Walamuzi 3 - Luganuzi Luswanu Kuli Wanhu Wose 2002

Makungugo gono gasigala mu yisi

¹ Hobaho Muwaha Mulungu yakazisigaza nghungugo zinji, ho yawajele Waisilayeli wono si wali wawumanyile wulugu wa ku Kanani.

² Yakanoza nhavivi ho yazilanjize zindelo zose ze Waisilayeli kuli zo wulugu. Ko muno awalya wono wali wakali nehoma hamba kamonga mu wulugu.

³ Wono wasigazwa mu'si wali wo awalya wa mu makaya mahano ga Wafilisiti, ne Wakanani wose, Wazidoni ne Wahiti wono wekalaga mu matunda ga Lebanoni ku wulawilila mwi'tunda lya Baali-helemoni sunga mu mwejelele wa Hamati.

⁴ U Muwaha Mulungu yasaka yawetumamile wawo wawajele Waisilayeli ho yamanye, hono mbeka Waisilayeli wakutyatya wulajilize wakwe, nha vyono yawapela walezi wawo mu nzila ya Musa hamba ng'o.

⁵ Baho i Waisilayeli wakekala hamonga ne wa Kanani ne Wahiti, Waamoli ne Wapelizi ne Wahivi ne Wayebusi.

⁶ Waketolanila nawo no kwilunza nawo mu wuhemba milungu yawo.

Otiniyeli

⁷ Wanhu wa Isilayeli wakamusemwa Muwaha Mulungu wawo, waketuma wubi hali Muwaha Mulungu, wakajendelela kuhemba vihwani vya Baali na vyo mulungu we cicekulu Ashela.

⁸ Baho kanyhi Muwaha Mulungu yakawakolelwa likuwo Waisilayeli. Yakawatajila mu miwoko yo mutemi Kushani-lishatayimu wa ku Mesopotamiya nayo yakawasuma na kuwatema myaka munana.

⁹ Hobaho Waisilayeli wakamulilila Muwaha Mulungu, nayo Muwaha Mulungu yakawapela munhu mono kowaponya, litagwa lyakwe Otiniyeli u mwana wa Kenazi u mwanakwawe wa Kalebi.

¹⁰ Muhe wo Muwaha Mulungu wukamuziza Otiniyeli, nayo yakawa mulongola muli Waisilayeli. Otiniyeli yakabita ku wihomi, u Muwaha Mulungu yakamupela wusume, yakamusuma Kushani-lishatayimu u mutemi wa Mesopotamiya.

¹¹ Ne yisi yikekala no mulamu myaka makumi mane, Otiniyeli nayo yakawa kufwa.

Ehudi

¹² Wanhu wa Isilayeli waketuma wubi kanyhi hali Muwaha Mulungu. Na ku soko yiyo Muwaha Mulungu yakamupela mutemi Egeloni wa ku Mowabu vilungo kuciza Waisilayeli.

¹³ Baho Egeloni yakelunza ne Waamoli ne Waamaleki. Wakawahoma Waisilayeli no kuyisola Yeliko likaya lye mitende minji.

¹⁴ Waisilayeli wakamwitumamila Egeloni myaka yikumi na munana.

¹⁵ Baho kanyhi Waisilayeli wakamulilila Muwaha Mulungu nayo yakawapela munhu mono kowaponya, litagwa lyakwe Ehudi u mwana wa Gela mono yetumamilaga muwoko wo kucekulu, mono yalawa mu mulango wa Benyamini. Wanhu wa Isilayeli wakamupela vipegwa vinji Ehudi yamutegulile Egeloni u mutemi wa ku Mowabu.

¹⁶ Nayo Ehudi yaketyanila mumaje wono wali mukali kose kose wina wutali wa sentimeta kotya makumi mahano. Yakewopa mumaje wuwo mu ciwino, wukaninyinila mu cima cakwe co mugulu wo kulume kusi ye myenda yakwe.

