Mwamulizo 5 - Luganuzi Luswanu Kuli Wanhu Wose 2002

I zindelo za Adamu

¹ Awuno wo wityatye we zindelwa za Adamu. Mwi'pango lyono Mulungu yamuwumbila u munhu, yamuwumba mu futa yakwe mweneco.

² Nayo yawawumba u mulume no mucekulu, hanyuma yakawa kuwalugutiza, yakawacemela ne litagwa lya “Munhu.”

³ Na mwi'pango lono Adamu yali yaficila myaka yigana limonga na makumi madatu, vilo vyo wikale wakwe, yakatuga mwana we hwani yakwe mweneco, nayo yakamucemela litagwa lya Seti.

⁴ Yali yeza kukondya kumulela Seti, u mwene Adamu yakekala myaka magana munana, nayo yakawa yatuga wana wanji we cilume na we cicekulu.

⁵ Adamu yakafwa yena myaka magana yicenda na makumi madatu, yo wikale wakwe mono'nze.

⁶ Na lono Seti, yali yafisa myaka yigana limonga na mihano, yakamulela Enosi.

⁷ Nayo yaza kuwa yamulela Enosi, mwene Seti yakekala kanyhi myaka magana munana na mupunghati, nayo yakawa yena wana wanji we cilume na we cicekulu.

⁸ Nayo Seti yakafwa yena myaka magana yicenda na yikumi na myejete.

⁹ Na lono Enosi, yali yaficila myaka makumi yicenda, baho yakamulela Kenani.

¹⁰ Na lono yali yamulela Kenani, mwene Enosi, yakekala kanyhi myaka magana munana na yikumi na mihano, nayo yakawa na wana wanji we cilume na we cicekulu.

¹¹ Nayo Enosi yakafwa yena myaka magana yicenda na mihano, yo wikale wakwe wa baha mono'nze.

¹² Nayo Kenani, lono yali yaficila myaka makumi mupunghati, yakamulela Mahalaleli.

¹³ Nayo yali yeza kumulela Mahalaleli, mwene Kenani yakekala kanyhi myaka magana munana na makumi mane, nayo yakawa na wana wanji we cilume na we cicekulu.

¹⁴ Nayo Kenani yakafwa yena myaka magana yicenda ne 'kumi limonga, yo wikale wakwe wa mono'nze.

¹⁵ Nayo Mahalaleli, lono yali yaficila myaka makumi mutandatu na mihano, yakamulela Yaledi.

¹⁶ Nayo yali yeza kumulela Yaledi, mwene yakekala kanyhi myaka magana munana na makumi madatu, nayo yakawa yena wana wanji walume na we cicekulu.

¹⁷ Mahalaleli yakafwa yena myaka magana munana na makumi yicenda na mihano, yo wikale wakwe wa mono'nze.

¹⁸ Nayo Yaledi, lono yali yaficila myaka yigana limonga na makumi mutandatu na myejete, yakamulela Enoci.

¹⁹ Nayo yali yeza kumulela Enoci, mwene Yaledi yakekala kanyhi myaka magana munana, nayo yali yena wana wanji we cilume na we cicekulu.

²⁰ Yaledi yakafwa yena myaka magana yicenda na makumi mutandatu na myejete, yo wikale wakwe wa mono'nze.

²¹ Nayo Enoci, lono yali yaficila myaka makumi mutandatu na mihano, yakamulela Metusela.

²² Nayo yali yeza kumulela Metusela, mwene Enoci, yakekala kanyhi myaka magana madatu, akuno vili hamonga no Mulungu. Nayo yakawa yena wana wanji we cilume na we cicekulu.

²³ Nayo Enoci yekala myaka magana madatu na makumi mutandatu na mihano yose hamonga.

²⁴ Nayo vikajendana no Mulungu mu vilo vyakwe vyose, hanyuma yakahama hamba kwijela kanyhi. Hambi u Mulungu nha yamusola.

²⁵ Nayo Metusela, lono yali yaficila myaka yigana limonga na makumi munana na mupunghati, nayo yakamulela Lameci.

²⁶ Nayo yali yeza kumulela Lameci, mwene Metusela yakekala kanyhi myaka magana mupunghati na makumi munana na myejete, nayo yakawa na wana wanji we cilume na we cicekulu.

²⁷ Nayo Metusela yakafwa yena myaka magana yicenda na makumi mutandatu ne'cenda, yo wikale wakwe wa mono'nze.

²⁸ Nayo Lameci, lono yali yeza kuficila myaka yigana limonga na makumi munana na myejete, nayo yakamulela mwana wa cilume.

²⁹ No mwana yuyo, Lameci yakamucemela litagwa lya Noha, akuno yakutya, “U mwana yuyuno, yo kocisindamika mu milimo yetu mizito, yono cetuma kwe miwoko yetu, mono yisi yiyino yono u Mulungu yayilijita.”

³⁰ Nayo Lameci yali yeza kumulela Noha, mwene Lameci yakekala kanyhi myaka magana mahano na makumi yicenda na mihano, nayo yakawa na wana wanji we cilume na we cicekulu.

³¹ Nayo Lameci yakafwa yena myaka magana mupunghati na makumi mupunghati na mupunghati, yo wikale wakwe wa mono'nze.

³² Nayo Noha, lono yali yaficila myaka magana mahano yo wikale wakwe, yakawalela wa Semu na Hamu na Yafeti.