Nehemiya 11 - Luganuzi Luswanu Kuli Wanhu Wose 2002

Wanhu wono wekalaga mu Yelusalemi

¹ Walongola wose, wakekala mu Yelusalemi, i wanhu wanji wose, wakatowa kula, ho yihagulwe mhuga monga monga, mu wulawa mu mhuga yikumi yikumi, waze wekale mwi'kaya lyono lyelile lya Yelusalemi. Na wono wosigala, wajendelele kwikala mu makaya ga mu matumbi gawo.

² I wanhu wakawalumba muno wanhu wose, wono welavya weneco kwe nhumbula yo welecele, ho wakekale mu Yelusalemi.

³ Mu makaya ganji ne matumbi ganji, i wanhu wa Isilayeli hamonga ne wakohani ne Walawi, ne wetumami wa mu Nyumba yo Mulungu, hamonga ne wetumami, ne wetumami we wana wa Solomona, awa wose, wekalaga hanhu hawo, mu matumbi gawo. Liwalo lye walongola, wono wekalaga mu Yelusalemi, likaya lyono lyelile, wono wali wo walongola we wanhu, wono wekalaga mu matumbi ga Yuda, lyo alino.

⁴ Cipuga ca wo mulango wa Yuda. Mhuga ya Ataya, u mwana wa Uziya, u mwizukulu kwa Zekaliya. Hamonga na wanji wa muli walezi wawo, na Amaliya, na Shefatiya, na Mahalaleli, na we zindelo ze wana wa Yuda u mwana wa Pelezi.

⁵ Maseya u mwana wa Baluki, u mwizukulu kwa Kolihoze. Hamonga ne wanji wa muli wasogo zawo, na Hazaya, na Adaya, na Yoyalibu, hamonga na Zekaliya, na we zindelo ze wana wa Yuda u mwana wa Mushiloni.

⁶ Ne zindelo ze wana wa Pelezi, wali waficile wanhu magana mane na makumi mutandatu na munana, wono wekalaga mu Yelusalemi.

⁷ Cipuga ca wo mulango wa Benyamini. Yali Salu u mwana wa Meshulamu, u mwizukulu kwa Yowedi. Hamonga ne wanji wa muli walezi wawo, na Pedaya, na Kolaya, na Maseya, na Itiyeli, na Yeshaya.

⁸ Ne wana wa Gabayili na Salayi, i wandugu zawo we behi na Salu. Mhuga yose ya wo mulango wa Benyamini, wali waficile wanhu magana yicenda na makumi mejete na munana, wono wekalaga mu Yelusalemi.

⁹ Na Yoeli u mwana wa Zikili, yali yo mulongola wawo. Nayo Yuda u mwana wa Hasenuwa yali yo mulongola mutazi wa mwi'kaya liwaha lya Yelusalemi.

¹⁰ I cipuga ce Wakohani, yali Yedaya u mwana wa Yoyalibu, na Yakini.

¹¹ Selaya u mwana wa Hilikiya. U mwizukulu kwa Meshulamu. Hamonga ne walezi wawo, na Zadoki, na Melayoti, na Ahitubu, mono yali yo mukohani muwaha.

¹² Liwalo lyawo, wali waficile magana munana na makumi mejete na wejete, wono wetumaga mu Nyumba yo Mulungu. Na Adaya u mwana wa Yelohamu, u mwizukulu kwa Pelaya. Hamonga ne walezi wawo, na Amuzi, na Pashuli na Malikiya.

¹³ Nawo wali waficile magana mejete na makumi mane na wejete, cipuga co lulelo lulu, wono wali wo walongola wa mu zimhuga zawo. Na Amashayi u mwana wa Azaliyeli, u mwizukulu kwa Ahizayi. Ne walezi wawo, hamonga na Mashilemoti, na Imeli.

¹⁴ Wali waficile wanhu yigana limonga na makumi mejete na munana, mu mhuga yiyo, wono wetumaga kotya wasilikale. Nayo Zabudiyeli yali yo mulongola wa mu mhuga yawo.

¹⁵ Cipuga ce Walawi: Yali Shemaya u mwana wa Hashubu, u mwizukulu wa Azilikamu. Ne walezi wawo, hamonga na Hushabiya na Buni.

