Nehemiya 8 - Luganuzi Luswanu Kuli Wanhu Wose 2002

Ezila yakuwasomela wanhu wulajilize

¹ Ale, mu mwezi wo mupunghati, i wanhu wa Isilayeli, wose wali wakondya kuceha mu makaya gawo. Na mwi'zuwa lilongozi lyo mwezi wuwo, wose wakekongholela mu Yelusalemi, mu ciwanza behi no Mulango we Malenga. Wakamulomba Ezila u mukohani, u munghula wo kumanya malajilizo gono Muwaha Mulungu yawapelela Waisilayeli, muli Musa, ho yasole citabu cico co wulajilize.

² Ale, Ezila yakacileta citabu cico ha mwande ye wanhu, hono wali wekongholeye we cilume na we cicekulu hamonga ne wana wawo, wono wali wena lizika lyo wumanye no wizuce.

³ Yakasoma malajilizo gago bahalya ha ciwanza ha Mulango we Malenga. Nawo wakahuliciza. Yakanza kuwasomela, wulawa hakali mitondo sunga mu misi mugati, nawo wakajendelela kuhuliciza du, watulile viswanu.

⁴ Ezila yali yemile hacanyha ye hanhu ho kulonjela, hono hali hazenjigwe ne mabici ku soko yiyo. Awa we cilume wono watyatyizye, wakema ku lubavu lo muwoko wakwe wo kulume, Matitiya, Shema, Anaya, Uliya, Hilikiya, na Maseya. Na awa nawo, wakema ku muwoko wakwe wo kucekulu, Pedaya na Mishayeli, Malikiya, Hashumu, Hasibadana, Zekaliya na Meshulamu.

⁵ Ale, vyono Ezila yali yemile baho hacanyha, yali yejeye hali meso ge wanhu wose. Ne wanhu wose wakamuhuliciza viswanu, na hono yagubulaga citabu, wose wenukaga.

⁶ Ezila yakatya, “Muwaha Mulungu yalumbwe, u Mulungu mumi!” Nawo wanhu wose wenulaga miwoko yawo kucanyha, no kupitula wakutya, “Heya, Heya.” Wakafugama no wusu wawo wukapamiza sunga ho hasi, wakamuhemba Mulungu.

⁷ Hanyuma wakenuka wakema wima. Nawo i Walawi awa, Yeshuwa, Bani, Shelebiya, Yamimu, Akubu, Shabetayi, Hodiya, Maseya, Kelita, Azaliya, Yozabadi, Hanani na Pelayi, wakawa wo walolosi wono wawalolosezaga wanhu.

⁸ Wakawaloloseza wanhu Malajilizo go Mulungu mu nzila yono wanhu wasuma kwizuka.

⁹ Wanhu wali weza kuhulika, no kumanya vyono Wulajilize wukutya, hobaho wose wakanza kulila muno. Ale, vyono Nehemiya yali yo mulongola wa mwi'tumbi, na Ezila yali yo mukohani no munghula wo kuwumanya Wulajilize, hamonga ne Walawi wono wawalolosezaga wanhu zo Wulajilize, wakawalonjela wanhu wakatya, “Zuwali, lye zuwa lyono lyelile lyo Muwaha Mulungu, u Mulungu wenyu, holeka mulece kukalala hamba kulila.

¹⁰ Alu, muwuye ku zikaya zenyu, ho mukanoze sikukuu. Muhanje zindigwa zenyu hamonga na awalya wono wena ndigwa ndodo. Zuwali lyo lizuwa lyono lyelile kuli Muwaha Mulungu, holeka mulece kuwa no wukalale. Hambi nyemo yono Muwaha Mulungu komupelenyi, nha yomupelenyi vilungo viwaha.”

¹¹ Baho, i Walawi, wakawa kuwapilimila wanhu, wakawa kuwanyamaza, no kuwalonjela ho walece kukalala no kulila mwizuwa lili lyono lyelile.

¹² Hobaho i wanhu wakawa kuwuya ku zikaya zawo wapolile. Wakalya no kung'wa ko wusangalale wuwaha, wakahangana zindigwa ne wayawo. Hambi nha wali wakondya kuzimanya zose zono zasomwa na Ezila ha mwande yawo.

¹³ Ale, mwi'zuwa lye kejete, i walongola wose wa mu zi mhuga, hamonga ne wakohani, ne Walawi, wakamubitila Ezila, ho wakelanjize za mu Wulajilize vyono zikusaka.

¹⁴ Wakaliwona lilajilizo lyono Mulungu yawapelela wene muli Musa. Lyono likuwalajiliza wanhu wa Isilayeli, ho wekale mu vibanda mwi'zuwa lye sikukuu ye vibanda.

¹⁵ Hobaho wakapegwa wulolosezwe wono wunojeye, nawo wakawutegula hanhu hose, mu Yelusalemi, ne makaya ganji, mu yisi yose. Wakatya, “Mubite 'lu mu matunda, mukalete manhambi ge mizeyituni, ne mihadali, ne mitende, hamonga ne mabici ganji gono gakamile, ho cinozeze vibanda, nha vyono wulolose wo Wulajilize wukutya.”

¹⁶ Hobaho i wanhu wose wakalawila wakagaleta manhambi, wakawa kwizenjela vibanda mu matembe ge zikaya zawo, mu viwanza vyawo, na mu viwanza vye Nyumba yo Mulungu, na ha viwanza vya ha Mulango we Malenga, sunga na ha Mulango wa Efulayimu.

¹⁷ Wose wono wali wawuya ku wulawa ku wuhamywe, wakezenjela vibanda vyawo, wakekala mumo. Nghani ayi, lwali lo lulongozi kwitumwa mu vilo vya Yoshuwa u mwana wa Nuni. Wanhu wose wakasangalala muno, wakatuga nyemo mbaha.

¹⁸ Na ku wulawilila lizuwa lilongozi lono wayinoza sikukuu yiyi, wajendelela kusoma nondo zose citabu co Wulajilize sunga mwi'zuwa lyo mupunghati. Na mwi'zuwa lyo munana, hali howuli wuhembi wo kudumliziza, nha vyono Wulajilize watezaga.