Walamuzi 18 - Luganuzi Luswanu Kuli Wanhu Wose 2002

Mika na wo mulango wa Dani

¹ Mu vilo vivyo, kwali kukali kusina mutemi mu Isilayeli. Na mu vilo vivyo, wo mulango wa Dani, wali wakali wakuyilondola yisi yono woyinoza yiwe yawo, hambi wene, mu milango yose ya Isilayeli, nha wali wakali nagawilwa yisi ho yiwe yawo.

² Hobaho wanhu wa Dani wakawahagula wanhu wahano we lilumbo, wulawilila mu zimhuga za mu mulango wawo, wakawatuma wulawilila mu makaya ga Zola na Eshitayoli, ho wabite wakayitandile yisi. Nawo wanhu wawa, wali weza kufika mu yisi ye matunda ya Efulayimu, wakaficila mu kaya ya Mika.

³ Na lono wali wali baho wakalimanya lizi lyo muzelelo Mulawi, hobaho wakamubitila wakamuwuza wakatya, “Alu 'gwe! Wukunozaci baha, hamba nani mono yakuleta baha?”

⁴ Nayo yakawapitula yakatya, “Ane nina wilumbanize na Mika, yasolile niwe mukohani wakwe, nayo yokuwa kundipa musahala so mulimo wuwo.”

⁵ Nawo wakamulonjela wakamutya, “Cikukunena wuciwuzize ta ko Mulungu, ho cimanye vyono umuhinzo wetu kono cikubita wowa wina wumoteswe.”

⁶ Umukohani yakapitula yakawatya, “Mubite mupolile, hambi Muwaha Mulungu nha yali hamonga nanye mu muhinzo wenyu.”

⁷ Baho i wanhu wa walya wahano, wakatuluka wakawa kubita kwi'tumbi lya Layishi. Wakayiwona mikalile ye wanhu wa baho, vyono yali mikalile ya mulamu, yihwanile nhe mikalile ye Wazidoni, wono wali wena mulamu, kanyhi watulile, wono wali wasina munhu wo wose, mono yawagazaga, mono yali yena wulajilize mu'si yawo. Kanyhi wali wena ne vihilwa vyose vyono wasakaga. Wekalaga kutali ne Wazidoni, hamba siwalongozwaga na munhu wo wose.

⁸ I wanhu wa walya i wahano, wali weza kuwuya ku Zola na Eshitayoli i wanhu wakawawuza zono waziwene kuko.

⁹ Nawo wakawapitula wakawatya, “Inucenyi cikawagane, cikayihoma Layishi. Ase cayiwona yisi nayo swanu muno muno, mulece kwikala bwete baha musina co kwituma. Musunhe cibite cikayihome!

¹⁰ Nanye kolo mweza kufika kuko mowona vyono i wanhu wa kuko, wasina mahwele go gose, langa wekalaga watulile du. Ne yisi yawo ngazi, kanyhi yina vinhu vyose vyono munhu kosaka, nayo Mulungu yakondya kuyinjiza mu miwoko yetu.”

¹¹ Lo lulo lulo wanhu magana mutandatu wa mu mulango wa Dani, wakatuluka ku wulawa Zola na Eshitayoli wakondya kwiwikaniza so wulugu.

¹² Wakabita wakayisimya nghambi yawo ku lubavu lwa ku mwezi ya Ciliyati-yeyalimu mu Yuda. Ayi yo soko yono yaleka i hanhu baho sunga na lulu hakucemwa nghambi ya Dani sunga nalu.

¹³ Wakajendelela ku wulawa baho, sunga wakafika mu kaya ya Mika mu yisi ye matunda ya Efulayimu.

¹⁴ Lulo i wanhu wa walya wahano, wono watumwa, wakayitandile yisi ya Layishi, wakawalonjela i wayawo wakawatya, “Mwene mwali mumanyile, vyono baha mu zikaya zizi, ho yili kaya yinji yono yina cihwani ce libici, cono cihiliwe fweza? Kanyhi mo vili ne vihwani vinji hamonga ne Efodi? Alu mukwihwesa cinoze wule?”

¹⁵ Hobaho wakawa kubita ku kaya ya Mika, kono muzelelo yu yulyo Mulawi yekalaga, wakamulamusa Mulawi no kumutambuza vyono yajendelelaga.

