Mwamulizo 8 - Luganuzi Luswanu Kuli Wanhu Wose 2002

Wunyale we lihwazi lye malenga

¹ U Mulungu yakamukumbucila Noha, hamonga ne vilimu vyose vyono vyali vili hamonga nayo mugati ye Safina. Mulungu yakaleta mbeho mbaha muno muno mono'nze, ne malenga gagalya gakawa kwanza kucepuka.

² Ne mivwilo yose yono yalawaga hasi muno muno ye yisi, hamonga ne madilisha gono galetaga malenga ku wulawa ku wulanga, vyose vikadindwa. Sunga ne mvula nayo yikawa kuleka kutonya,

³ ne malenga nago gakawa kujendelela kucepuka mhola mhola mono'nze. Na vyali vyeza kupuluta vilo yigana limonga na makumi mahano, hodu malenga gakawa gakondya kucepuka muno muno.

⁴ Na mwi'zuwa lye likumi na mupunghati, lya mu mwezi wo mupunghati, safina yikawa kutima mucanyha ye litunda limonga lya mu matunda ga Alalati.

⁵ Ne malenga nago, gakajendelela kucepuka du mhola mhola, na mwi'zuwa lilongozi lya mu mwezi we likumi, i vizuli vye matunda vikawa kwanza kwijela.

⁶ Navyo vyali vyeza kupuluta vilo makumi mane, Noha yakawa kulidigula lidilisha lye Safina,

⁷ yakalilavyaniza lihowe kunze ye Safina, nalyo lihowe lilyo, hamba silyawuya kanyhi mu safina ng'o. Langa likajendelela kuguluka du ako na ako, sunga lono malenga ganyalila mono'nze.

⁸ Hanyuma, Noha yakayilavyaniza nziwa, ho yisume kuwona hono malenga gawe gakondya kucepuka.

⁹ Ninga vyono malenga gali gakali gayifunicize yinze yose, nziwa yiyo hamba siyasuma kuhatuga hanhu hono yosuma kutima yaye, holeka yikawa kumuwuyila kanyhi Noha mu Safina. Nayo Noha yakawugolola muwoko wakwe, yakayisola, no kuyiwika mugati ye Safina.

¹⁰ Nayo Noha, yakalindila kanyhi vilo mupunghati, yakayilavyaniza kanyhi nziwa yiyilya.

¹¹ Nayo nziwa yiyo, yikamuwuyila kanyhi Noha mu Safina mu cipango ca saa ze cinyamihe, akuno yilumile ne linhambi lyo muzeyituni, mu mulomo wayo. Holeka Noha yakamanya vyono malenga gakondya kucepuka mono'nze.

¹² Hanyuma yakalindila kanyhi vilo mupunghati vinji, yakayilavyaniza kanyhi nziwa yiyilya. No muhinzo wuwuno nziwa yiyo hamba siyamuwuyila kanyhi yaye.

¹³ Nayo Noha lono yali yaficila myaka magana mutandatu na wumonga, mwi'zuwa lilongozi lya mu mwezi mulongozi, malenga ge lihwazi, gakawa gakondya kunyalila lukulu mono'nze. Nayo Noha yakawa kucigubula cigubicizo ce Safina, nayo yali yeza kulanga kunze ye Safina, yakawona vyono yinze yakondya kunyala.

¹⁴ Na mwi'zuwa lye makumi mejete na mupunghati lya mu mwezi we kejete, yinze yali yakondya kunyalila lukulu.

¹⁵ Hobaho Mulungu yakawa kumulonjela Noha yakatya,

¹⁶ “Ale, wulawile mu Safina, gwegwe no mugolece wako, hamonga ne wanago wose ne wagolece zawo.

¹⁷ Wulavyanize vyose, zindeje zose, ne vilimu vyose, hamonga ne viwumbwa vyose vyono vitambalaga hasi, ho visume kwilela muno, no kwinjipa no kuhweguka kono'nze.”

¹⁸ Hodu, Noha yakawa kulawila, mweneco, no mugolece wakwe, ne wanagwe hamonga ne wagolece zawo,

¹⁹ ne vilimu vyose vya mu mbago, ne viwumbwa vyose vyono vitambalaga, hamonga ne zindeje zose, sunga ne vilimu vyose du i vyumi vya mono'nze, vyose vivyo, vikalawila mu Safina nha vyono vinha mu zimhuga zavyo.

Noha yakukumbika

²⁰ Nayo Noha yakamuzenjela u Muwaha Mulungu cikumbicilo, yakawa kusola i vilimu vyose vyono vyelile vye mawala gose, ne zindeje, yakawa kuvilavya vilavywa vinyanywe mu wukumbicilo.

²¹ Ne mhunjile swanu ye vilavywa vivyo, yikamwendeza muno u Muwaha Mulungu, nayo Muwaha Mulungu yakatya mu nhumbula yakwe, “Hodu, hamba si nilayihodanjila lukulu yinze kanyhi, ku soko yo munhu, hambi nha nakondya kumanya vyono i mahweso go munhu, nha mabi du ku wulawa wudodo wakwe. Hamba si novyongomezeza lukulu kanyhi i viwumbwa vyose, nha vyono nozize.

²² Na mu mapango gose lono yinze yowa yikali, i madaha go kuhadika zimbeyu, no kududula, i madaha ge mbeho ne livuce, ne madaha ge cibahu ne cifuku, ne madaha ge misi ne cilo, hamba si vyoduma yaye.”