Nahumu 2 - Luganuzi Luswanu Kuli Wanhu Wose 2002

U wugwe wa Ninawi

¹ Gwe Ninawi, alu weza wuli mu wuhomwe! Ne vilungo vyono vyokubenanjiza vyakondya kuza. Holeka 'lu wulidimaje likaya lyako! Wuzilanjilile ne zinzila zako! Wiwikanize so wihomi! Wime wukamile!

² (U Muwaha Mulungu kolugomola lukumyo lwa Isilayeli nha vyono lwali, lono walugu wali wakali nawateka.)

³ I wasilikale walugu, wadinghuye ngula ndunghu, kanyhi wavwalile myenda midunghu, wakwiwikaniza wamuhomenyi! Ne mituka yawo yo wulugu, yikulipuka nha moto. Ne zifwalasi zawo, zikuzumha-zumha muno.

⁴ Ne mituka yawo yo wulugu, yikumangha mangha musunho mu zinzila, yikumangha ako na ako mu zinhuzi ze likaya. Kanyhi yikwaka kotya toci, no kwijela musunho kotya mamuli.

⁵ Yakuwakumbucila wanhu wakwe we lilumbo, wakwikobala mu njenda yawo lono wakwiyoha. Nawo wanya kuwahoma, wakumanyhila musunho mu majinji, no kuwikaniza zi ngula, so kwicita no wulugu.

⁶ Ne milango ya kwi'kolongo, yadiguka, nalyo likaya lyo wutemi limemile wogofye.

⁷ Likaya lyekala lili bwete, i wanhu wayo wakondya kusolwa mateka, ne wetumami wakwe we cicekulu wakulila kotya mazi ga nghunda, no kwitowa-towa mu zimhambaga so wusungu.

⁸ Wanhu wakumangha musunho ku wulawa Ninawi nhe malenga gono gakulawa mwi'lamba lyono lyaponghola. Ne lizi likucemeleza likutya, “Mwime! Mwime!” Ninga hasina hamba yunji mono yakwilenga ku nyuma.

⁹ Musole ngaluzi ze zifweza! Solenyi ngaluzi ze zahabu! Hambi likaya nha limemile viwutwa!

¹⁰ Ninawi yahodangwa nha vyono yali yinojeye, alu yekala nyhiwa. Ne zinhumbula ze wanhu wayo, zenjilwa no woga, ne mafugamilo gawo gakucicima, ne vilungo vyeza musina, no wusu wawo wawomba so woga.

¹¹ Alu lili hayi likaya, lyono lyali linha wikalo wa simba, ne hanhu hono wana we simba wakuliswa, i hanhu hono simba nume ne simba nyhekulu zobita, hamba zinyana zayo hono zowa zikaye zipolile?

¹² Simba yawulaga mapelembo gayo, yalupulanga mhonje mhonje so wagolece wakwe na so wanagwe. Yamemya nyama ye mapelembo gayo mu wikalo wayo.

¹³ Muwaha Mulungu we Mihanga yakutya, “Ane nili mulugu wako, nane nogakongoga matuka gako go wulugu. Ne wasilikale wako wolowulagwa ku wulugu, nane novisola vinhu vyose vyono wavisola ku wulawa kuli wanhu wanji. Ne mazi ge wetumami wako, hamba sigolohulikwa kanyhi yaye.”