Nehemiya 12 - Luganuzi Luswanu Kuli Wanhu Wose 2002

Liwalo lye wakohani ne Walawi

¹ Ali lyo liwalo lye wakohani ne walawi, wono wawuya wulawa ku wuhamywe, hamonga ne Zelubabeli u mwana wa Sheyalitiyeli, hamonga no Mukohani Muwaha Yoshuwa.

² Wakohani wali awa, Selaya, Yelemiya, Ezila, Amaliya, Maluki

³ Hatushi, Shekaniya, Lehumu, na Melemoti,

⁴ Ido, Ginetoyi, na Abiya,

⁵ Miyamini, Madiya, Biliga,

⁶ Shemaya, na Yoyalibu, Yedaya,

⁷ Salu, Amoke, na Hilikiya na Yedaya. Awa, wali wo walongola we wandugu zawo wakohani, mu vilo vya Yoshuwa.

⁸ Walawi awa nawo wono watyatyizye, wali wapejigwe wulajilize wo kwimba zinyimbo zono zelile, ze lilumbo hali Mulungu. Yeshuwa, Binuyi, Kadimiyeli na Shelebiya, Yuda na Mataniya, mono yali yo mulanjilizi mu zinyimbo zo wulumbe hamonga ne wanduguze.

⁹ Awa nawo, wakanoza cipuga ce wembi, cono cembaga wedomile ne cipuga ce wayawo, wakwiboceza mu wimbe, Bakubukiya, na Uno, hamonga ne wandugu zawo Walawi.

Wityatye wa mu ndelo yo Mukohani Muwaha Yoshuwa

¹⁰ Yoshuwa yali yo mulezi wa Yoyakimu, Yoyakimu yakamulela Eliyashibu, na Eliyashibu yakamulela Yoyada.

¹¹ Yoyada yakamulela Yonazani, na Yonazani yo yamulela Yaduwa.

Walongola wa mu ndelo ze Wakohani

¹² Lulo hono Yoyakimu yali Mukohani Muwaha, awa wono watyatyize, wali wo walongola wa mu ndelo ze wakohani, nha vyono nhavi, Melaya wa mu mhuga ya Selaya, Hananiya, wa mu mhuga ya Yelemiya.

¹³ Meshulamu, wamu mhuga ya Ezila, Yehohanani, wa mu mhuga ya Amaliya.

¹⁴ Yonazani, wa mu mhuga ya Maluki, Yusufu, wa mhuga ya Shebaniya.

¹⁵ Adina, wa mu mhuga ya Halimu, Helikayi wa mu mhuga ya Melayoti.

¹⁶ Zekaliya wa mu mhuga ya Ido, Meshulamu wa mu mhuga ya Ginetomu.

¹⁷ Zikili, wa mu mhuga ya Abiya, we mhuga ya Miniyamini, Pilitayi, wa mu mhuga ya Mowadiya.

¹⁸ Shamuwa, wa mu mhuga ya Biliga, Yehonazani, wa mhuga ya Shemaya.

¹⁹ Metanayi, wa mu mhuga ya Yoyalibu, Uzi, wa mu mhuga ya Yedaya.

²⁰ Kalayi, wa mu mhuga ya Salayi, Ebeli, wa mu mhuga ya Amoke.

²¹ Hashabiya, wa mu mhuga ya Hilikiya Netaneli, wa mu mhuga ya Yedaya.

Lwandiko lwe zimhuga ze Wakohani ne Walawi

²² Lwandiko lukawikwa, lwe walongola wose we mhuga ye Walawi, na ye Wakohani, mu vilo vye Wakohani Wawaha, Eliyashibu, Yoyada, na Yonazani, na Yaduwa, mu vilo vyo mutemi Daliyo wa ku Pelisiya.

²³ I walongola wa mu mhuga ye Walawi, hamba nhavivyo, wali wandikwe mu citabu co wikumbucize, co wutemi, mu vilo vya Yonazani u mwizukulu wa Eliyashibu.

Wugawane we milimo ya mu Nyumba yo Mulungu

²⁴ Ale, so mahweso ge walongola, Hashibiya, Shelebiya, Yeshuwa, Binuyi na Kadimiyeli. I Walawi wose, wakawikwa mu vipuga vipuga, wawikwaga vipuga vyejete vyejete mu wilecele, ho vimukumye no kumulumba Mulungu, mu wutyatya wutemye wo Mutemi Dawudi munhu wo Mulungu.

²⁵ Awa wono watyatyize, nawo wali wali mu wulanjilizi we Nyumba yo Mulungu, ho walanjilile i vinyumba vyo kuwikwa viwutwa, wali wali he'lango lye Nyumba yo Mulungu, Matatiya, Bakubukiya, Obadiya na Meshulamu, Talimoni na Akubu.

²⁶ Walongola wawa, wekela mu vilo vya Yoyakimu u mwana wa Yoshuwa, u mwizukulu kwa Yehozadaki, na mu vilo vya Nehemiya u mulongola, na mu vilo vya Ezila u mukohani, u munghula we Malajilizo.

Nehemiya yakugasiwanula majinji ge Likaya

²⁷ Hobaho lono majinji ge likaya lya Yelusalemi gasiwanulwaga, wakaletwa i Walawi wono wali wekaye kunze ye likaya, ho wahangane ne wayawo mu sikukuu yiyo, no kwimba zinyimbo ze malumbo, ne zinyimbo ze misesele ne vidananda ne masumbi.

²⁸ I zimhuga ze wembi ze Walawi, zikekongholela ha Yelusalemi, ku wulawa mu vikaya, ne matumbi gono gapilime Netofati.

²⁹ Na wanji ku wulawa Betegiligali na Geba na Azimaveti.