¹⁶ Shebetayi na Yozabadi, i Walawi, wono wali wamanyice, mu mulimo wo wulanjilizi we milimo ya kunze ye Nyumba yo Mulungu.

¹⁷ Hamonga na Mataniya u mwana wa Mika, u mwizukulu kwa Zabudi we ndelo ya Asafu. Nayo yo yali yo mutonji, we cipuga ce wembi wa mu Nyumba yo Mulungu, u wimbe wawo, wo kwimba zinyimbo zo wuhembi, na zo wulavye na zo wulumbe. Na Bakubuke yali yo mutazi wa Mataniya. Abada u mwana wa Shamuwa, u mwizukulu kwa Galali, we ndelo ya Yedutuni.

¹⁸ Liwalo lye Walawi wose, wono wekalaga mwi'kaya lyono lyelile lya Yelusalemi, wali waficile wanhu magana mejete na makumi munana na wane.

¹⁹ Cipuga ce Walindilizi we Nyumba yo Mulungu: Yali Akubu, na Talimoni, hamonga ne wandugu zawo, nawo wali waficile wanhu yigana limonga na makumi mupunghati na wejete.

²⁰ Wanji nawo wa mu wanhu wa Isilayeli, hamonga ne wakohani, ne Walawi, wono wasigala, wakekala hanhu hawo mu matumbi ne makaya ga Yuda.

²¹ Iwetumami wa mu Nyumba yo Mulungu wekala he'tumbi lye behi na Yelusalemi, lya Ofeli, nawo wetumaga hasi yo wulanjilizi wa Ziha na Gishipa.

²² Umulanjilizi we Walawi, wono wekalaga mu Yelusalemi, yali Uzi u mwana wa Bani, u mwizukulu kwa Hashabiya, ne walezi wawo, hamonga na Mataniya na Mika, nayo yali we mhuga ya Asafu, mhuga yono yali yina wutonji, no witumami wuswanu wo kwimba zi nyimbo mu Nyumba yo Mulungu mu wuhembi.

²³ Wulajilize wo mutemi, wo walajilaga i mhuga ye wembi, yono yasakwaga nhondo zose wembe zinyimbo ko wilecele mwi'zuwa ne 'zuwa mu Nyumba yo Mulungu.

²⁴ Na Petaliya u mwana wa Meshezabeli wa mu mhuga ya Zela wa mu mulango wa Yuda, yali yo wakili wo mutemi, mu zinghani zose ze wana wa Isilayeli, mwi'kulu lyo mutemi wa Pelisiya.

I wanhu wa mu makaya, ne matumbi ganji

²⁵ Wenji wa muli wanhu, wekalaga mu matumbi ge behi ne migunda yawo. Na wono wali wo mulango wa Yuda, wekalaga ku Kiliyati-aleba, na Diboni, na Yekabuzeli, na mu vitumbi vye behi ne makaya gago.

²⁶ Hamonga na mu makaya ga Yeshuwa, na mu Molada, na Betupeleti,

²⁷ na ku Hazali-shuwali, na mu Beli-sheba na mu vitumbi vyono vipilime.

²⁸ Wekalaga mwi'kaya lya Zikilaji, mu Mekona, ne vitumbi vyayo.

²⁹ Na mu Ene-limoni, na mu Zola, na mu Yalemuti,

³⁰ na mu Zanowa, na mu Adulamu, na mu vikaya vyono vilibehi ne matumbi gago. Wekalaga mu Lakishi behi ne migunda, na mu Azeka ne vitumbi vyayo. Wo wutya, wanhu wa Yuda, wekalaga mu yisi ya haciligati ya Beli-sheba, lubavu lwe takama ne lilolo lya Hinomu ku lubavu lwe sumuka.

³¹ Nawo i wanhu wo mulango wa Benyamini, wekalaga ku Geba, na ku Mikimashi, na ku Ayi, na ku Beteli, na mu vitumbi, vye behi behi ne matumbi gago.

³² Na Anatoti, Nebu, na Ananiya,

³³ Hazoli, Lama, na Gitayimu,

³⁴ Hadidi, Zebayimu, na Nebalati,

³⁵ Lodi na Ono, na mwi'lolo lye Wanghula.

³⁶ Wanji nawo wa mu cipuga ce Walawi, wono wekalaga mu yisi yiyo ya Yuda, wakelumbaniza ho wekalane ne wanhu wo mulango wa Benyamini.