Walamuzi 6 - Luganuzi Luswanu Kuli Wanhu Wose 2002

Gideyoni

¹ Kanyhi Waisilayeli waketuma wubi hali Muwaha Mulungu. Baho yakawaleka wakatemwa ne wanhu wa Midiyani myaka mupunghati.

² Na vyono Wamidiyani wakawa ne vilungo kuciza Waisilayeli. Holeka Waisilayeli wakawatiza no kwihundika mu zimhango na mu wihundiko wunji wono wawutuga mu matunda.

³ Na lono Waisilayeli wapanhaga zimbeyu, Wamidiyani ne Waamaleki wazaga hamonga ne wanhu wa mu nyika no kuwahoma.

⁴ Wazaga wawa kusimya ne zi nghambi zawo mu'si, wawa kuzihodanga ne zimbeyu za mu migunda wulawilila ku lubavu lwa kutakama sunga ko ku lubavu lono lwali lupilime Gaza. Wawa kuzisola zingholo, ne zing'ombe ne zindogowe, wawa kuwaleka Waisilayeli wasina cinji cono wolya.

⁵ Wazaga ne matewa gawo ge zimitugo, hamonga ne mahema gawo, matewa mawaha muno nha winji we zinzije. I wene hamonga ne zingamiya zawo, wali wenji muno hamba si wakuwala yaye. Wakaza no kuyongomeza yisi.

⁶ Lulo Waisilayeli wakawula wutazi wo wose wo kuwataziza kuli Wamidiyani.

⁷ Hobaho i Waisilayeli kanyhi wakamulilila Muwaha Mulungu ho yawawuse mu miwoko ye Wamidiyani,

⁸ Muwaha Mulungu yakawatumila muwizi mono yawategulila nghani yono yalawilila kuli Muwaha Mulungu we Waisilayeli yikutya, “Namuwusenyi 'nye mu yisi ya Misili mu nyumba yo wuwanda nghamuletenyi kuno.

⁹ Nghamulavyenyi kuli Wamisili sunga na kuli wanhu wono mwehomaga nawo mu yisi yiyi. Nghawawinjiliza muno, lono anye mwenjilaga mu yisi. Nghamupelenyi anye ne yisi yawo.

¹⁰ Nghamulonjelenyi vyono ane yo nene du u Muwaha Mulungu, u Mulungu wenyu, nghatya, mulecele lukulu kuhemba milungu yinji ye Waamoli wono anye mwikaye mu yisi yawa. Ninga 'nye simwenda kuzihulika zangu.”

¹¹ Hobaho Malayika wo Muwaha Mulungu, yakaza ha citumbi ca Ofila yakekala hasi yo mubici wo munghola, wono wali wa Yowashi, mono yali yo wo mulango wa Abiyezeli. U mwanagwe Gideyoni yali yehundice yatwangaga maso go wuhemba mwi'tuli lyo kuminyila divayi, Wamidiyani ho walece kumuwona.

¹² Lo lulo lulo Malayika wo Muwaha Mulungu yakamulawila baho, yakamutya, “U Muwaha Mulungu yali hamonga nagwe, 'gwe go citung'ati.”

¹³ Gideyoni yakamutya “Gwe go muwaha wangu, hone yiwe mbeka Muwaha Mulungu yali hamonga na sese, alu nhawule zose azi zikucijelela nhavivi? Alu ne mezino gakwe gose gali hayi, gono walezi wetu wacilonjela zono Muwaha Mulungu yetuma, na vyono yawawusa ku yisi ye Misili? Alu lanje! Muwaha Mulungu yacileka, kanyhi yacinjiza mu miwoko ye Wamidiyani.”

¹⁴ Muwaha Mulungu yakamulonjela Gideyoni yakatya, “Ale wubite ne vilungo vivyo, nagwe kowaponya Waisilayeli mu miwoko ye Wamidiyani. Hambi nha ye nene mono nghukutuma.”