³⁰ Wakohani ne Walai, wakeyeza weneco, hamonga ne wanhu, ne milango, sunga ne majinji ge likaya.

³¹ Nghawakongholela walongola wose wa Yuda, mucanyha ye majinji, nghawagawa vipuga vyejete, nghawawika wawe walanjlizi we mapuga mejete mawaha ge wanhu, nghawalajiliza wajende mumo mucanyha ye majinji, wapilime likaya lyose, ho wamupele Mulungu yilumbo. Lipuga lilongozi, likakola ku lubavu lo kulume, likujenda mucanyha ye lijinji, sunga ko ku mulango we Matope.

³² Hoshaya yali yali mu nyuma ye wembi, hamonga ne nusu ye walongola wa ku Yuda.

³³ I wakohani awa nawo wono watyatyizye aha, wo watowaga zi ndulele, nawo wali wali mu nyuma ye lipuga: Azaliya, na Ezila, Meshulamu,

³⁴ Yuda Benyamini na Shemaya na Yelemiya.

³⁵ Hanyuma yakatyatya Zekaliya u mwana wa Yonazani, u mwizukulu kwa Shemaya. (Hamonga ne walezi wawo, Mataniya, Mikaya na Zakuli wa mu mhuga ya Asafu).

³⁶ Waketyatya na wanji wa muli wanduguze, Shemaya, Azaleli, Milalayi, Gilalayi na Mayi, na Netaneli, Yuda na Hanani, awa wose, wali wadinghuye viya vyo kwimbila, vyono vyali vinha vyono yetumamilaga mutemi Dawudi, u munhu wo Mulungu. Ezila nayo u munghula, yakalilongoza lipuga lili mu wujende.

³⁷ Wulawa ku Mulunga we Mivwilo, wakabita wakakolela mu zi ngazi zono zibitile sunga ko kwi'kaya lya Dawudi lyo wutemi. Wakakolela sunga he'kulu lyo mutemi Dawudi. Hanyuma, wakawa kuwuya, sunga ko ku Mulango we Malenga, ku lubavu lwa kucilima ye likaya.

³⁸ Lipuga linji lya awalya wono walavyaga lilumbo, wakadoma lubavu lo kucekulu, mucanyha ye majinji. Nane, nghawatyatya, hamonga ne nusu ye lipuga lye wanhu. Cikajendelela sunga ko ku Munala wo wunyanyilo mwi'jinji ligazi.

³⁹ Na mu wulawa baho, cikakolela ha Mulango wa Efulayimu, no Mulango wa Yeshana, no Mulango we zisomba no Munala wa Hananeli, no Munala wa Hameya, sunga ko ku Mulango we Zingholo. No wupilime wetu, wukamalicila behi no mulango we Nyumba yo Mulungu.

⁴⁰ Hobaho i vipuga vyose vyejete, vyono vyapilimaga no kumupela Mulungu lilumbo, vyose vikafika ha ciwanza ce Nyumba yo Mulungu.

⁴¹ Iwalongola wono napilimana nawo nene, cali cili hamonga ne lipuga lyangu, hamonga ne Wakohani wono atowaga ndulele, Eliyakimu, Maseya na Miniyamini, Mikaya na Eliyowenayi, Zekaliya na Hananiya.

⁴² Waketyatya na Maseya, Shemaya na Eleyezali. Uzi na Yehohanani, Malikiya, Elamu na Ezeli. Ne wembi wono wali wena na Yelahiya, wembaga kwe mazi mawaha muno muno.

⁴³ Mwi'zuwa lilyo, makumbiko menji gakalavywa ne wanhu wali wena nyemo mbaha, hambi Mulungu nha yo yawapela wusangalale wuwo. We cicekulu ne wana wao, wose wakelunza mu sikukuu yiyo, ne lizozo lye nyemo lyono lyali baho ha Yelusalemi, lyali yiwaha muno muno.

Vilavywa so wuhembi, mu Nyumba yo Mulungu

⁴⁴ Mwi'zuwa lilyo, wanhu wakawikwa, ho wawe walanjilizi we vinyumba vyo kuwika viwutwa vya mu Nyumba yo Mulungu, mono vyawikwaga vyose, hamonga ne zaka, ne malimbuko go wuhemba, ne mikalo, i vilongozi kupya mu migunda yawo myaka yose. Walindilizi wawa, wakapegwa mulimo wo kuvikonghola mu migunda ya mu vikaya ne matumbi gono gapilime, i vilavywa vye Wakohani ne Walawi nha vyono winha wulajilize. I wanhu wose wa Yuda, wendezwa muno no witumami we Wakohani ne Walawi.

⁴⁵ Vyono wali wakamise zo wunoza zi sikukuu zo wiyeze, hamonga no wityatye wunji wo wuhembi, nha vyono Mulungu yawalajliza. I wembi wa mu Nyumba yo Mulungu, hamonga ne walindilizi, nawo waketuma milimo yose, nha vyono winha wulajilize wo mutemi Dawudi, hamonga no mwanagwe Solomona.

⁴⁶ Wulawilila mu vilo vyo mutemi Dawudi, no mulongola we wembi Asafu, mu vilo vye katali, i wembi wembaga zinyimbo zo lukumyo na ze lilumbo kuli Mulungu.

⁴⁷ Na mu vilo vya Zelubabeli na Nehemiya, Waisilayeli wose, walavyaga nhondo zose vipegwa so wembi wa mu Nyumba yo Mulungu, hamonga ne walindilizi we Nyumba yo Mulungu. Kanyhi wanhu wakalavya vilavywa vyono vyelile kuli Walawi, nawo i Walawi wakawapela Wakohani yigawo lyono lyali liwanojeye wapegwe.