Walamuzi 11 - Luganuzi Luswanu Kuli Wanhu Wose 2002

¹ Na kuko ku Gileyadi, kwali ko yuli munhu citung'ati muno mono yacemwaga Yefuta. Yali mwana wo mucekulu musenyha, u sogwe litagwa lyakwe yali Gileyadi.

² Yuyo Gileyadi, yali yena ne wana wanji we cilume kuli mugolece wakwe. Ne wana wawa lono wali wakondya kuwiluka, hodu wakawa kumuwinga Yefuta yawuce mu kaya. Wakamutya, “Agwe sikosuma kuwa muhazi wa cinhu co cose ca mu nyumba yo sogo yetu Gileyadi, hambi 'gwe, nha wuli mulelwe no mucekulu yunji.”

³ Hodu nayo Yefuta yakawa kuwuka mu kaya, yakawa kubita kwikala mu yisi ya Tobu. Na lono yali yali kuko, yakakwega cipuga ce wanhu we cakacaka, wakawa wakujendana nayo.

⁴ Vyali vyeza kupuluta vilo vicefu, Waamoni wakatuluka kwihoma ne Waisilayeli.

⁵ Zaza kuwa zejela zizi, walongola wa ku Gileyadi wakabita kumuleta Yefuta wulawilila ku yisi ye Tobu.

⁶ Wakamutya, “Wuze wucilongoze cikawahome Waamoni.”

⁷ Ninga Yefuta yakawapitula wawo walongola wa ku Gileyadi yakawatya, “Anye, si yo nyenye mwasula, sunga mukaminga kwe vilungo ndece kwikala mu kaya ya baba? Nhawule 'lu zuwali mwanyiziza lono mweza muli mu wugaye?”

⁸ Nawo wakamutya Yefuta, “Heya, cakuwuyila kanyhi, ku soko cikukusaka cibitane na gwegwe, cikawahome Waamoni, kanyhi wuwalongoze ne wanhu wose we Gileyadi.”

⁹ Yefuta yakawalonjela yakawatya, “Hono mbeka mukungomola zuwali ku kaya cikehome ne Waamoni na hono Muwaha Mulungu yamhele wusume, ale nowa mulongola wenyu.”

¹⁰ Nawo wakamupitula wakamutya, calumba, nayo Muwaha Mulungu nha yo muhomelezi wetu. Nase cokwituma nha vyono wulonjile.

¹¹ Lulo lulo Yefuta yakawa kutulukana ne walongola wa ku Gileyadi. Nawo wanhu wakamunoza yawe mulongola wawo. Nayo Yefuta yakalonga zinghani zakwe zose hali Muwaha Mulungu ku Mizipa.

¹² Hanyuma ya zizo, Yefuta yakawatuma wanhu ko Mutemi we Waamoni, yakatya, “Alo wina nghani ci kuli'se? Nhawule 'lu wenjila mu yisi yangu kwe vilungo ho wucihome?”

¹³ Nayo Mutemi we Waamoni yakawapitula wanhu wa Yefuta yakawatya, lono Waisilayeli wawucila kulawilila ku Misili, wayisola yisi yangu ku wulawilila mwi 'kolongo lya Alinoni, Yaboke sunga kwi'kolongo lya Yoludani. Holeka munojeye luno mungomolele yisi yangu ko mulamu.

¹⁴ Yefuta yakawatuma Kanyhi wanhu ko Mutemi we Waamoni.

¹⁵ Yakamupitula yakutya. Gwe muyangu, nghani yiyo hamba si ya mbeka. Waisilayeli si wayihoma yisi ya Mowabu, hamba yisi ya Amoni yaye.

¹⁶ Langa yali yili nhavi, lono Waisilayeli wawucila ku yisi ya Misili, wakolela mu nyika sunga kwi'lenga lya Shamu, wakafika ha Kedeshi.

¹⁷ Na lono wali wali baho ha Kadeshi, Waisilayeli wakatuma wanhu kuli Mutemi wa Edomu, wakulomba yawakombole wakole mu yisi yakwe. Ninga mutemi wa ku Edomu siyawakombola yaye. Kanyhi wakamulomba mutemi wa Mowabu, nayo nhavivyo yakawalemeza walece kukolela mu yisi yakwe. Hodu Waisilayeli wakekala ha Kadeshi.

¹⁸ Nawo wali weza kulawa baho, wakajendelela no muhinzo wawo, wakakolela mu nyika, wakuyipilima yisi ya Edomu ne yisi ya Mowabu, wakabita sunga ko ku lubavu lwa kucilima, ye yisi ya Mowabu, ku lubavu luyagwe lwe likolongo lya Alinoni. Wakayisimya nghambi yawo kuko, ninga si walilowoka likolongo lya Alinoni yaye. Hambi nha wali wo mupaka wa Mowabu.

¹⁹ Na ku wulawilila baho, Waisilayeli wakawatuma wanhu wabite kulu sihoni u Mutemi we Waamoli ku Heshiboni. Wakamulomba yawakombole wakolele mu yisi yakwe lono wali mu muhinzo wakubita ku yisi yawo.

²⁰ Ninga nayo Sihoni si yawakombola yaye Waisilayeli wakolele mu yisi yakwe. Langa mwene yakakonghola lipuga lyakwe lye Wasilikale wo wulugu, yakawa kusimya nghambi yakwe ha Yahazi, yakawa kuwahoma Waisilayeli.

