Nehemiya 6 - Luganuzi Luswanu Kuli Wanhu Wose 2002

I walugu wa Nehemiya

¹ Sanibalati, na Tobiya, na Geshemu u Mwalabu, hamonga na wanji wa muli walugu wetu, wakahulika vyono, alu, cakondya kuzenga majinji, kanyhi musina malanga gono gakumuce. Hamba ha yiwe cali cikali nawicila milango mu winjililo.

² Baho Sanibalati hamonga na Geshemu, wakandetela baluwa, yono yasakaga citang'anile nawo, mu vikaya vya mwi'tumbi lya Ono. Ninga awu, wali wulambi du, hambi nha wasakaga ho wakanyongomeze.

³ Nane nghatuma baluwa kuli wene, nghatya, “Ane nina mulimo muwaha wono nghwituma, holeka hamba si nosuma kuza kuko yaye. Kanyhi hamba si nosuma kulecelela milimo yime, ane ho nize kumuwonenyi.”

⁴ Wandetela baluwa yine zo lucemo lulu, nane nghawagomolela lipitulo kotya lilongozi.

⁵ Hanyuma Sanibalati yakatuma mwitumami wakwe no lucemo lwe hano. Ne Baluwa yiyo, yali si ndindwe yaye.

⁶ Yatezaga, “Geshemu yakunonjela yakutya, Nghani zikulongwa muli wekalani wayetu, vyono, gwegwe ne Wayahudi wayago, muhidimbaye kuzenga majinji ga Yelusalemi, vyono mukusaka muwe muli wagaluci.

⁷ Sunga nalulu, wawawikaniza wawizi wono wakwanza mu Yelusalemi, vyono agwe yo gwegwe mono wuli mutemi wa Yuda. Ne zinghani zizi, kolonjelwa no mutemi Alitashasita. Holeka nghukusaka citang'anile, ho cilonje zinghani zizi.”

⁸ Nane nghategula lipitulo kanyhi nghamutya, “Zose zono wuzilonjile si za mbeka. Azo kulonga zako du.”

⁹ Wakajela kuciletela vimizi, no kucikabusa, ho mulimo wime. Ninga nane nghawa kumulomba Mulungu, nghatya, “Aluno go Mulungu, nghukulomba wumhele vilungo.”

¹⁰ Nane lulo, nghawa kumubitila Shemayiya, u mwana wa Delaya, u mwizukulu wa Mehetabeli, mono siyasumaga kuyileka kaya yakwe. Nayo yakanonjela yakatya, “Alu nene na gwegwe, cibite cikehundice Hanhu Hono Helile mu Nyumba yo Mulungu, cidinde ne milango, hambi awa nha wakuza kukuwulaga. Nawo wadahile kuza ne cilo mwi'zuwa lyo lyose ku wulawilila lulu ho wakuwulaje.”

¹¹ Nane namupitula nghamutya, “Ane si nili munhu mono yinojeye nhize, mbite nghehundice mu Nyumba yo Mulungu. Agwe wukwihwesa vyono nosuma kwiponya so wihundika mu Nyumba yo Mulungu? Aa ng'o. Holeka ane sinonoza nhavivyo yaye.”

¹² Nane nali neza kukondya kwihwesa muno, nhodo ho nghezuka vyono, Mulungu siyalongane na Shemaya, langa wa Tobiya na Sanibalati, wali wamufupa, ho yaze yamhele lihweso lilyo.

¹³ Wakamutuma yanyogofye ho nitume wubi, i wene ho wahodanjile lilumbo lyangu no kunhovula.

¹⁴ Hobaho kanyhi, nghawa kumulomba Mulungu nghatya, “Gwe go Mulungu, wukumbucile za wa Tobiya na Sanibalati zono wetumile, ho wuwalipicize. Wumulangaje kanyhi sunga no mucekulu yulya, Nowadiya ne wawizi wanji, wono wajela kunhajila woga.”

U mumalilizo wo mulimo

¹⁵ U mulimo wose wuketumwa vilo makumi mahano na vyejete, majinji gose gakawa gakondya. Cikawumala mulimo wuwu, mwi 'zuwa lye makumi mejete ne hano, lya mu mwezi wa Eluli.

¹⁶ I walugu wetu wa mu zinghungugo wono wali wacipilime, wali weza kuzimanya zizi, hodu wakawula vilungo, wakapuwa muno, kanyhi wakatanga vyono, u mulimo awu witumilwa mu vilungo vyo Mulungu wetu.

¹⁷ Mu vilo vivyo, Tobiya ne walongola we Wayahudi, vyeyandicilaga baluwa nyinji muno muno.

¹⁸ Wenji wa muli wanhu wa Yuda, wali wali ku lubavu lwa Tobiya, ku soko yo mukwewe Shekaniya, u mwana wa Ala. Hamonga na zizo, u mwanagwe Yehohanani, yali yatolile u mwana we cicekulu wa Meshulamu, u mwana wa Belekiya.

¹⁹ Nawo wakazilonga zinghani zakwe ziswanu hali'ne, zono yetuma, kanyhi wakamulonjela sunga ne zinghani zangu. Baho Tobiya, yakajendelela kunyandicila zibaluwa zo kujela kunyogofya.