Walamuzi 1 - Luganuzi Luswanu Kuli Wanhu Wose 2002

Wo mulango wa Yuda na wa Simiyoni, wakumwibata Adonibezeke

¹ Ale lono Yoshuwa yali yafwiza, wanhu wa Isilayeli wakamuwuza Muwaha Mulungu wakatya, “U mulangoci wa muli milango yetu, wono wolongolela ho vikehome ne Wakanani?”

² U Muwaha Mulungu yakawapitula yakatya “Wo mulango wa Yuda wo wolongolela, hambi nha nakondya kuyiwika yisi mu miwoko yawo.”

³ Nawo wo mulango wa Yuda wakawalonjela wo mulango wa Simiyoni wandugu zawo wakawatya “Ale, cibitane hamonga na nyenye sunga ko ku yisi yono yakondya kuwagwa so sese ho cikehome ne Wakanani, hanyuma ho cobitana nanye ku yisi yono yowagwa so nyenye.”

⁴ Hobaho wo mulango wa Yuda na wa Simiyoni wakatulukana hamonga sunga ku wulugu. Muwaha Mulungu yakawapela wusume kuli Wakanani ne Wapelizi wakawahoma wanhu we cilume, waficile elufu yikumi, kuko ku Bezeke.

⁵ Wakamwagana kuko Adonibezeke wakehoma nayo, wakawahoma Wakanani ne Wapelizi no kuwawinga.

⁶ Adonibezeke yakatiza ninga wakamwibata wakawa kumudumula madole kululu, ga mu mawoko na ga mu magulu.

⁷ Adonibezeke yakatya, “Watemi makumi mupunghati wono madole kululu gawo ga mu mawoko na ga mu magulu gali madumulwe, watondolaga ndigwa hasi ye meza yangu. Alu Mulungu yanhendela nane nha vyono nawatendela wene.” Nawo wakamutegula ku Yelusalemi yakafwila kuko.

Wo mulango wa Yuda vikuyihoma na Yelusalemi na Hebuloni no kuzisuma.

⁸ Hobaho i wanhu we cilume wa Yuda wakayihoma Yelusalemi wakayiteka. Wakawawulaga wanhu wose no kulipembela likaya no moto.

⁹ Waza kukondya zizi, wakatuluka kwihoma ne Wakanani wono wekalaga mu yisi ye matunda na wa mu mwalambalo na wa mu yisi nghavu yo lubavu lwa kutakama.

¹⁰ Hanyuma, wakatuluka kanyhi wakawabitila Wakanani wono wekalaga mwi 'kaya lya Hebuloni lyono katali lyacemwaga Kiliyati-aleba. Wakazihoma zimhuga zose za Sheshayi na Ahimani na Talimayi.

Otiniyeli yakulisumiza likaya lya Debili

¹¹ Na ku wulawilila kuko wanhu we cilume wo mulango wa Yuda wakawabitila wono wekalaga mwi'kaya lya Debili lyono lu lulya lyacemwaga Ciliyati-sefeli.

¹² Baho, yunji wa muli wene mono yacemwaga Kalebi, yakatya, “Mono koyihoma no kuyisuma Ciliyati-sefeli, nomupela mwanangu we cicekulu Akisa, yawe mugolece wakwe.”

¹³ Nayo Otiniyeli u mwana wa Kenazi u mwanakwawe wa Kalebi, yakalihoma likaya yakaliteka. Hobaho Kalebi yakamupela Otiniyeli u mwanagwe we cicekulu Akisa ho wetole nayo.

¹⁴ Kukawa mwi'zuwa lye Halusi Otiniyeli yakamufunda Akisa ho yalombe mugunda ko sogwe. Baho Akisa, yakatima mu ndogowe yakwe Kalebi yakamuwuza Akisa cono yasakaga.

¹⁵ Akisa yakamupitula sogwe yakatya, “Nghulomba baba, wumhele wulugutwe, kanyhi no mugunda wa mu mivwilo, hambi yisi yono wamhela nha nghavu muno.” Hobaho Kalebi yakamupela Akisa mugunda wa mu mivwilo ya hacanyha na ya hasi.

Wusume wa wo mulango wa Yuda na wa Benyamini

¹⁶ I wana wa Mukeni u mukwewe wa Musa, wakabitana hamonga ne wana wa Yuda, wakulawilila Yeliko likaya lye mitende minji, sunga ko ku nyika yo lubavu lwa kutakama lwa Aradi ya ku Yuda. Kuko wakekalana ne Waamaleki.

