Walamuzi 4 - Luganuzi Luswanu Kuli Wanhu Wose 2002

Debola na Balaka

¹ Na lono Ehudi yali yakondya kufwa wanhu wa Isilayeli waketuma wubi kanyhi hali Muwaha Mulungu.

² Nayo Muwaha Mulungu, yakawa kuwatajila mu miwoko ya Yabini u mutemi we Wakanani, mono yali yatemile likaya lya Hazoli. Mulongola we wasilikale wakwe yacemwaga Sisela mono yekalaga Halosheti-hagoyimu.

³ Yabini yali yena matuka ga cuma go wulugu magana yicenda. Kanyhi yali yawatemile Waisilayeli ko wukali hamonga no kuwagaza muno myaka makumi mejete. Lolulo Waisilayeli kanyhi wakamulilila Muwaha Mulungu ho yawataze.

⁴ Nayo Debola u mugolece wa Lapidoti yali yo muwizi, nayo yo yawetumamilaga Waisilayeli, kotya mulongola mu mapango gago.

⁵ Yali yazoweye kuceha ha mubici wunji wo mutende wono wali wuli hagati ya Lama na Beteli mu yisi ye matunda ya Efulayimu. Nawo Waisilayeli wamubitilaga ho yawapele mahweso gakwe.

⁶ Zuwa linji yakatuma wanhu wabite wamucemele Balaka u mwana wa Abinowamu mono yekalaga mwi'kaya lya Kedeshi mu yisi ya Nafutali, yakamulonjela yakamutya, “U Muwaha Mulungu u Mulungu wa Isilayeli, kakulajiliza yakutya nhavi, ‘Wusole wanhu we cilume elufu yikumi, ku wulawa mu mulango wa Nafutali, na Zabuloni, wuwategule sunga kwi'tunda lye Taboli.

⁷ Nane nomutuma Sisela u mulongola we wasilikale wa Yabini yaze mwihome nayo he 'kolongo lya Kishoni, mwene kowa yena ne matuka gakwe ge cuma go wulugu, hamonga ne wasilikale wakwe. Ninga ane nokupela wusume ho wumusume mwene.’ ”

⁸ Balaka yakamutya Debola, “Hono cibitane na gwegwe nolumba, ninga hono wulece kubitana nane, ale nane sinolumba kubita.”

⁹ Nayo Debola yakamutya, “Ale viswanu, cobitana nagwe! Ninga u muhinzo wuwu, siwokupela lilumbo lyo wusume, hambi u Muwaha Mulungu nha komutajila Sisela mu miwoko yo mucekulu.” Lo lulo lulo Debola yakatuluka hamonga na Balaka wakawa kubita ku Kedeshi.

¹⁰ Baho Balaka yakawacema wo mulango wa Zabuloni na wa Nafutali, ho wabitane ku Kedeshi. Wakatuluka wanhu elufu yikumi, wono wamutyatya. Vikabitana hamonga na Debola.

¹¹ Lulo Hebeli u Mukeni yali yakondya kukoma lihema lyakwe behi na Kedeshi behi no mubici wo munghola, ha Zananimu. Yakewagula ne Wakeni wayagwe, wo lulelo lwa Hobahu, u mulamuwe wa Musa.

¹² Nayo Sisela yali yeza kumanya nha vyono Balaka yakondya kubita mwi'tunda lya Taboli,

¹³ hodu nayo yakawa kugakonghola hamonga i matuka gakwe magana yicenda ge cuma go wulugu, hamonga ne wanhu wakwe, waze ku wulawa Halosheti-hagoyimu, wabite ko kwi'kolongo lya Kishoni.

¹⁴ Lulo Debola yakamutya Balaka, “Ale wubite, hambi Muwaha Mulungu nha yali hamonga nagwe. Hambi zuwalili nha yamwinjiza Sisela mu miwoko yako, nagwe komusuma du.” Hobaho Balaka yakatenenhuka wulawa mwi'tunda lya Taboli hamonga ne wanhu elufu yikumi.

¹⁵ Na lono Balaka ne wasilikale wakwe wali weza kumuhungucila Sisela, baho Muwaha Mulungu yakamupela Sisela wivyajizwe, mwene hamonga ne matuka gakwe ge cuma go wulugu, hamonga ne wanhu wakwe. Baho Sisela yakatima mwi'tuka lyakwe yakanza kutiza lumangho kwa magulu.

¹⁶ Ninga Balaka yakawalondelela wanhu ne matuka go wulugu, sunga ko ku Halosheti-hagoyimu, ne wasilikale wose wa Sisela wakawulagwa. Kwali kusina hamba munhu monga mono yasigala.

¹⁷ Sisela yakatiziza kwi'hema lya Yayeli u mugolece wa Hebeli u Mukeni, ku soko u mutemi Yabini wa ku Hazoli wali wena mulamu ne mhuga ya Hebeli u mukeni.

¹⁸ Yayeli yakalawila kunze yakamuhinjiliza Sisela yakamutya, “Winjile mbela 'gwe muwaha, winjile mwi'hema lyangu, wulece kogopa.” Lo lulo lulo Sisela yakenjila, nayo Yayeli yakamuhundika mwi'paziya.

¹⁹ Sisela yakamutya Yayeli, “Nghukulomba wumhele malenga ning'we, nghaluce muno.” Yayeli yakamugubulila nhoma ya mele, yakamupela, yakang'wa, yakawa kumuhundiciza kanyhi.

²⁰ Hobaho Sisela yakamutya Yayeli, alu wime ha mulango we lihema, na hono yunji yaze yakuwuze vyono mo yuli yunji mwi 'hema wukane wutye aa! Ng'o hasina.

²¹ Lulo Sisela yali yakatala muno, hodu yakawa kugona nhongo nzito muno. Baho Yayeli yakasola nyondo no lumambo lwa cuma, lo kukomela yihema, yakawa kumubitila Sisela ya kumusepa mhola mhola, yakawa kumukomanhila lumambo lwe cuma mu mutwe wakwe ha wununilo. No lumambo lukapuguza sunga ho hasi, yakawa kumuwulaga.

²² Nayo Balaka yakaza yakumulondola Sisela, Yayeli yakalawila kunze, yakamuhinjiliza yakawa kumulonjela yakutya, wuze ahano mbela! Ane nokulajila munhu mono wukumulondola. Hodu Balaka yakawa kwinjila mwi'hema hamonga nayo, yakamwagana mumo Sisela yalambalaye hasi yafwiye. No lumambo lwe lihema lukomanhile mu mutwe wakwe ha wununilo wupuguze ho hasi.

²³ Lizuwa lilyo, Muwaha Mulungu yakawapela wusume Waisilayeli kuli Yabini u mutemi wa Wakanani.

²⁴ Waisilayeli wakajendelela kumuwinjiliza mutemi Yabini sunga wali weza kumanya vyono wamongomezeza lukulu.