwande yawo, sunga ku Bete-bala. Muwatejele Wamidiyani walece kulowoka.” Ne wanhu wa Efulayimu wakecemela hamonga, wakalibata likolongo lya Yoludani hamonga ne vikolongo vyose, sunga ku Bete-bala.

²⁵ Wakawateka watemi wejete we Cimidiyani, Olebu na Zeyebu. Wakamuwulajila Olebu he 'talawe lya Olebu nayo Zeyebu wakamuwulajila he 'tuli lyo kuminyila divayi ya Zeyebu. Wakajendelela kuwawinjiliza Wamidiyani, wakayileta mitwe ya Olebu na Zeyebu kuli Gideyoni, lulo Gideyoni yali yali ku lubavu lwa kucilima ya Yoludani.