Mwamulizo 46 - Luganuzi Luswanu Kuli Wanhu Wose 2002

Yakobo hamonga ne wanagwe, wakubita ku Misili

¹ Nayo Isilayeli, yakawa kutuluka na vyose vyono yali yena navyo. Nayo yali yeza kufika ha Beli-sheba, yakamulavizya Mulungu wo sogwe Isaka makumbiko.

² Nayo Mulungu yakalongana na Isilayeli ne cilo mu wugubulilwe, yakamucema yakutya, “Yakobo gwe! Yakobo!” Nayo Yakobo yakedika yakatya, “Ane hano.”

³ Mulungu yakamulonjela yakatya, “Ane yo nene Mulungu, u Mulungu wo sogo. Holeka wulece kogopa ku wubita ku Misili. Na lono wuli kuko, ane nokunoza wuwe yikungugo yiwaha.

⁴ Nene no mweneco, nowa nili hamonga nagwe sunga kuko ku Misili, yo nene du mono nokugomola ku kuno kanyhi. Ne miwoko ya Yusufu yo yologagomoleza meso gako ha wufwe wako.”

⁵ Nayo Yakobo yakawa kutuluka ku wulawa ku Beli-sheba. Wanagwe wakawa kumudinghulila mu magali go kukwegwa gono Falawo yagategula ho gamusole, mwene hamonga ne wana wawo wagalika, hamonga ne wagolece zawo.

⁶ Wakasoleleza hamonga ne zimitugo zawo, ne sawo yawo yose, yono wali wakwawa mu yisi ya Kanani, wakawa kubita ku Misili. Yakobo yakawasola we mhuga yakwe wose,

⁷ wanagwe we cilume na we cicekulu wose, hamonga ne wezukulu, yakawategula wose ku Misili.

⁸ Agano go matagwa ge wana wa Isilayeli wono wabitana no sogo yawo ku Misili. Lubeni, mulelwa mulongozi wa mwene Yakobo,

⁹ hamonga ne wana wa Lubeni awano, Hanoki, Palu, Hezeloni, na Kalimi.

¹⁰ Ne wana wa Simiyoni nawo wo wano, Yemuyeli, Yamini, Ohadi, Yakini, Sohali, na Shawuli mono yali mulelwe no mucekulu we Cikanani.

¹¹ Nawo wana wa Lawi wo awa, Gelishoni, Kohati, na Melali.

¹² Ne wana wa Yuda nawo wo awano, Eli, Onani, Shela, Pelezi, na Zela. (Ninga Eli na Onani, wafwila ku yisi ya Kanani.) Nawo wana wa Pelesi, wali awa, Hezeloni, na Hamuli.

¹³ Ne wana wa Isakali wo wano, Tola, Puva, Yashubu na Shimuloni.

¹⁴ Nayo Zabuloni, wanagwe wali awano, Seledi, Eloni na Yahiliyeli.

¹⁵ Wawa wo wana wa Leya wono yamulelela Yakobo ku Padani-alani, hamonga na Dina u mwanagwe we cicekulu. Na mu wutowelele, wanagwe we cicekulu, hamonga ne wezukuluwe wose, wali waficile wanhu makumi madatu na wadatu liwalo lyawo.

¹⁶ Wana wa Gadi nawo wali awano, Sifiyoni, Hagi, Shuni, Eziboni, Eli, Alodi, na Aleli.

¹⁷ Nayo Asheli, wanagwe wali awa, Imuna, Ishiva, Ishivi, Beliya, na Sela u lumbu lyawo. Nayo Beliya, wanagwe wali awano, Hebeli, na Milikiyeli.

¹⁸ Awano we likumi na mutandatu, lo lulelo lwa Yakobo, lono lwalawilila muli Zilipa, u mwitumami we cicekulu mono Labani yamupela mwanagwe we cicekulu Leya.

¹⁹ Na Laheli nayo yamulelela Yakobo wana wejete, nawo wo awano, Yusufu na Benyamini.

²⁰ Nako kuko ku Misili, Asenati mwana we cicekulu wa Potifela, mono yali mukohani we likaya lya Oni, nayo yamulelela Yusufu wana wejete nawo wo wano, Manase na Efulayimu.

²¹ Nawo wana wa Benyamini wali awa, Bela, Bekeli, Ashibeli, Gela, Namani, Ehi, Loshi, Mupimu, Hupimu, na Alidi.

²² Nawo wanhu wawa we likumi na wane, wo wana wa Yakobo, wono Laheli mugolece wakwe yamulelela.

²³ Mwana wa Dani, yali Hushimu.

²⁴ Nawo wana wa Nafutali, wali, Yahiseyeli, Guni, Yeseli, na Shilemu.

²⁵ Nawo wawo vyono wali mupunghati, lo lulelo lwa Yakobo wono walawilila muli Biliha, u mwitumami we cicekulu, mono Labani yamupela mwanagwe we cicekulu Laheli.

²⁶ Holeka liwalo lye wana wose wa Yakobo wono yabita nawo ku Misili, hono wulece kuwawaliliza i wagolece wose we wanagwe ale wali waficile wanhu makumi mutandatu na mutandatu liwalo lyawo.

²⁷ Nako kuko ku yisi ya Misili, Yusufu yali yalela wana wejete. Holeka liwalo lye wanhu wose we mhuga ya Yakobo wono wenjila ku Misili, wali wanhu makumi mupunghati liwalo lyawo.

Yakobo hamonga ne wanagwe mu yisi ya Misili

²⁸ Ale, Yakobo yakawa kumutuma Yuda kuli Yusufu, yakamulonjele vyono wetang'anilile ku Gosheni, nawo wakafika ku yisi ya Gosheni.

²⁹ Nayo Yusufu yakasola ligali lyakwe, yakawa kubita kumuhinjiliza sogwe Isilayeli kuko ku Gosheni. Nayo Yusufu yali yeza kumuwona sogwe, yakamukumbatila akuno yakulila sunga yidaha likabita.

³⁰ Nayo Isilayeli yakamulonjela Yusufu yakatya, “Alu langa mwanangu, hamba nifwe luno, si cinji, vyono lu nakondya kukuwona, namanya vyono kumbe agwe wukali cawumi!”

³¹ Nayo Yusufu yakawa kuwalonjela wawahaze, hamonga ne mhuga yose yo sogwe, yakawatya, “Alu ane neza kubita nghamumanyize Falawo vyono wawaha zangu, hamonga ne mhuga yose ya baba, wono wekalaga ku yisi ya Kanani, wakondya kunyiziza wali baha.

³² Nane nomuloloseza vyono anye muli wadima mitugo wo mulimo wenyu, na vyono muli wadima mitugo, holeka muza akuno hamonga ne zimhene, zingholo ne zing'ombe, sunga ne sawo yenyu yose.

³³ Holeka nayo Falawo hono yamucemenyi no kumuwuzenyi yawe kutya, ‘Alu muzoweye kwituma mulimoci?’

³⁴ Nanye mumutezaje nhavi, ‘Gwe go mulumbwe, ase co wetumami wako, cili wadimi wa mitugo, ku wulawa wudodo wetu sunga nalu, hambi nha vyo wali ne wa kuku zetu.’ Ale, mumulonjelaje nhavivyo, nayo ho yamukombolenyi mwikale mu yisi ya Gosheni.” Nayo Yusufu yazilonga zizo, ku soko vyono, munhu wo wose mudima mitugo, lyali yiwifyo yiwaha kuli Wamisili.