Walamuzi 2 - Luganuzi Luswanu Kuli Wanhu Wose 2002

Malayika wo Muwaha Mulungu ha Bocimu

¹ Lulo Malayika wo Muwaha Mulungu, yakalawilila ku Giligali yakabita ku Bocimu, yakawalonjela Waisilayeli yakawatya, “Lono namuwusenyi ku yisi ya Misili no kumuletenyi sunga ku yisi yono nawelahila i walezi wenyu. Natya, sinolobena cilagane cangu na nyenye.

² Holeka mulece kunoza cilagane co cose ne wekazi wa mu yisi yiyi. Yinojeye muvimwagulanje vikumbicilo vyawo. Ninga mukali netuma nha vyono namulajiizenyi mwitume. Langa muketuma nha vyono mwasakaga nyenye nyo weneco!

³ Alu nghumulonjelenyi vyono nane hamba si nowawinjila lukulu wanhu wawa, lono anye mukwinjila mu yisi yawo, nawo wowa walugu wenyu nanye mogwizwa no wuhembi we milungu yawo.”

⁴ Na lono Malayika yali yeza kukondya kulonga zizi, wanhu wose wa Isilayeli wakanza kulila,

⁵ na yo soko yono yaleka hanhu bahalya hakacemelwa Bocimu. Nawo wakamulavizya kuko Muwaha Mulungu makumbiko.

U wufwe wa Yoshuwa

⁶ Ale baho Yoshuwa yakawa kuwelaga wanhu wa Isilayeli yakawaleka wabite wakekale mu zi'si zawo, ho waziteme ziwe zawo.

⁷ Wanhu wa Isilayeli wakajendelela kumwitumamila Muwaha Mulungu mu vilo vyose vyono Yoshuwa yali yakali mumi. Na mu vilo vyose vye wanyamhala wono wali wakali womi, lono Yoshuwa yali yakondya kufwa. Hambi wene nha wali wakondya kuziwona zimbaha, zono u Muwaha Mulungu yetuma kuli Isilayeli.

⁸ Yoshuwa u mwana wa Nuni u mwitumami wo Muwaha Mulungu, yakafwa yali yaficila myaka yigana limonga ne 'kumi.

⁹ Baho yakazikwa mu yisi ye ligawo lyakwe, lyono yali yapegwa mu yisi ya Timunali-helezi, mu yisi ye matunda ya Efulayimu, ku lubavu lwa kusumuka ye litunda lya Gayashi.

¹⁰ Lulelo lwawo lukawa lwafwiza. Nalo lulelo lono lwawatyatya, lukamusemwa Muwaha Mulungu, na zose zono Mulungu yawatendela wanhu wa Isilayeli.

Waisilayeli waleka kumuhemba Muwaha Mulungu

¹¹ Hobaho i wanhu wa Isilayeli waketuma wubi hali Muwaha Mulungu, wakanza kanyhi kuyihemba Milungu ya Mabaali.

¹² Wakaleka kumwitumamila Muwaha Mulungu, u Mulungu we walezi wawo, u Mulungu mono yakawawusa ku yisi ya Misili, wene wakanza kuyihemba milungu yinji, i milungu ye wanhu wono wali wawapilime. Wakayifugamila milungu yiyo, wakamunoza Muwaha Mulungu yawakolelwe yikuwo muno.

¹³ Wakaleka kumuhemba Muwaha Mulungu wakamwitumamila mulungu Baali na Ashitaloti.

¹⁴ Hobaho Muwaha Mulungu yakawakolelwa likuwo Waisilayeli no kuwatajila mu miwoko ye walugu wawo, ho wawahome, no kuwahiziza vinhu vyawo. Yakawapela vilungo i walugu wawo, nawo Waisilayeli wakawula vilungo vyo kwitaziza ho wawasume walugu wawo.

¹⁵ Na ko kose kono wabitaga so wihomi ne walugu wawo, Muwaha Mulungu yawalekaga hamba kuwataza yaye, nha vyono yali yakondya kuwalonjela nha vyono yali yelahiza. Holeka wakagazika muno.

¹⁶ Hobaho Muwaha Mulungu yakawapela kanyhi Waisilayeli, walongola wono wakawataza ho wawasume walugu wawo.

¹⁷ Ninga hamba nhavivyo Waisilayeli siwasuma kuwahulika walongola wawa. Waisilayeli wakaleka wihuwilo wa kuli Muwaha Mulungu, wakajendelela du kuyihemba milungu yinji. Langa i wa kuku zawo, wali wagebate malajilizo go Muwaha Mulungu. Ninga u lulelo alu lwe kejete, wakagaleka musunho i malajilizo go Muwaha Mulungu.

¹⁸ Mu vilo vyono Muwaha Mulungu yawapelaga Waisilayeli mulongola, Muwaha Mulungu yamupelaga wutazi wuwaha, yuyo mulongola, hamonga no kuwaponya wanhu kuli walugu wawo, mu vilo vyose vyo wikale wo mulongola yuyo. Kanyhi Muwaha Mulungu yawawonelaga lusungu ko soko ye mawine gawo, na so wutamiswe wawo hamonga no wiwonelwe wawo.

¹⁹ Ninga lono mulongola yakufwa du, hodu nawo walekaga kumwitumamila Muwaha Mulungu no kuziwuyila kanyhi zinzila ze katali. No kwituma u wubi wono walajila mu vipango vivyo, vyono wali wucizize muno kuciza na wo lulelo lono lupulute. Wayihembaga no kuyitumamila milungu yinji. Wakajendelela du ne metumo gawo mabi.

²⁰ Hobaho u Muwaha Mulungu nayo, yakawa kuwakolelwa likuwo Waisilayeli, no kuwatya. “Likungugo lili lyakondya kucibena cilagane cono nawalajiliza i walezi wawo wacibate. Hambi nha si wakuhulika 'ne yaye.

²¹ Holeka nane sinosuma kuziwinga zinghungugo zinji zono zali zikaye mu yisi lono Yoshuwa yafwila.

²² Nozitumamila zinghungugo zizo, ho mbone hono Waisilayeli mbeka wozityatya zinzila zangu, nha vyono i walezi wawo watendaga hamba ng'o.”

²³ Holeka Muwaha Mulungu yakazileka zinghungugo zizo mumo mu'si. Kanyhi hamba siyamupela na Yoshuwa wusume muli zene, hamba siyaziwinga yaye na lono Yoshuwa yali yakondya kufwa.