Mwamulizo 9 - Luganuzi Luswanu Kuli Wanhu Wose 2002

I cilagane co Mulungu na Noha

¹ U Mulungu yakawalugutiza Noha ne wanagwe, yakawatya, “Ale, mwilele mwinjipe muno muno, no kuyimemya yinze.

² Ne vilimu vyose, ne zindeje zose zono zikwanga mucanyha, ne viwumbwa vyose vyono vitambalaga hasi, hamonga ne zisomba zose, vivyo vyose vyowa vina woga vikumogopenyi nyenye. Hambi vyose vivyo nha mwapegwa, navyo vili mu miwoko yenyu.

³ Ne vilimu vyose i vyumi, avyo vyowa yo ndigwa yenyu, nha vyono namupelenyi vilimwa yiwe yo ndigwa yenyu.

⁴ Langa mulecele lukulu kulya nyama yono yina ne sakami yayo, vyono wumi wuli mumo mu sakami.

⁵ U munhu wo wose mono kowulaga munhu muyagwe, yuyo nayo kolipicizwa. Kanyhi nowulipiciza ko wuwulagwe, u mutugo wo wose wono wowulaga munhu.

⁶ “Hambi u munhu nha yawumbwa ku futa yo Mulungu. Holeka munhu wo wose mono komuwulaga munhu, u munhu yuyo nayo kowulagwa na munhu muyagwe.”

⁷ “Holeka anye mwilele mwinjipe, mwilele ko winji sunga muyimemye yinze.”

⁸ Kanyhi Mulungu yakawalonjela Noha ne wanagwe yakatya,

⁹ “Aluno nghunoza cilagane cangu na nyenye hamonga no lulelo lwenyu lwa hanyuma yenyu,

¹⁰ kanyhi na kuli viwumbwa vyose vyumi, ne zindeje, ne zi mitugo, ne vilimu vyose vya mu mbago, vyose vyono vilawiye mu Safina, hamonga nanye.

¹¹ Ane nghucikangaza i cilagane cangu na nyenye, nha vyono si nolokongomezeza lukulu kanyhi kwe lihwazi lye malenga i viwumbwa vyumi, hamba lihwazi lye malenga si lilejelela lukulu kanyhi ho lyongomeze yinze.

¹² Na acino co citanjilo ce cilagane cono nghuciwika muli'ne na nyenye, hamonga ne viwumbwa vyumi vyose vyono vili hamonga na nyenye, sunga ku zindelo zono zikuza hanyuma.

¹³ Ane nghuwika licilalyambwa lyangu mwi'vunde, nalyo lyowa co citanjilo ce cilagane cangu ca kuli'ne ne yinze.

¹⁴ Na mu mapango go gose, lono noyigubiciziza yinze ne mavunde, nalyo licilalyambwa kolo likwijela mu mavunde,

¹⁵ ale baho nane nocikumbucila i cilagane cangu ca kuli'ne na nyenye, hamonga ne viwumbwa vyose vyumi.

¹⁶ Nalyo lilyo licilalyambwa, kolo lyejela du mu mavunde, nane noliwona, no kukumbucila kamonga i cilagane cico ce cibitilila cono cili kuli'ne ne viwumbwa vyose vyumi.

¹⁷ Na cico co citanjilo ce cilagane cono nakondya kuciwika kuli'ne ne viwumbwa vyose vyumi vyono vili mono'nze.”

Noha ne wanagwe

¹⁸ I wana wa Noha wono walawila mu Safina, wali wa Semu na Hamu na Yafeti. Hamu yakawa yo sogwe wa Kanani.

¹⁹ Na wawo wo wana wa Noha, wono ku wulawilila muli wene, i wanhu wakatandala mu yinze yose.

²⁰ Nayo Noha, yali mulima migunda mono, nayo yali yo munhu mulongozi wo kulima no mugunda we mizabibu.

²¹ Na lono yali yaying'wa divayi no kugala, hodu yakawa kugona mwi'hema lyakwe yali cipwi.

²² Nayo Hamu u sogwe wa Kanani, yakaciwona i cipwi co sogwe, hanyuma yakawa kubita kunze, yakawa kuwalonjela wawalya i wanduguze wejete wa Semu na Yafeti.

²³ Nawo wa Semu na Yafeti, wakawa kusola mwenda, wakawutandakula wakawa kuwutandaza mu mawega gawo. Wakawa kubita cinya mugongo, no kumufunika u sogo yawo. Hamba si wenda no kumulanga u sogo yawo, hamba ne cipwi co sogo yawo, si waciwona yaye.

²⁴ Nayo u sogo yawo yali yeza kwenzeluka mu wugale wakwe, no kumanya vyono yamutendeye u mwanagwe mudodo,

²⁵ hobaho yakawa kutya, “Kanani yalijitwe! Nayo kowa muwanda kuli wanduguze.”

²⁶ Kanyhi yakatya, “Nayo Semu, u Mulungu wangu yamulugutize Nayo Kanani yaweze muwanda wa Semu.

²⁷ U Mulungu yamonjeleze Yafeti Nayo yekale mu mahema ga Semu. Nayo Kanani yaweze muwanda wa Yafeti.”

²⁸ Ne lihwazi lye malenga lyali lyeza kupuluta, Noha yakekala myaka magana madatu na makumi mahano,

²⁹ Nayo yakafwa yena myaka magana yicenda na makumi mahano, ga mu wikale wakwe wa mono'nze.