Nehemiya 2 - Luganuzi Luswanu Kuli Wanhu Wose 2002

Nehemiya yakubita ku Yelusalemi

¹ Ale, yali yeza kupuluta miyezi mine, mu mwezi wono wacemwaga Nisani. Mutemi Alitashasita yali yafisa myaka makumi mejete ga mu wuteme wakwe, lulo yalizaga cinyamisi. Nghasola divayi nghawa kumupela mutemi. Nayo yali yakali nambona niwe nina wukalale, hamba mwi'zuwa linji lyo lyose, wulawa mwamulizo. Ninga mwi'zuwa lilyo, nghawa no wukalale muno.

² Hobaho yakambuza yakatya, “Gwe Nehemiya, nhawule lu wukulajila vyono wina wukalale? Nagwe ho si wuli mutamwa, ninga wukulajila nha vyono wina wukalale mu nhumbula yako.” Nane nghawa kogopa muno.

³ Ninga nghamupitula nghamutya, “Gwe Mutemi, wutemi wako wujendelele cibitilila! Alu noleka wule kukalala, lono nghuliwona likaya lyono walezi wangu wazikwa, lyaweza matongo, ne milango yalyo yaticimizwa no moto?”

⁴ Umutemi yakambuza yakatya, “Alo cicici cono wukusaka nghutendele?” Nghamulomba Mulungu wa ku wulanga.

⁵ Hanyuma, nghawa kumulonjela mutemi nghatya, “Gwe Mutemi, hono wuwe wendezwe ne zinghani zangu na kanyhi hono yiwe yikukwendeza, wumhele na yono nghusaka, ale, wunghombole mbite ku yisi ya Yuda, kwi 'kaya lyono walezi wangu wazikwa, ho nghalizenje kanyhi, likaya lilyo.”

⁶ Nayo mutemi lono yali yekaye hamonga no mugolece wakwe, wakendezwa no wulonje wangu, yakambuza yamanye nghusaka kutuluka nili na kanyhi nowuya nili, nane nghamulonjela.

⁷ Hobaho nghamulomba ho yamhele ne baluwa mbite nayo niwategulile i walongola wa ku nhumbi ye mwezi, ye likolongo lya Efulata. Yawalonjele vyono, walece kunyimila ho mhulute mbite sunga ku Yuda.

⁸ Kanyhi nghamulomba yamhele ne baluwa yinji, nimutegulile Asafu, wumulindilizi we mbago yo wutemi. Yimuloloseze, ho yamhele ne mabici go kuzenjela milango ye ligomawakali lye Nyumba yo Mulungu, ne majinji ge likaya, hamonga ne kaya yono nene nali nghekale mumo. Nayo mutemi yakamhela vyose vyono nalomba. Hambi Mulungu nha yali yali hamonga na nene.

⁹ Umutemi yakamhela ne cipuga ca wasilikale walongola mu wulugu ne cipuga ca wapanda zifwalasi ho ciwezane nawo mu muhinzo. Hobaho nghatuluka muhinzo wangu ku Efulata. Kuko nghakombola baluwa yo mutemi kuli mulongola wa kuko.

¹⁰ Ninga munhu yunji yacemwaga Sanibalati, munya Bete-holoni, hamonga na Tobiya, u mulongola wa mwi'tumbi lya Amoni, wakahulika vyono yunji kaza ho yawanozeze viswanu wanhu wa Isilayeli. Nawo wali weza kuzihulika zizo, Oo! Si wendezwa hamba hadodo.

¹¹ Nghawa kujendelela sunga ko ku Yelusalemi. Nekala vilo vidatu.

¹² Hamba sinamulonjela munhu vyono Mulungu yali yanhuma nitume ku Yelusalemi. Hobaho mu cilo mugati, nghawa kwinuka, nghalawila kunze, nghawasola wayangu wacefu, cikasola hamonga na ndogowe monga du, yono nene najendela.

¹³ Yali yikali cilo, mu vipango cono nawucila mwi'kaya no kukola mwi'lango liwaha lya mwi'lolo lya ku lubavu lwa kumwezi, hanyuma nghalanga takama, nghawa kukolela he 'sima lye lizoka, ha mulango we matope. Na lono nabitaga, nghajendelela kugalanga ne majinji ge likaya, vyono gali makumule, ne milango yayo, vyono yali miticimizwe na moto.

¹⁴ Na ku wulawilila ku lubavu lwa kucilima ye likaya, nghakolela ku lubavu lwa kusumuka, sunga ko ku mulango we mivwilo, ku cisima co mutemi. Ninga ndogowe yangu, hamba si yasuma kuwona cilejeho co kupulutila mu zinzaga, mu cizila cono cali cikoleye.

¹⁵ Baho nghajendelela, nghakola mwi'lolo lya Kidiloni, nghawa kugalanga majinji. Hanyuma, nghawa kuwuya ne nzila yono naziza, nghawa kukolela mulango wa mwi'lolo, nghawa kwinjila mwi'kaya.

¹⁶ Kwali kusina yunji mono yamanya kono nali, hamba nali kunoza cici. Muli walongola wose wa baho kanyhi nali nghali nawalonjela hamba ne wandugu zangu Wayahudi hamba kuli wakohani ne walongola, ne wawaha wose, na kuli munhu wo wose, mono yali yanojeye yawe mu mulimo wuwo wo kuzenga.

¹⁷ Hanyuma, ho nghawalonjela nghatya, “Mulanje ta, ligayo lyono cina nalyo lulu, alu, Yelusalemi lyaza yitongo, ne milango yose yahodanjika! Alu, alenyi cilizenje kanyhi likaya lili hamonga ne majinji gayo ho ciwuse cevu cetu.”

¹⁸ Kanyhi nghawalonjela na vyono Mulungu, yali yali hamonga nane, na vyono yahanzize ha mwande yo mutemi, na vyono mutemi yanonjeye. Wose wakalumbiliza, Hanyuma wakawa kutya, “Alenyi le, wose canze luzengo kanyhi.” Ho baho wakewikaniza ho wanze mulimo wo kuzenga.

¹⁹ Hobaho Sanibalati na Tobiya, hamonga no mwalabu yunji mono yacemwaga Geshemu, wakahulika zono cali calamula citume. Wakacisekanga muno muno, akuno wakutya, Alo nghanici yiyi waco yono mukwituma? Alu mbeka anye mudahile kumugaluka mutemi?

²⁰ Nghawapitula nghatya, “Muwaha Mulungu wa ku wulanga, yo kocisumila muli zose. Ase cili wetumami wakwe, nali caza kulwanza luzengo lulu. Ninga anye nha musina igawo hamba ling'ani hamba cikumbucizo mwi'kaya lya Yelusalemi.”