¹⁷ Hobaho yakasola vipegwa yakawa kumutegulila mutemi Egeloni. Nayo Egeloni yali yo munhu mono yajinile muno muno.

¹⁸ Lono Ehudi yali yakondya kumupela Egeloni vipegwa, hobaho yakawalonjela i wanhu wono vyabitana wadinghuye vipegwa wawuye ku kaya.

¹⁹ Ninga mwene Ehudi yali wene du yakawuya ne nyuma behi na Giligali ha mabwe maseswe. Hanyuma yakawa kumubitila mutemi Egeloni yakamutya, “Gwe mutemi, ane nina nghani ya cinyele yono nghusaka nghulonjele.” Hobaho u mutemi Egeloni, yakawalonjela wetumami wakwe yakawatya “Muwuce wose, mucilece cili wejete.” Hobaho wose wakawa kuwuka.

²⁰ Lono mutemi yali yekaye yali wene mu cinyumba cakwe ca kucanyha ku golofa co kwambila lubeho. Ehudi yakamusejelela yakamutya, “Nina nghani yono Mulungu yanhumile nize nghulonjele.” U Mutemi yakenuka.

²¹ Hobaho Ehudi yakenjiza muwoko wakwe wo kucekulu yakawukwega mumaje ku wulawa ku cima cakwe co mugulu wo kulume, yakamuhoma mutemi mu'nda.

²² Mumaje wose wukenjila mu'nda hamonga ne cifimbo cayo, wukatoboza sunga ko ku mugongo ne mhama yo mutemi yikafunhuka yikawudindiza mumaje kusi ye 'nda. Ehudi hamba siyawukula mumaje mu'nda yo mutemi. Hambi nha wali wulawiye ko ku mugongo wukomile ho hasi.

²³ Hobaho Ehudi yakayidinda ne milango yose ne makufuli, yakalawila kunze yakawa kuwuka.

²⁴ Wetumami wo mutemi wakaza, lono Ehudi yali yakondya kuwuka wakawona milango yose midindwe wakehwesa vyono, lunji mutemi yali mumo, yali ku coloni.

²⁵ Wakamulindiliza du sunga nhondo wakawona ne cevu. Na lono waza wona siyakuza kudigula, wakasola funguwo wakadigula cinyumba cicilya co kwambila lubeho. Baho wakamuwona muwaha wawo yagonile hasi yafwiye.

²⁶ Ninga Ehudi yakatoloka lono wene wali wakali walindilize yadigule. Yakakolela kwi 'bwe lililya lye lipango yakatolocela ku Seyila.

²⁷ Na lono yali yakondya kufika ku yisi ye matunda ya Efulayimu, yakayitowa ndulele, yakuwacema wanhu wa Isilayeli ho wabite ku wulugu. Yakawa kuwalonjela lono wutenenhuka ga mu matunda.

²⁸ Yakatya, “Wose munhyatyaje! Muwaha Mulungu yakondya kumupelenyi wusume kuli walugu wenyu, Wamowabi.” Hobaho wakamutyatya Ehudi no kuyibata yisi mu malowoko gose ga Yoludani, gono wamowabu wasakaga kulowocela. Hakawa hasina hamba monga muli Wamowabi mono yasuma kulowoka.

²⁹ Na mwi'zuwa lilyo mu wihomi wuwo, wakawawulaga wasilikale we citung'ati elufu yikumi we Wamowabi. Hasina hamba monga mono yatiga.

³⁰ Mwi'zuwa lilyo lyo Waisilayeli wawasumila i Wamowabi. Na ku wulawilila baho, nhondo wakaceha wapolile, hamonga no mulamu, myaka makumi munana.

Shamugali

³¹ Shamugali mwana wa Anati, nayo yali yo mulamuzi mono yatyatya, nayo yakawaponya Waisilayeli, yakawawulaga Wafilisiti magana mutandatu, yawawulaga ne nghome yono yina cisonje, yo kutonjela zing'ombe lono zikulima.