Nahumu 3 - Luganuzi Luswanu Kuli Wanhu Wose 2002

¹ Woyi hee likaya lyono limemile wuwulaji, limemile wulambi no wugoli wono lisawiye mu nzila yo wuhizi!

² Muhulice ta, mazozo ge mililo ye mizipo, ne mazozo ge maguludumu, hamonga ne zifwalasi zono zikubita zikumangha muno muno, hamonga ne nyhinyinho ye matuka go wulugu!

³ Iwajendela zifwalasi wakubita lumangho, ne mimaje yawo ne migoha yawo yikung'alala! Mivimba yilundile malundo mawaha, ne miwili ya wono wafwiye yisina hamba yiwalo, wanhu wakwikobala mucanyha ye mivimba!

⁴ Ninawi u musenyha yakondya kulipicizwa. Hambi nha yakwendezwa no wuwulaji, mono yakugakwega makungugo no kugatajila mu wuwanda.

⁵ U Muwaha Mulungu we Mihanga yakutya, “Ane nokwisumaniza nagwe go Ninawi! Kanyhi nokuvula ne myenda wikale cipwi, ne makungugo gakuwone vyono wuli cipwi, ne matemi gakuwonele mu cevu cako.

⁶ Nane nokunoza wuwe cinhu cono cibedegaywe, kanyhi wuwe wuli cinhu cavu, ne wanhu wokulanga ko woga.

⁷ Na wose wono wokuwona, wotiza, akuno wakutya, ‘Ninawi yili mu wuhodangwe! Alu nani 'mbi mono koyiwonela lusungu? Hamba nani lo mono kosuma kuyisindamika?’ ”

⁸ Ninawi, alo agwe wuli mutelevu kuciza Tebesi likaya liwaha lya Misili? Lyono lipilimwe ne makolongo ho galicitile nhe 'jinji. Ne likolongo lya Nile, likawa yo ngula yalyo.

⁹ Yakazitema Kushi na Misili, hakawa hasina mupaka mu wutemi wakwe. Na Libiya nayo vikawa vihulice.

¹⁰ Ninga wanhu wa No-amoni, wategulwa kutali ku wuwanda. Na mu zinhuzi zose ze zinzila, wana wawo watowangwaga sunga wafwa. Ne walongola wawo wose wasolwa, akuno wawopwe ne manyolo, wakawa kugawana wanya kuwateka.

¹¹ Ninawi, nagwe kogala sunga mahala gajilile! Kanyhi kojela kwiponya ku wulawa kuli walugu wako.

¹² Ne magomawakali gako gose, gowa nha mikuyu yono yina mana gono gapiye. Agwe wuyisinjisaje mibici du, kowona mana gakugwila mu mulomo wako!

¹³ Hambi wasilikale wako wo wulugu, nha weza nha wacekulu, ne yisi yako yeza yisina mulindilizi ha mwande ye walugu wako. No moto wogahodanga macuma gono wugapinjice mu malango ge likaya lyako.

¹⁴ Holeka muwikanize malenga menji, mwiwikanize so wulugu wono wukuza. Kanyhi musikamye ne magomawakali genyu! Mutiwe lilongo, muwumbe matofali, ho muwe ne matofali gono mawumbile lukulu.

¹⁵ Ninga, hamba wunoze vyono konoza, vyo kokongogwa du mu moto sunga wufwe, hamba kowulagwa ku wulugu. Nagwe kowusizwa lukulu nhe vilimwa vyono vilijigwe ne zinzije. Mwali monjelezeka mweza muli wenji nhe zinzije!

¹⁶ Wukawonjeleza ne wakwawi wako wawe wenji, kuciza zinyelezi za ku wulanga! Ninga 'lu, wakondya kubita, nhe zinzije zono zitandakulaga mabawa no kuguluka.

¹⁷ I walongola wako wenha matewa ge zinzije zono zicehile mu majinji mwi'zuwa lye mbeho nghali. Ninga lizuwa kolo likuwalika, zikuguluka no kubita, hamba hasina yunji mono yakumanya na kono zibitile!

¹⁸ Gwe go mutemi wa Ashuli, walanjilizi wako wakondya kufwa, ne wawaha wako we lilumbo wagona cibitilila! Wanhu wako weyagaye mu matunda, hasina hamba munhu mono kowagomola kanyhi ku zi kwawo.

¹⁹ Kusina kanyhi hamba miti yono yowupoza wusungu wako, ne zinghomele zako sizikusumika hamba kuwunoje yaye. Na wose wono wohulika zo wuhodangwe wako, mbeka wotowa maganza gawo so nyemo. Hambi nani mono yelega no wukali wako wono wusina ndumilizo?