Nehemiya 3 - Luganuzi Luswanu Kuli Wanhu Wose 2002

Wuzenji kanyhi we majinji ga Yelusalemi

¹ Uwuzenji kanyhi lwe kejete lwe majinji ge likaya, wali wuli nhavi. Umukohani muwaha Eliyashibu, hamonga ne wanduguze wakohani, wakawuzenga mulango muwaha we zingholo, wakaweza. Wakalisimya ne lilango liwaha. Wakageza ne majinji hamonga no munala wayo wa ligana limonga, sunga no munala wa Hananeli.

² Nawo wanhu wa ku Yeliko, wakazenga ku lubavu luyagwe. Zakuli u mwana wa Imuli, nayo yakazenga lubavu lunji.

³ We mhuga ya Hasena, nawo wakawuzenga mulango we somba. Wakawicila ne micici yayo, ne milango yayo, hamonga ne vyuma ne makomeyo go kudindila lilango,

⁴ Melemoti u mwana wa Uliya, u mwizukulu kwa Hakozi, nayo yakazenga lubavu lunji. Meshulamu u mwana wa Belekiya, u mwizukulu kwa Meshezabeli, nayo yakazenga lubavu lunji. Zadoki u mwana wa Bana, nayo yakazenga lubavu lunji.

⁵ Nawo wanhu wa ku Tekowa wakazenga lubavu lwawo. Ninga i walongola wose wa mwi'kaya wakalema kuwituma mulimo wono wagawilwa ne walanjilizi.

⁶ Yoyada u mwana wa Peseya hamonga na Meshulamu u mwana wa Besodeya, nawo wakalizenga lilango liwaha lya Heshana. Wakawicila ne micici hamonga ne milango hanhu hayo wakawicila ne vyuma ne makomeyo go kudindila lilango.

⁷ Melatiya u mulawa Gibeyoni, na Yadoni, u mulawa Melonoti, hamonga ne wanhu wa Gibeyoni na Mizipa, nawo wakazenga lubavu lunji, sunga ne hanhu hono yekalaga umulongola wa ku lubavu lwe mwezi ye likolongo lya Efulata.

⁸ Uziyeli u mwana wa Halihaya, u munghula wo kuzenjela zahabu, nayo wakazenga lubavu lunji.

⁹ Lefaya u mwana wa Huli u mulongola we nusu ye litumbi lya Yelusalemi, nayo yakazenga lubavu lunji.

¹⁰ Yedaya u mwana wa Halumafu nayo yakazenga lubavu lunji, lono lwali luli behi ne kaya yakwe. Hatushi u mwana wa Hashabineya, nayo yakazenga lubavu lunji.

¹¹ Malikiya u mwana wa Halimu hamonga na Hashubu u mwana wa Pahati-mowabu wose vyono wejete, nawo wakazenga lubavu lunji hamonga no munala wo wunyanyilo.

¹² Shalumu u mwana wa Halobeshi, mono nayo yali yo mulongola we nusu ye litumbi lya Yelusalemi nayo yakazenga lubavu lunji, (i wanagwe we cicekulu wo wamutaza mulimo wuwu).

¹³ Nayo Hamuni hamonga ne wekazi wa mwi'kaya lya ku Zanowa, wakazenga u mulango we lilolo. Wakawicila ne milango, ne vyuma ne makomeyo go kudindila lilango. Wakanoza ne lijinji, wutali wa mita magana mane na makumi mane sunga wakafika ku mulango we matope.

¹⁴ Nayo Malikiya u mwana wa Lekabu, u mulongola we yitumbi lya Beli-hekelemu yakazenga mulango we matope yakawicila ne milango yayo, ne vyuma hamonga ne makomeyo go kundindila lilango.

¹⁵ Shalumu u mwana wa Coli-hoze u mulongola wa Mizipa, nayo yakazenga lilango lye mivwilo, yakaligubika, no winjililo. Yakawicila ne milango yayo, ne vyuma ne makomeyo. Kanyhi he cilamba ca Shela, yakazenga lijinji behi ne busitani yo wutemi, sunga ho ha madalaja gono gabitile mwi'kaya lya Dawudi.

¹⁶ Nayo Nehemiya u mwana wa Azibuke, u mulongola we nusu ye litumbi lya Bete-zuli yakazenga lubavu lunji, sunga i hanhu hono hali hedomile ne citenjelo ca Dawudi ne cilamba ne zinyumba zono wekalaga wasilikale.