¹⁷ Wana wa Yuda vyabitana hamonga ne wana wa Simiyoni, wakawahoma no kuwasuma Wakanani wono wekalaga mwi'kaya lya Zefati. Wakalilijita likaya no kulyongomeza wakalicemela litagwa, lya Holema.

¹⁸ Muwaha Mulungu yakawataza wo mulango wa Yuda wakayisola yisi ye matunda yikawa yawo. Wakayiteka Gaza ne mipaka yayo na Ashikeloni, ne mipaka yayo, na Ekiloni, ne mipaka yayo hamonga ne ma'si gono gali gapilime.

¹⁹ Ninga si wasuma kuwawinga i wanhu wono wekalaga mwi'lolo, hambi i wanhu wawo, nha wali wena matuka ga cuma go wulugu.

²⁰ Nayo yisi ya Hebuloni, yakapegwa Kalebi mono yawawinga awalya we milango midatu ye zindelo za Anaki, nha vyono Musa yali yalajilize.

²¹ Nawo wana wa Benyamini siwawawinga i Wayebusi wono wekalaga ha Yelusalemi. Sunga na lulu i Wayebusi wajendeleye kwikalana hamonga ne wana wa Benyamini.

Wo mulango wa Efulayimu na wa Manase wakuyihoma Beteli

²² Wo mulango wa Efulayimu na wa Manase, wakatuluka kuyihoma Beteli, lu lulya wayicemaga Luzu.

²³ Muwaha Mulungu yakawa hamonga nawo, wakategula watandizi kwi 'kaya.

²⁴ Wakamuwona munhu wa cilume mono yalawililaga mwi'kaya, wakamuwuza wakatya, “Wucilajilaje nzila yo kwinjilila mwi'kaya, nase si cokutendela vibi yaye.”

²⁵ Hobaho yakawalajila, nawo wo mulango wa Efulayimu na wa Manase wakawawulaga wose wono wekalaga mwi'kaya. Langa munhu yu yulya, hamonga ne mhuga yakwe si wawawulaga yaye.

²⁶ U munhu yuyo yakabita sunga ko ku yisi ye Wahiti, kuko, yakazenga likaya yakalicemela litagwa lya Luzu. Lyono sunga nalu likali likucemwa Luzu.

I wanhu wono si wawingwa ne Waisilayeli mu'si

²⁷ Wo mulango wa Manase si wawawinga i wanhu wono wekalaga mu makaya ga Bete-shani, Tanaki, Doli, Ibeleyamu, na Megido, hamonga ne vitumbi vyono vyali vili behi behi nawo. Wakanani wakajendelela kwikala mumo.

²⁸ Na lono Waisilayeli wali wakondya kwinjipa no kutuga vilungo vyo wusume, wakawetumya Wakanani milimo yawo kwe vilungo. Ninga siwawawinga wose yaye.

²⁹ Nawo wo mulango wa ya Efulayimu si wawawinga Wakanani wono wekalaga mwi'kaya lya Gezeli. Holeka wakajendelela kwikalana nawo du.

³⁰ Nawo wo mulango wa Zabuloni hamba si wawawinga wakanani wono wekalaga mu makaya ga Kitiloni na Nahalole. Langa wakajendelela kwikalana nawo du ninga wawetumyaga mu milimo yawo kwe vilungo.

³¹ Wo mulango wa Asheli si wawawinga yaye i wanhu wono wekalaga mu makaya ga Ako, Sidoni, Alihabu, Acizibu, Heliba, Afeka na Lehobu.

³² Wo mulango wa Asheli wakajendelela kwikalana na wanyawusi Wakanani vyono nawo si wawawinga yaye.

³³ Nawo wo mulango wa Nafutali si wawawinga i wanhu wono wekalaga mu makaya ga Bete-shemeshi na Bete-anati. Langa wekalanaga ne wanyawusi Wakanani. Ninga wawetumyaga milimo yawo kwe vilungo.

³⁴ Waamoli langa, wakawawinga i wana wa Dani wakabita ku yisi ye matunda, hamba siwawakombola kanyhi ho wenjile mu yisi yo wuhihi yaye.

³⁵ Waamoli wakajendelela kwikala mwi'tunda lya Helesi na Ayaloni, na mu Shalibimu. Ninga wo mulango wa Efulayimu (Yusufu) na wa Manase, wawasuma, kanyhi wawatumyaga mu milimo yawo kwe vilungo.

³⁶ No mupaka we Waamoli wali wukolile mu Acilabimu, ku wulawilila ku Sela sunga ko kucanyha yayo.