Mwamulizo 48 - Luganuzi Luswanu Kuli Wanhu Wose 2002

Yakobo yakuwalugutiza Efulayimu na Manase

¹ Zaza kukondya zizi, Yusufu yakamanyizwa vyono sogwe mutamwa. Hodu nayo yakawa kuwasola i wanagwe wejete, Manase na Efulayimu, yakabita nawo kuli sogwe.

² Nayo Yakobo yali yeza kumanyizwa vyono mwanagwe Yusufu yaza, kaza kumulanga, hodu, Yakobo yakawa kwikamiliza, yakenuka yakekala mucitanda cakwe.

³ Yakobo yakawa kumutya Yusufu, “Gwe mwanangu, Mulungu Mudaha Vyose, yejela kuli'ne, lono nali nili ku Luzu, mu yisi ya Kanani, yakandugutiza,

⁴ yakatya, ‘Lanje ta, ane nokunoza wuwe na ndelo nyinji, kanyhi wonjelezece, na muli gwegwe kanyhi, nonoza mhuga mbaha ze wanhu, nane nowapela yisi yiyi wanago, wayiteme cibitilila.’

⁵ “Ne wana wawa wejete, wono wawalelela kukuno kono Misili, lono nali nghali sinafika, awa wana wangu, wawano wa Efulayimu na Manase, awa wana wangu nha vyono wenha wa Lubeni na Simiyoni.

⁶ Langa wana wono kolowatuga hanyuma, awo langa wo wowa wako. Na wawo wene, wuhazi wawo wolawilila muli Efulayimu na Manase.

⁷ Nalamula kunoza zizi, ku soko yo nyina yako Laheli. Ku soko lono nawuyaga nghulawa ku Padani, mwene yakafwila mu yisi ya Kanani, lono cali ceza cili behi no kufika ku Efulata, yakandecela wusungu wuwaha muno muno. Hodu nane nghawa kumuzika baho du, ha mhelo ye nzila yono yibitile Efulata, nha cinji yo Betelehemu.”

⁸ Nayo Isilayeli yali yeza kuwawona wawo wana wa Yusufu, yakawa kumuwuza Yusufu yakatya, “Alu Yusufu, awano wo wanani wene?”

⁹ Nayo Yusufu yakamupitula sogwe yakatya, “Gwe baba, awano wo wanangu wono Mulungu yamhela lono nili ku kuno.” Nayo Isilayeli yakatya, “Ale, nghukunena wasejelezaje hono hangu ho niwalugutize.”

¹⁰ Alu nago meso ga Isilayeli lulo, gali geza si gakuwona viswanu, ku soko yo wukombi wakwe. Hodu nayo Yusufu yakawa kuwasejeleza wanagwe behi no sogwe, nayo sogwe yakawanonela yakawakumbatila.

¹¹ Hanyuma Isilayeli yakawa kumulonjela Yusufu yakatya, “Ane mwanangu hamba si nali nitumbiye vyono nokuwona usu wako kanyhi, ninga lu kumbe Mulungu kanhaza sunga niwawona ne wanago!”

¹² Ale, Yusufu yakawa kuwawusa wanagwe ha mafugamilo go sogwe, hanyuma mwene yakenama ho hasi.

¹³ Hanyuma Yusufu yakawa kuwenula wanagwe wejete yakamwibata Efulayimu no muwoko wakwe wo kulume, yakawa kumutegula wulunji wo muwoko wo kucekulu wo sogwe, na Manase nayo, yakamwibata no muwoko wakwe wo kucekulu, yakawa kumutegula wulunji wo muwoko wo kulume wo sogwe, yakawa kuwasejeleza kuli kuku yawo.

¹⁴ He, ninga Isilayeli lono yawajelekaga miwoko yakwe, yakayisutanizya. Muwoko wakwe wo kulume, yakawujeleka mu mutwe wa Efulayimu, ninga yo yali yo mudodo, no muwoko wakwe wo kucekulu, yakawujeleka mu mutwe wa Manase, mono yali yo mulelwa mulongozi.

¹⁵ Isilayeli yakawa kumulugutiza Yusufu yakutya, “U Mulungu wa wa baba Abulahamu na Isaka, wamuhulikaga mu wikale wawo. U Mulungu mono kandisaga mu wikale wangu sunga nalu.

¹⁶ Sunga na malayika mono yamhonya ne mabi gose, ale yawalugutize i wana wawa! Litagwa lyangu hamonga ne matagwa ge wasogo zangu Abulahamu na Isaka, gatambulwe mu zinzila ze wana wawa, nawo wonjelezece wawe wenji mono yinze.”

¹⁷ Nayo Yusufu yali yeza kuwona vyono sogwe kawujeleka muwoko wakwe wo kulume mu mutwe wa Efulayimu, si yendezwa yaye. Holeka yakawibata muwoko wo sogwe ho yawuwuse mu mutwe wa Efulayimu, yawujelece mu mutwe wa Manase.

¹⁸ Akuno yakumulonjela sogwe yakutya, “Gwe baba, yo si nhavivyo yaye! Ayuno Manase yo mulelwa mulongozi. Holeka dedede, wujelekaje muwoko wako wo kulume mu mutwe wakwe.”

¹⁹ Ninga sogwe yakalemela lukulu, yakatya, “Ane manyile 'gwe mwanangu, ane manyile. Wana wa Manase nawo nhavivyo, wowa nghungugo mbaha yono yina lilumbo yiwaha. Hamba nhavivyo, u mwanakwawe yo kowa muwaha kuciza mwene, sunga no lulelo lwakwe nalo lowa nghungugo nyinji.”

²⁰ Hodu Isilayeli yakawa kuwalugutiza mwi'zuwa lilyo yakutya, “Na mu matagwa genyu, Waisilayeli wolugutiza wakutya, ‘U Mulungu yakunoze wuwe nha Efulayimu na Manase!’ ” Na mu nzila yiyo, Isilayeli yakamupela wuwaha Efulayimu hali Manase.

²¹ Isilayeli yakawa kumulonjela Yusufu yakutya, “Alu nha vyono wukuwona, ane neza nili behi no kufwa. Ninga hamba nhavivyo, u Mulungu kowa hamonga nanye. Nayo komugomolenyi du ku yisi ye wakuku zenyu.

²² Ninga muli zose, ane nghupela gwegwe yisi yose ya mu matunda yono nawaboka Waamoli ko mumaje na ko wupinde wangu, hamba si niwapelile wawahazo yaye.”