Walawi wono wanozeleza majinji

¹⁷ Liwalo lye walawi, wono kanozeleza majinji, mu vipimha vyono vilajiywe, lyo alino. Lehumu u mwana wa Bani, yakanozeleza lubavu lunji. Hashabiya u mulongola we lipuga lya Keyila, yakanozeleza lubavu lunji, so litumbi lyakwe.

¹⁸ Bavayi u mwana wa Henadadi, u mulongola we nusu nzagwe ya Keyila, nayo yakanozeleza lubavu lunji.

¹⁹ Ezeli u mwana wa Yeshuwa, u mulongola wa ku Mizipa, nayo yakanozeleza lubavu lono lusigaye, lwa ha wuwiko we vitwalo vyo wulugu sunga kono imajinji gali gapeteye.

²⁰ Baluki u mwana wa Sabayi, nayo yakanozeleza lubavu lunji, sunga ko ku winjililo wa ko Mukohani muwaha Eliyashibu.

²¹ Melemoti u mwana wa Uliya, u mwizukulu kwa Hakozi. Nayo yakanozeleza lubavu lunji, sunga ko ku ndumilizo ye nyumba ya Eliyashibu.

Iwakohani wono wanozeleza majinji

²² I liwalo lye wakohani wono wakanozeleza majinji mu vipimha vyono vilajiywe, lyo alino. Wakohani wono wekalaga mwi'kaya lya Yelusalemi, wakanozeleza lubavu lunji.

²³ Benyamini na Hasubu, nawo wakanozeleza lubavu lunji, lono vyali vidomile ne zinyumba zawo. Nayo Azaliya u mwana wa Mesaya, u muzukulu kwa Ananiya, yakanozeleza lubavu lunji, lono vyali vidomile ne nyumba yakwe.

²⁴ Binuyi, u mwanwa wa Henadadi, yakanozeleza lubavu lunji ku wulawilila ha nyumba ya Azaliya, sunga ko ku cipeto ce lijinji.

²⁵ Nayo Palali, u mwana wa Uzayi, yakanozeleza lubavu lunji, lono lwali lwanzize ha cipeto ce lijinji sunga ko ku munala wa ha kacanyha, behi na ha wikalo wo mulindilizi.

²⁶ Pedaya, u mwana wa Paloshi, nayo yakanozeleza lubavu lunji, sunga ko ku ndumilizo yo lubavu lwe cilima, behi no Mulango we Malenga no munala wo kulindiliziza i Nyumba yo Mulungu. (Aha, hali behi muno no munala wono wacemwaga Ofeli, bahalya hono wetumami wa mu Nyumba yo Mulungu wekalaga.)

Wazenji wanji

²⁷ Wanhu wa ku Tekowa, nawo wakanozeleza lubavu lunji, ne mhelo yo munala muwaha, wo kulindiliza Nyumba yo Mulungu, sunga ko kwi'jinji behi na Ofeli.

²⁸ Cipuga ce wakohani, nawo wakanozeleza lubavu lunji, lono ludomile kusumuka ku wulawilila ha Mulango wa Fwalasi. Nawo wose wanozeleza i hanhu hono vyali vidomile ne zikaya zawo.

²⁹ Zadoki u mwana wa Imeli, nayo yakanozeleza lubavu lunji, hono vyali vidomile ne kaya yakwe. Shemayiya, u mwana wa Shekaniya, u mulindilizi wo mulango wo lubavu lwa kucilima nayo yakanozeleza lubavu lunji.

³⁰ Hananiya u mwana wa shelemiya hamonga na Hanuni u mwana wo mutandatu wa Zalafu, nawo wakanozeleza lubavu lunji. Meshulamu u mwana wa Belikiya, nayo yakanozeleza lubavu lunji, lono vyali vidomile ne kaya yakwe.

³¹ Malikiya u munghula wo kuzenga ne zahabu, nayo yakanozeleza lubavu lunji, sunga ko kwi zengo, lyono lyetumamilwaga so wetumami wa mu Nyumba yo Mulungu, hamonga ne wasuluza, lyono lyali behi no Mulango wa Hamifukadi, behi ne nyumba ya ha cipeto ce lijinji, ca ha sumuka ye kacilima.

³² Iwanghula wo kuzenga ne zi zahabu ne wasuluza, nawo wakanozeleza nusu yo mudumilizo, ku wulawilila ha nyumba ya ha cipeto, sunga ko ku Mulango we Zingholo.