Mwamulizo 50 - Luganuzi Luswanu Kuli Wanhu Wose 2002

¹ Hobaho Yusufu, yakawa kwigumila mucanyha yo sogwe, akuno yakulila no kumunonela.

² Hanyuma yakawa kuwalajiliza waganga wamubace sogwe Isilayeli miti, ho yalece kuwola, nawo waganga wakanoza nhavivyo.

³ Nayo nha vyono yinha, vikasakwa vilo makumi mane so mulimo wuwo du. Ne Wamisili nawo, wakamulilila Yakobo, vilo makumi mupunghati.

⁴ Vyaza kupuluta vilo vyo kumulilila. Yusufu yakawalonjela we mhuga ya Falawo, yakatya, “Hono niwe nghuvumilwa ha mwande yenyu, ale dedede, mubite mukanonjele kwa Falawo vyono, baba yanyilahiza yakatya,

⁵ ‘Ane neza nili behi no kufwa. Holeka wunojeye wubite wukanzice mu citenjelo cono nenozeza nene no mweneco, mu yisi ya Kanani.’ Holeka aluno nghumunena yanghombole mbite nghamuzice baba, hanyuma nowuya.”

⁶ Nayo Falawo yakatya, “Ale, du wubite wukamuzice sogo, nha vyono yakwilahiza.”

⁷ Hodu, Yusufu yakawa kutuluka ku wubita kumuzika sogwe, na wetumami wose wa Falawo, ne wanyamhala we nyumba ya Falawo, hamonga ne wanyamhala we yisi yose ya Misili, wose wakabitana nayo.

⁸ Kanyhi Yusufu vikabitana hamonga ne mhuga yakwe yose, wanduguze, ne mhuga yose yo sogwe Yakobo. Mu yisi ya Gosheni, wasigala wo wana wadodo du, hamonga ne zingholo, zimhene, ne zing'ombe zawo.

⁹ Sunga ne wapanda zifwalasi hamonga na we matuka go wulugu wose vikabitana. Oo! Lyali yipuga yiwaha muno muno.

¹⁰ Nawo wali weza kufika mu cuga co wuhemba ca Atadi, ku nhumbi ye likolongo lya Yoludani, wakalila muno ko wukalale wuwaha, nayo Yusufu yakamulilila sogwe vilo mupunghati.

¹¹ Nawo wanyawusi wa mu yisi yiyo, Wakanani, wali weza kuhulika cililo mu cuga ca Atadi, wakatya, “Cililo cici ca Wamisili, na mbeka cililo ciwaha muno muno!” Holeka hanhu baho hakacemwa Abeli-misila-yimu, naho baho hali ku nhumbi ya Yoludani.

¹² Ne wana wa Yakobo, wakamunozeza sogo yawo nha vyono yalajiliza du.

¹³ Wakamudinghula sunga ko ku yisi ya Kanani, wakamuzika mu mhango yono yili mu mugunda ku Makupela, kucilima ya Mamule. Mhango hamonga no mugunda wuwo, Abulahamu yali yawugula kuli Efuloni, Muhiti, hawe hanhu ha wuziko.

¹⁴ Nawo wali weza kukondya kumuzika sogwe. Hodu Yusufu yakawa kuwuya ku Misili, hamonga ne wawahaze ne wanhu wose wono vikazana nawo ku wubita kumuzika sogwe.

Yusufu yakuwawusiza mahwele wawahaze

¹⁵ Yali yeza kuwa yafwiza u sogo yawo, wawahaze wa Yusufu, wakawa kulongana weneco wose wakutya, “Nye, na lunji Yusufu kocisula, no kucilifya wubi wose wono camutendela.”

¹⁶ Holeka wakamutumila Yusufu nghani, wakutya, “Wukumbucile, sogo lono yali yakali si nafwa, yalajiliza yakatya nhavi.

¹⁷ ‘Mumulonjelaje Yusufu vyono nghumunena yawanenele wanduguze masutya gawo hamonga no wubi wono wamutendela, hambi mbeka, nha wamutendela vibi muno muno.’ Alu ase co wetumami wo Mulungu wo sogo, cikukunena wucinenelaje wubi wose wono cakutendela.” Nayo Yusufu yali yeza kuzihulika zizo, hodu yakawa kwangula cililo, yakalila muno muno.

¹⁸ Hanyuma wanduguze nawo wakawa kumuziza, wakamwinamila, wakawa kutya, “Lanje ta, ase cili wetumami wako du.”

¹⁹ Ninga mwene Yusufu yakawatya, “Nye wandugu zangu, mulece kogopa! Ane si nosuma kwiwika niwe nha nili Mulungu.

²⁰ Manyile vyono anye mwali mwamumbila wuhile wubi, ninga wuhile wo Mulungu, wukawa wuswanu ho wanhu wenji wawumipe, nha vyono nanye mukuwona izuwali.

²¹ Holeka dedede, mulece kogopa. Ane nomulisenyi du hamonga ne wana wenyu.” Na mu nzila yiyo, Yusufu yakawawusiza mahwele gawo, yakawasindamika.

Wufwe wa Yusufu

²² Mwene Yusufu, yakajendelela kwikala mu'si ya Misili, hamonga ne mhuga yose yo sogwe. Nayo yekala cawumi myaka yigana limonga ne kumi, mu wikale wakwe.

²³ Nayo yakasuma kuwawona wana, sunga ne wezukulu wo mwanagwe Efulayimu. Nhavivyo kanyhi, yasuma kuwabocela wana wa Makili, mwana wa Manase, mu mhuga yakwe.

²⁴ Yusufu yakawalonjela wanduguze yakawatya, “Nye wandugu zangu, ane lu, neza nili behi no kufwa. Ninga Mulungu komuzizenyi no kumuwusenyi mu yisi yiyi ya Misili, yamutegulenyi ku yisi yono yawehuwiza Abulahamu na Isaka na Yakobo.”

²⁵ Hanyuma Yusufu yakawa kuwelahiza wana wa Isilayeli yakutya, “Ale, Mulungu yalawa yeza kumukumbucilenyi no kumukombozenyi, nhondo muze muwusoleleze no muwili wangu, mulece kuwuleka ku kuno.”

²⁶ Nayo Yusufu yakawa kufwila kuko ku Misili, yena myaka yigana limonga ne kumi. Nawo wanduguze, wakawubaka miti muwili wa Yusufu ho wulece kuwola, wakawa kuwuwika mwi'sanduku.