Mwamulizo 49 - Luganuzi Luswanu Kuli Wanhu Wose 2002

Zinghani ze ndumilizo za Yakobo kuli wanagwe

¹ Hodu, Yakobo yakawa kuwacema wanagwe wose, yakawatya, “Nye wanangu, ale mwikongholelaje hamonga, hambi nha nghusaka nimulonjelenyi zono zomwaganenyi mu vilo vyono vikuza.

² “Ale, mwikonghole muhulicize, anye nyo wana wa Yakobo, muhulicizaje ane no Isilayeli sogo yenyu.

³ “Mwanangu Lubeni, agwe go mulongozi kulelwa, yo gwegwe go vilungo vyangu, no mukalo wo wuzelelo wangu, wina lilumbo hawaha, wina vilungo kuciza.

⁴ Nha vyono winha wufwaluce we malenga, nagwe si kosuma kwimilwa, ninga hamba nhavivyo si kowa wuli muwaha wucizize wose, hambi agwe nha wagona no muwanda wangu, wukacitajila wavu, citanda co sogo.

⁵ “Nawo wa Simiyoni na Lawi, wali ndugu, vitwalo vyawo wovitumamila ko wuwulaji.

⁶ Gwe go nhumbula yangu, wulece kwinjila mu ciwungu cawo. Gwe go nhumbula yangu wulece kuhanga mwi'kuga lyawo, hambi nha wawawulajila wanhu mu makuwo gawo na mu wuvumbi wawo, wakazipela zinghongolo vilema, ko kuzidumula matimba gazo.

⁷ Likuwo lyawo lilijitwe, vyono likwaka muno, no wukali wawo wulijitwe, vyono wusina lusungu. Nane noweyagaza mu yisi yose ya Yakobo, heya, nowatemanula mu yisi ya Isilayeli.

⁸ “Nagwe Yuda, wanduguzo wokukumya. Nagwe kolowebata walugu wako mu singo kwe miwoko yako. Wanduguzo wokwinamila.

⁹ Yuda yenha nyana ya simba yono, kolo yebata mapelembo gayo, yiwuyaga mu mhango yayo, nayo yitambalalaga no kugona hasi. Nani 'mbi mono kosuma kumugaza?

¹⁰ Ne nghome ye citemi, si yowucila lukulu kuli'gwe Yuda. Ne zindelo zako zotema cibitilila, sunga kono kolokuziza mweneco. Yu yulya mono makungugo gose gomuhulika.

¹¹ Kayiwopaga ndogowe ha muzabibu muswanu. Nayo kayikanzaga myenda yakwe kwe divayi, ne vivwalo vyakwe, kwe divayi ndunghu kotya sakami.

¹² Ne meso gakwe madunghu so divayi, ne meno gakwe mazelu swee so mele.

¹³ “Nayo Zabuloni, kokwikala ha mwejelele we lilenga. No mwejelele wakwe, howa ho ha wuwiko we zingalawa. Ne yisi yakwe wotemana na Sidoni.

¹⁴ “Nayo Isakali, yenha ndogowe ye vilungo, yono yikugona ha mitegulo yayo.

¹⁵ Nayo kolo yikuwona hono yicehile haswanu, ne yisi nayo yikwendeza, hodu, yinamyaga mugongo wayo kuwudinghula mutegulo. Yiwa kwituma milimo nha muwanda.

¹⁶ “Dani nayo, kowa mulamuzi we wanhu wakwe, kotya mbeyu yinji ya Isilayeli.

¹⁷ Dani, kowa nha nzoka mu nzila, inzoka yono yina sumu ha mhelo ye nzila, yono yikuziluma zifwalasi mu vising'anilo, na mono yekaye mucanyha yayo, kawa kugwa hasi cinghata.

¹⁸ “Ane niwulindiye wukombozi wako, Gwe go Muwaha Mulungu.

¹⁹ “Ne cipuga ce wahizi, colomutowanga Gadi, ninga mwene kolowawinjila kutali.

²⁰ “Nayo nhwanga ya Asheli, yowa mbaha, nayo kolavya ndigwa yono yimukwiliye mutemi.

²¹ “Nayo Nafutali, yenha nzimba, yono yikumangha yiwopoleywe. Nayo yilelaga wana waswanu.

²² “Yusufu, nha mubici wono wukulela, mubici wono wukulelela ha nhumbi ye mivwilo ye malenga. Ne manhambi gayo, gatandalaga mwi'jinji.

²³ Wagumila zisonga, wakamuhoma ko wukali, wakamugumilila zisonga, no kumugaza muno.

²⁴ Ninga hamba nhavivyo, wupinde wakwe wukali wukamile. Ne miwoko yakwe, yikutuga vilungo vyono vikamile, kwe vilungo vyo Mudaha Vyose wa Yakobo.

²⁵ Ale, U Mulungu wo sogo mono kakutazaga, U Muwaha Mulungu mono kakulugutizaga, wutuje wumoti wa ku wulanga, ko wumoti wa mu visolo vyono vili hasi ye'si, na ko wumoti we zimitugo ne wana.

²⁶ No wumoti wo sogo, Wina vilungo vyono vicizize wumoti wa mu matunda gono gekalaga, no wuswanu wa mu matunda ge cibitilila. Wumoti wuwo, wikalaje mu mutwe wa Yusufu, na mu cihanda co wusu wa mono yatemanulwa ne wanduguze.

²⁷ “Nayo Benyamini, yenha liminzi lyono lina wulaku, lilizaga mapelembo galyo hakali mitondo, ku mihe ligawaga ngaluzi.”

²⁸ Ayi yo milango yikumi na myejete ya Isilayeli. Nazo zizo zo nghani zono yazilonga sogo yawo lono yawalugutizaga munhu mu nghango yakwe vyono yimunojeye.

Wufwe wa Yakobo no wuzikwe wakwe

²⁹ Nayo Isilayeli, yakawalajiliza wanagwe yakawatya, “Nye wanangu, alu ane neza nili behi no kufwa. Nane kolo nafwiza, nhondo mubite mukanzice hamonga ne wasogo zangu, mu mhango yono yili mu mugunda wa Efuloni, ayulya Muhiti,

³⁰ akulya ku Makupela, ku lubavu lwa kucilima ye Mamule mu yisi ya Kanani. Mhango yiyo, hamonga no mugunda wuwo, Abulahamu yavigula kuli Efuloni, Muhiti, hawe hanhu ha wuziko.

³¹ Na kuko ko wamuzika Abulahamu, hamonga na Sala mugolece wakwe, kuko ko wamuzika Isaka na Labeka mugolece wakwe, na ko kuko du ko wamuzika na Leya.

³² U mugunda wuwo, hamonga ne mhango yayo, vyagulwa kuli Wahiti.”

³³ Nayo Yakobo yali yeza kukondya kuwalajiliza wanagwe, yakayigomola migulu yakwe kanyhi mu citanda, yakehela wehele we ndumilizo, hodu yakawa kufwa.