²¹ Ninga u Muwaha Mulungu, u Mulungu we Waisilayeli, yakamusuma Sihoni hamonga ne lipuga lyakwe lye wasilikale. Na ku soko yiyo, Waisilayeli wakayisola yisi yose ye Waamoli wono wekalaga mumo.

²² Nawo wakayitema yisi yose ye Waamoli, wulawilila ku Alinoni ku lubavu lwa kutakama sunga ko ku Yaboki lubavu lwa kusumuka na kulawilila mu nyika yo lubavu lwa kucilima lwa Yoludani mhelo ye mwezi.

²³ Vyali vyo vilungo vyo Muwaha, Mulungu, u Mulungu wa Isilayeli, mono yawawinga Waamoli, ku so wanhu wakwe Waisilayeli.

²⁴ Alu, wule! Wukusaka wuyisole kanyhi yisi yako? Agwe wikalaje du na cico cono mulungu wako Cemoshi yakupelile. Ase nase, cokwikala ne vinhu vyose vyono u Muwaha Mulungu, u Mulungu wetu yacipelile.

²⁵ Hamba wukwihwesa 'gwe wumucizize Balaka u mwana wa Zipola u mutemi wa Mowabu? Mwene hamba siyesumaniza ne Waisilayeli, hamba kwihoma nawo.

²⁶ Nawo Waisilayeli, nha wali wayitemile Heshiboni, na Aloweli, ne vikaya vyono vyali vipilime, hamonga na makaya ga mu mwejelele we likolongo lya Alinoni, myaka magana madatu. Alu nhawule siwasuma kuwaboka lululya?

²⁷ Ninga wumanye nha vyono, ane singhutendeye nghani 'mbi yinji yo yose. Langa agwe, yo gwegwe mono wanozeza vibi, wukehoma nane. Ninga Muwaha Mulungu yo muling'anizi. Mwene yo kohagula zuwalili hagati ye Waisilayeli ne Waamoni.

²⁸ Ninga lulo mwene mutemi we yisi ye Waamoni, hamba siyazicelelela yaye, zinghani za Yefuta.

²⁹ Lulo u muhe wo Muwaha Mulungu wakamuziza Yefuta. Yakakolela mu Gileyadi yose na mu Manase yose yakawuya ha Mizipa ya ku Gileyadi. Yakajendelela yakakolela sunga ku yisi ya Waamoni.

³⁰ Baho Yefuta yakamwihuwiza Muwaha Mulungu yakatya, “Hono wumhele wusume kuli Waamoni,

³¹ nane nokulavizya cilavywa cinyanywe co munhu mono kolongola wulawa mu kaya yangu, kuza kuhinjiliza, lono nghuwuya ku kaya no wusume kuli Waamoni.”

³² Yefuta yakabita yakalowoka likolongo yakawa kwanza kwihoma ne Waamoni, nayo Muwaha Mulungu yakamupela wusume.

³³ Yakawahoma ku wulawilila Aloweli sunga ko ku Miniti. Makaya makumi mejete hamonga, sunga ko ku Abeli-celamimu, ne wanhu wakahunjika muno. Ne Waamoni wakasumwa ne Waisilayeli.

Umwana we cicekulu wa Yefuta

³⁴ Na lono Yefuta yawuyaga ku kaya ku Mizipa, baho u mwanagwe we cicekulu yakalawila, yakawa kuza kumuhinjiliza, akuno yakutowa musesele no kuvina. Nayo yali yo mwanagwe yumonga du, yali wene.

³⁵ Nayo Yefuta, yali yeza kumuwona du yakavidemulanga vivwalo vyakwe ko wukalale, yakatya, “Woyi hee! Mwanangu! Wayitamisa nhumbula yangu! Nhawule 'lu nagwe wamhela wusungu wono winha wuwu? Hambi no muyago, nha nihuwiza kuli Muwaha Mulungu, nane hamba sinosuma kubena wihuwizo wuwo!”

³⁶ U muhinza yakamutya, “Hono wuwe kwihuwiza kuli Muwaha Mulungu, ale witumaje du nha vyono wihuwize wunhendele. Hambi Muwaha Mulungu nha yakondya kuwapela wulipicizwe walugu wako Waamoni.”

³⁷ Ninga hamba nhavivyo u muhinza yakamulomba sogwe yakatya, “Alu baba, nghukunena wunyinhumile nghani ayi monga. Wundekaje niwe nili wene myezi myejete. Mbite ne wahinza i weyendi wayangu mu matunda, ngheyililile wufwe wangu. Hambi nha nofwa lono nghali natolwa.”

³⁸ Nayo sogwe yakamutya, Ale wubite. Yakamukombola kwa myezi myejete. U muhinza hamonga ne wahinza wayagwe, wakawa kubita kuyegayega mu matunda, yakawa yazinguce, vyono yowa yimunojeye yafwe lono yakali natolwa, hamba kulela wana.

³⁹ Mbeka yaza kupuluta myezi myejete yakawuya hali sogwe nha vyono yali yehuwiza, nayo sogwe yaketuma nha vyono yehuwiza hali Muwaha Mulungu. U muhinza yuyo yakafwa yali yakali namanya walume yaye. Na ku wulawa baho, hodu wukawa wo moto we Waisilayeli.

⁴⁰ Wahinza wose we Waisilayeli wabitaga mu matunda mwaka na mwaka kwa vilo vine vine, kumukalalila muhinza muyawo, u mwana we cicekulu wa Yefuta wa ku Gileyadi.