¹⁶ Ninga lulo i wanhu wa walya we magana mutandatu i wasilikale, wono walawa ku Dani, wono wali wewikanize so wulugu, wali wemile he 'lango lye 'kaya,

¹⁷ watandizi wahano wakenjila mu nyumba lwa kamonga, wakasola cihwani cicilya ce libici, cono cali cihiliwe fweza, hamonga ne vihwani viyagwe, hamonga ne Efodi. Lulo mukohani yali yemile he 'lango yali hamonga ne wasilikale magana mutandatu, wono wali wewikanize ne vitwalo vye milewo. Milewo.

¹⁸ I wanhu wa walya wahano, wali weza kwinjila mu nyumba ya Mika, no kusola vinhu vyono vyelile, mukuhani yakawawuza yakawatya, “Alu mukunoza cici?”

¹⁹ Wakamulonjela wakamutya “Agwe wunyamale, wulece lulonga nghani yo yose. Langa agwe cibitane, wuwe mukohani wetu no munyamhala wetu. Hamba agwe 'lu si wukwendezwa wuwe mukohani we milango yose ye Waisilayeli, si nho kuwa mukohani we mhuga ya munhu monga?”

²⁰ Ne nghani yiyi, yikamwendeza muno mukohani, hobaho yakavibocela vinhu vyono vyelile yakawa kutuluka hamonga nawo.

²¹ Lulo wakawa kupituka no kutuluka hamonga ne wana wawo, hamonga ne mitugo yawo ne zisawo zawo, wakawa kuvilongoza ku mwande yawo.

²² Nawo lono wali watela kutali ne kaya. Mika yakawa kuwacemeleza i wekalani wayagwe wekonghole so wulugu. Wakawalonda i wanhu wa Dani ho wakehome. Wakawagana,

²³ wakanza kuwacemeleza. Nawo wanhu wa Dani wakapituka, wakawa kumuwuza Mika wakamutya, “Alu kocili cici? Ne lipuga lyose lili lye wanhu, lya cici?”

²⁴ Mika yakawapitula yakawatya, “Alu 'nye mukutya nhawule 'lu? Hamba mwina nghanici lu? Hambi nha mumusola mukohani wangu, hamonga ne milungu yangu yono nanoza, hanyuma muwa kutoloka! Alu'ne ho nosigala na cici lo?”

²⁵ Nawo i wanhu wa Dani wakamutya, “Gwe Mika, ciba wali wunyamale, hamba kulonga nghani yo yose, na hono si nhavivyo kowakalaza wanhu awa, nawo wokuhoma. Nagwe kofwa hamonga na we mhuga yako wose.”

²⁶ Lulo wene wakajendelela no muhinzo. Nayo Mika yali yeza kuwawona vyono wena vilungo kuciza mwene, hodu yakawa kuwaleka, yakapituka yakawuya ku kaya kwakwe.

²⁷ Nawo wanhu wa Dani wali weza kukondya kumusola mukohani, hamonga ne vinhu vyono Mika yanoza, wakatuluka wakabita kuyihoma Layishi, i likaya lilya lyo mulamu, lye wanhu wono watulile, lyono lyali lili mwi'lolo lya Bete-lehobu. Wakawahoma wekazi wa baho, wakaliticimiza ne likaya.

²⁸ Kwali kusina mono yawataza, hambi Layishi nha vyali vili kutali muno na Zidoni kanyhi wali siwemanyile na wanji wo wose. Baho wanhu wa Dani, wakalizenga kanyhi likaya lililya, wakawa kwikala mumo.

²⁹ Wakawa kulikawaniza ne litagwa lya “Layishi” likawa “Dani,” so wukumbucila litagwa lyo sogo yawo Dani, u mwana wa Yakobo.

³⁰ Nawo i wanhu wa Dani wakaciwika cihwani, wakawa kucihemba. Nayo Yonazani u mwana wa Gelishomu kanyhi u mwizukulu wa Musa, yuyo yo yawetumamilaga u mulimo wo wukohani i wanhu wo mulango wa Dani hamonga ne wanagwe. Sunga lono vyaziza i vilo vya wuhamywe nawo.

³¹ Ne cihwani cico ca Mika, cikajendelela kwikala baho mapango gose, lono lihema lyono wamuhembelaga Mulungu lyekalaga ku Shilo.