¹⁵ Gideyoni yakapitula yakatya, “Alu Muwaha Mulungu, nosuma wule kuwaponya Waisilayeli? Mhuga yangu yo mhuga yono yisoceye mu mulango wa Manase, kanyhi nane yo nene mudodo mu kaya mwa baba.”

¹⁶ Muwaha Mulungu yakamupitula yakamutya, “Kosuma kwituma zizi du, hambi ane nha nowa hamonga nagwe. Nagwe kowahoma wa Midiyani musunho kotya nha wukwihoma na munhu monga du.”

¹⁷ Gideyoni yakamupitula Muwaha Mulungu yakatya, “Hono wuwe wendezwe na nene, ale wundajilaje citanjilo, hono mbeka agwe yo gwegwe Muwaha Mulungu.

¹⁸ Nghukunena wulece kuwuka baha, sunga kolo nghukulavizya cilavywa co wusaje.” Muwaha Mulungu yakamutya, ale, nokulindila du sunga kono kokuziza kanyhi.

¹⁹ Hobaho Gideyoni yakenjila mu nyumba yakwe yakamutelecela nyana ya mhene swanu, yaketumamila kilo yikumi za wusaje. Yakanoza mukate wono wusina cisase. Yakayitajila nyama mu citoto no muhuzi mu cungu, yakavileta ha mwande ya Malayika wo Muwaha Mulungu he sina lyo mubici wo munghola, yakamutenjela.

²⁰ Nayo malayika wo Muwaha Mulungu yakamulonjela yakatya, “Wuyiwikaje nyama hamonga no mukate mwi'bwe alino, umwajile no muhuzi wuwo mucanyha yayo.” Gideyoni yakanoza nhavivyo.

²¹ Hobaho Malayika wo Muwaha Mulungu yakasejelela yakayipamiza i nyama yiyo no mukate, kwe cisonje ce nghome yono yali yebate. Lulo lulo moto mukali wukalipuka mwi'talawe wukayitakamiza nyama hamonga no mukate. Lulo lulo Malayika wo Muwaha Mulungu yakawuka.

²² Baho Gideyoni yakamanya vyono mbeka ayu yali Malayika wo Muwaha Mulungu, yakalonga kwe cogopo yakatya, “Woyi he! Gwe go Muwaha Mulungu we mihanga, nakondya kumuwona Malayika wako wusu kwa wusu!”

²³ Ninga Muwaha Mulungu yakamutya, “Weze no mulamu. Kanyhi wulece kogopa, sikofwa yaye.”

²⁴ Hobaho Gideyoni yakamuzenjela cikumbicilo Muwaha Mulungu baho, yakacicemela yitagwa, “Muwaha Mulungu wo Mulamu.” Ne cikumbicilo cico cili kuko ku Ofila ye Waabiyezeli.

²⁵ Na mu cilo cico u Muwaha Mulungu yakamulonjela Gideyoni, yakamutya, wusole ng'ombe nghambaku yo sogo, hamonga ne nghambaku yinji yono yificile myaka mupunghati, wukacimwagule cikumbicilo ca Baali co sogo, wukadumule ne cihwani co mulungu we cicekulu Ashela, cono cili behi naco.

²⁶ Hanyuma, wumuzenjelaje cikumbicilo Muwaha Mulungu wako hanhu baho. Na hanyuma kanyhi wusole ng'ombe ye kejete wuyilavye cilavywa cinyanywe. Witumamilaje zingwagu ze mabici gono kodumula, ze cihwani co mulungu we cicekulu Ashela.

²⁷ Hobaho Gideyoni yakawasola wetumami wakwe yikumi, yaketuma nha vyono Muwaha Mulungu yamulonjela. Ninga yogopa muno kwituma zizi misi, ha mwande ya wanhu wose wa mwi'tumbi na we mhuga yakwe. Holeka yaketuma mu cilo mugati.

