Walamuzi 12 - Luganuzi Luswanu Kuli Wanhu Wose 2002

Yefuta ne Waefulayimu

¹ Wanhu wa Efulayimu wakekonghola wewikanize so wulugu, wakalowoka likolongo lya Yoludani, wakafika Zafoni, baho wakamutya Yefuta, “Alu 'gwe Yefuta, nhawule walowoka mupaka, wukawa kubita kwihoma ne Waamoni wuli wene, hamba kucicema'se cibitane nagwe? Alu hono nhavivyo nase coyipembela nyumba yako, yikugwile mu mutwe wako!”

² Ninga Yefuta yakawatya, “Ane ne wanhu wangu cali cina wisumanize wuwaha muno muno ne wanhu wa Amoni. Nane nghamucemenyi 'nye, ninga hamba si mwaza munhaze, mumhonye mu miwoko yawo.

³ Nane nali neza kumanya vyono simukuza kunhaza, hodu nghesuza wumi wangu. Nghawa kulowoka mupaka, nghawa kwihoma nawo. Nayo Muwaha Mulungu yakamhela wasume. Alu nhawulenyi kanyhi zuwali mukuza mwihome nane?”

⁴ Hodu, Yefuta yakawakongholela hamonga wanhu wose wa ha Gileyadi. Yakawahoma wanhu wa Efulayimu yakawasuma. (Hambi i Waefulayimu nha wali watya vyono, “Anye Wagileyadi mono mwikaye mu yisi ya Manase ne Waefulayimu, nha mwatiza ku wulawa ku Efulayimu.”)

⁵ Lulo Wagileyadi wakavisola vilowoko vyose vya Yoludani, ho Waefulayimu walece kusuma kulowoka. Na mu vipango vyo vyose, lono Mwefulayimu wo wose, yawalombaga Wagileyadi, yakombolwe yalowoce likolongo ho yeponye, nawo Wagileyadi wamuwuzaga wakutya, “Wule, agwe wuli Mwefulayimu?” Na hono yatye, “Aa! Ng'o.”

⁶ Nawo wamulonjelaga yatwe, “Shiboleti.” Ninga mwene kotya, “Siboleti.” Hambi nha siyakusuma kuyitambula viswanu nghani yiyo. Hodu nawo wawa kumwibata, wawa kumuwulajila ha cilowoko cimonga ce likolongo lya Yoludani. Na mwi'zuwa lilyo, wawulagwa Waefulayimu elufu makumi mane na nyejete.

⁷ Yuyu Yefuta yakawa mulongola we Waisilayeli myaka mutandatu. Hanyuma yakafwa yakawa kuzikwa mwi'tumbi lyo kwawo ku Gileyadi.

Ibizani, Eloni na Abidoni

⁸ Yali yeza kufwa Yefuta, Ibizani munya ku Betelehemu, yakawa mulamuzi we Waisilayeli.

⁹ Yali yalelile wana we cilume makumi madatu, na we cicekulu nawo makumi madatu. Yakawakombola wahinza wawa wose watolwe ku zimhuga za wono si wa mu lulelo lwakwe. Yakawasola wahinza wanji nawo makumi madatu, wulawa ku zimhuga za wono si wa mu lulelo lwakwe. Nawo wakatolwa ne wanagwe we cilume. Nayo Ibizani, yakawa mulamuzi we Waisilayeli myaka mupunghati.

¹⁰ Hanyuma yakafwa, yakazikwa ku Betelehemu.

¹¹ Yali yeza kufwa Ibizani, Eloni u Muzabuloni, nayo yakawa mulamuzi we Waisilayeli myaka yikumi.

¹² Hanyuma yakafwa, yakazikwa ku Ayaloni mu yisi ya Zabuloni.

¹³ Yali yeza kufwa Eloni, Abidoni u mwana wa Hilele munya Pilatoni, nayo yakawa mulamuzi we Waisilayeli.

¹⁴ Hilele yali yena wana we cilume makumi mane, na wezukulu we cilume makumi madatu, wono wajendelaga ndogowe makumi mupunghati. Yakawa mulamuzi we Waisilayeli myaka munana.

¹⁵ Hanyuma yakafwa, yakazikwa ku Pilatoni mu yisi ya Efulayimu ya mu yisi ye matunda ye Waamaleki.