Nehemiya 4 - Luganuzi Luswanu Kuli Wanhu Wose 2002

Nehemiya yakuyiwusa vimizi, mu mulimo wakwe

¹ Lulo Sanibalati, yali yeza kuhulika, vyono lu, co Wayahudi, cawanza mulimo wo kugenula majinji ga Yelusalemi, mwene yakakalala muno yakanza kucisekanga muno.

² Yakawa kucilonga ha mwande ye wendece wakwe, ne cipuga ce wasilikale we Cisamaliya yakutya, “Alu i wayahudi wawa, wono watimbile nhavivi wakunoza ci? Mwene wakujela kuzenga kanyhi likaya lili? Wakwihwesa so wulavya makumbiko, wowusuma mulimo wuwu mwi'zuwa limonga? Hamba wakwihwesa, vyono wadahile kugahimbula mabwe mu wulawa mumo mu malundo ge malongo, nago ninga ho gakondya kutakamila ho moto?”

³ Nayo Tobiya yali yemile behi na Sanibalati, nayo yakonjeleza yakatya, “Mwene majinjici nagwe gono wazenga? Hamba macewe du gadahile kugagwisa hasi.”

⁴ Nghawa kulomba nghatya, “Gwe Muwaha Mulungu, wuhulice ta vyono wakucisekanga. Holeka wuwalece zinzwaji zawo ziwawuyile mu mitwe yawo. Wuwalekaje wabokwe vyose, kanyhi wuwanoze wasolwe wawe wafungwa mu yisi yo wujenzi.

⁵ Wulece kuwanenela wubi wono wakucinozeza, kanyhi wulece kusemwa wubi wawo vyono wakondya kuciliga ase mono cikuzenga.”

⁶ Ho baho cikajendelela no kunozeleza majinji, nago si gatinya, gakawa gazengwa nusu yo wutali we majinji. Vyono i wanhu wose wali wena wuhile wuwaha wo kuluzenga kanyhi luzengo lulu.

⁷ Holeka Sambalati, na Tobiya ne wanhu wose wa ku Alabiya, Amoni na Ashidodi wali weza kuhulika vyono alu cikujendelela viswanu no wuzenji we majinji ga Yelusalemi, kanyhi na vyono ne mapolela ga mu majinji gali gadindwa, wene wakakomala no kukalala muno.

⁸ Hobaho wakekonghola hamonga ho waze kwihoma na Yelusalemi, ho wacipamanjize cilece kujendelela no luzengo.

⁹ Ninga cikamulomba Mulungu wetu cikawawika wasilikale wo kuwalindiliza wazenji, ku cilo na ku misi.

¹⁰ Ne wanhu wa Yuda wose wakawa na lwimbo lono wemba, lwimbo aluno. “Ase cikutimba so wudinghula mizigo mizito, malowanjila geza menji sicosuma kugawusa. Alu cogazenga wule zuwali, i majinji gaga?”

¹¹ I walugu wetu, wakehwesa nha vyono ase 'mba si cowawona, hamba kumanya zono zocijelela sunga kolo wakondya kucizumhila, no kuciwulaga, no mulimo wetu wulece kujendelela.

¹² Ninga hanji na hanji, i Wayahudi wono wekalanaga ne walugu wetu, wazaga kucisugula zo wiwikanize, wono walugu wetu wanozaga so kwihoma nase.

¹³ Hobaho nane nghawapela wanhu vitwalo vyo wulugu, mimaje, migoho no wupinde. Nghawawika nha vyono wenha mu zimhuga zawo, mu mhilimo yose ye majinji gose, mono mwali mukali nakondya.

¹⁴ Nghawona i wanhu wose, weza kogopa. Hobaho nghawalonjela wose, hamonga ne walongola wawo, ne wawaha wose nghawa kuwatya, “Mulece kuwogopa i walugu wetu, mukumbucile u wuwaha wo kogofya, wo Muwaha Mulungu wetu, alu, mwihomaje so wandugu zengu wa mu yisi na so wana wenyu, ne wagolece wenyu na ku soko ye zi kaya zenyu.”

¹⁵ I walugu wetu, wali wakondya kuhulika, vyono ase nase, cali cakondya kumanya zo wiwikanize wawo, kanyhi wakamanya vyono, Mulungu yali yakondya kuwuvyozolanga u wiwikanize wawo. Holeka ase cikajendelela du no wuzenji wetu we majinji ga Yelusalemi.

¹⁶ Wulawilila vipango vivyo i wetumami wangu, wahegawa vipuga vyejete, cipuga cimonga wakajendelela kwituma, ne cipuga ce kejete wakawa no mulimo wo kulanjilila walugu. Wali wavwalile makoti go wulugu, webate ne migoha, hamonga ne zingula no wupinde. I walongola wetu nawo, wakawataza wanhu mulimo wo kuzenga ko wuhidimbazi muno.

¹⁷ Wa walya wono wazenganga i majinji. Awalya wono waletaga vitumamilwa vyo kuzenjela, wavidinghulilaga mu muwoko monga du, akuno webate ne citwalo co kulewela ku muwoko muyagwe.

¹⁸ Nawo wono wazengaga wali wewopile mimaje mu viwino. No munhu mono yali yo mulavya citanjilo co kutowa ndulele, hono walugu waza, yali yekaye behi na nene.

¹⁹ Nghawalonjela wanhu wose, ne walongola, ne wawaha wose, nghawatya, “Umulimo wagazimha muno, sunga nalu ceza kwituma ciyagaye munhu no muyagwe, mucanyha ye majinji.

²⁰ Holeka hono muhulice ndulele yikulila, ale, wose mwikongholelaje hono hangu, u Mulungu wetu yo kocilewanila.”

²¹ Holeka nhondo zose ku wulawa hakali mitondo, sunga lono nyelezi zikwijela ne cilo, cipuga cimonga wo wetumaga mulimo wo kuzenga, ne cipuga cinji ce kejete, wakawa no mulimo wo kulanga walugu wetu, akuno webate ne migoho.

²² Lulo nghawalonjela i walongola ne watazi wawo, wabite wekale mu Yelusalemi wawe kugona baho ku cilo, ho cijendelele kulidima likaya ku cilo. Na ku misi, ciwe kujendelela no mulimo.

²³ Nane hamba sinayiwopolaga myenda yangu ku cilo. Sunga na wose nhavivyo, i wandugu zangu ne wetumami, hamonga ne walindilizi wangu. Wose cali cili meso cibate vitwalo mu mawoko getu sunga na lono cabitaga ku wunega malenga.