²⁸ Ne wanhu wose wa mwi'kaya wali weza kwinuka i mitondo yaco, hakali mitondo muno, wakawona vyono cikumbicilo ca Baali ne vihwani vyo mulungu we cicekulu Ashela, vyakondya kudumulwa, ne ng'ombe ye kejete yakondya kulavywa mucanyha ye cikumbicilo cono cali cazengwa bahalya.

²⁹ Hobaho wakawa kwanza kwiwuza munhu na muyagwe wakutya, “Alo nani mono yetumile zizi?” Ninga wali weza kwiwuzawuza, wakamanya vyono kumbe Gideyoni u mwana wa Yowashi yo yetumile zizi.

³⁰ Hobaho wakamulonjela Yowashi wakatya, “Mulavyanizaje mwanango kononze cimuwulaje! Hambi nha kakumula i cikumbicilo ca Baali, kanyhi kadumula sunga ne cihwani co mulungu we cicekulu, Ashela, cono cali cili behi yayo.”

³¹ Yowashi yakawalonjela wose wono wamutetelaga Baali, yakawatya, “Alu anye muli ku lubavu lwa Baali? Mukumutetela Baali? Ninga mumanye nha vyono wo wose mono yemile ku lubavu lwa Baali kowulagwa cilo cici lono wusiku wukali sinela. Holeka hono mbeka Baali mulungu, ale mulecenyi yetetele mweneco, hambi i cikumbicilo cono cidumuywe nha cali cakwe mweneco.”

³² Wulawilila baho, Gideyoni yakacemwa “Yelubaali,” vyono Yowashi yawatya mumulekaje Baali yetetele mweneco, cikumbicilo cono cikumuywe nha cakwe mweneco.

³³ Hobaho Wamidiyani, ne Waamaleki, hamonga ne zimbeyu za mu nyika, wakehanguliza wakalowoka likolongo lya Yoludani. Wakasimya nghambi mwi'lolo lya Yezeleli.

³⁴ Muhe wo Muwaha Mulungu wukamuziza Gideyoni, yakaputa ndulele yakawacema wanhu we mhuga ya Abiyezeli wamutyatye.

³⁵ Yakawatuma wanhu wabite mbavu zose ze yisi yose ya Manase, wa ku lubavu lwa kucilima na ku mwezi, wawaceme, waze wamutyatye. Kanyhi yakawatuma wanhu, wakawaceme wo mulango wa Asheli, na wa Zabuloni na wa Nafutali, nawo wakaza wakelunza nayo.

³⁶ Hanyuma Gideyoni yakamulonjela Muwaha Mulungu yakamutya, “Agwe watya vyono konyitumamila nene, niwaponye Waisilayeli.

³⁷ Ale viswanu, ane 'lu notandika nguwo ye ngholo ha cuga co kutowela wuhemba. Nane hakali mitondo, hono mbone wubuhe wuli mu nguwo du yili wene, hamba si na hasi yaye, baho ho nomanyila vyono, mbeka kowa wuli hamonga nane, konyitumamila, ho niwaponye Waisilayeli.”

³⁸ Na mbeka vyo yikejela mitondo yaco. Lono Gideyoni yenuka hakali mitondo i mitondo yaco, yakayiminya nguwo yi yilya no wubuhe wono walawa mumo, i malenga gayo gakamevya bakuli.

³⁹ Lulo Gideyoni yakamulonjela Mulungu yakatya, “Gwe go Muwaha Mulungu wulece kumbonela yikuwo, wundekaje nonje kanyhi kamonga du. ‘Nghukunena kanyhi mbuyajize njele kuwika nguwo ye ngholo. Ninga aluno nguwo yeze nghavu langa cuga co ciwe no wubuhe.’ ”

⁴⁰ Na mu cilo cico, Mulungu yaketuma nha vyono Gideyoni yalomba. Mitondo yaco hakali mitondo i nguwo yali nghavu du langa cuga cise co cali cina wubuhe.