Mwamulizo 45 - Luganuzi Luswanu Kuli Wanhu Wose 2002

Yusufu yakwimanyiza kuli wawahaze

¹ Nhondo baho Yusufu hamba si yasuma kwiyimila kanyhi, ha mwande ya wose wono wali wemile ha mwande yakwe, holeka yakawa kulajiliza yakatya, “Ale, muwalavyanizaje wose kunze!” Holeka lono Yusufu yemanyizaga kuli wawahaze, hali hasina Mumisili hamba yu monga baho.

² Yusufu yakalila kwa yizi yiwaha muno, sunga ne Wamisili wakamuhulika vyono yalilaga, sunga ne mhuga yose ya Falawo, wose wamuhulika vyono yalilaga.

³ Yusufu yakawa kuwalonjela wawahaze yakatya, “Nye wandugu zangu, ane yo nene Yusufu. Wulenyi, baba yakali cawumi?” Ninga wawahaze wakazimuka muno ha mwande yakwe hamba si wasuma no kumupitula kose.

⁴ Hodu mwene Yusufu yakawa kuwatya wawahaze, “Nghumunenenyi ta musejelele ahano hono hangu.” Nawo wali weza kusejelela behi nayo, yakawa kuwatya, “Nye wawaha zangu, ane yo nene u mwanakwawenyu Yusufu, mono mwamuguza kono Misili.

⁵ Ninga aluno nghumunenenyi mulece kukalala, hamba kwiyihosa vyono mwanguza kukuno. Hambi Mulungu nha yo yandeta nimulongolelenyi ku kuno, ho mhonye wumi we wanhu.

⁶ Na awuno wo mwaka we kejete du we lizala mono'si, na yikali yisigaye ku nyuma myaka mihano kanyhi, yono howa hasina kulima hamba kududula.

⁷ Ninga Mulungu yakandeta ku kuno ho nimulongolelenyi, kanyhi ho sume kumanyila lukulu, vyono nyenye nyo weneco, hamonga no lulelo lwenyu lose, mukujendelela kuwa womi kono'nze.

⁸ Holeka 'nye wawaha zangu, yo si nyenye mono mwandeta ku kuno, langa Mulungu yo yandeta. Nayo Mulungu yakanoza nghawa nha sogwe ya Falawo, nghawa yo nene mulanjilizi wa vyose vya mu nyumba yakwe, kanyhi yo nene mutemi we yisi yose ya Misili.

⁹ “Holeka alu, mubite mbela mbela kuli baba, mukamulonjele vyono, Yusufu mwanago yakutya, ‘Mulungu yanoza kuwa muwaha we yisi yose ya Misili. Holeka wulece kutinya kuza kono kwangu.

¹⁰ Nagwe kokwikala behi na nene mu yisi ya Gosheni, gwegwe go mweneco hamonga ne wanago wose, hamonga ne wezukuluwo wose, hamonga ne zimitugo zako ne zisawo zako zose.

¹¹ Nagwe kolo weza kuwa wuli kuko ku Gosheni, nane nokudima, hamonga ne mhuga yako yose, hamonga ne zimitugo zako, ho mulece kufwa ne lizala, hambi nha yikali myaka yinji mihano ye lizala yono yikuza.’ ”

¹² “Nanye nyenye nyo weneco nyo wawaha zangu, hamonga no mwanakwawetu Benyamini, nha mwewonelela ne meso genyu, vyono mbeka yo nene no mweneco Yusufu, mono nghulongana nanye.

¹³ Holeka munojeye mumulonjele baba kuli zo lukumyo lwangu lono nina nalo kukuno kono Misili, sunga na vyose vyono muviwene. Holeka alu musunhe mukamulete baba akuno.”

¹⁴ Hanyuma Yusufu, yakawa kumukumbatila mwanakwawe Benyamini akuno yakulila, nayo Benyamini yakalila muno, akuno vyo wekumbatiye du.

¹⁵ Yusufu yakajendelela kulila du akuno yakuwakumbatila wawahaze no kuwanonela muno, hanyuma nhondo, wawahaze ho wakawa kwanza kuduwana nayo.

¹⁶ Ne zinghani zizo zali zeza kufika 'kwi kulu, nha vyono wawahaze za Yusufu waza, Falawo hamonga ne wetumami wakwe wose, wakendezwa muno muno.

¹⁷ Hodu Falawo yakawa kumulonjela Yusufu yakatya, “Walonjelaje wanduguzo, wazidinghuzaje zindogowe mitegulo, wawuye ku yisi ya Kanani.

¹⁸ Wabite wakamulete sogo yawo, hamonga ne zimhuga zawo wose, nane nowagawila hanhu ha swanu muno mu yisi ya Misili, nawo womota ziswanu zose za mono yisi yiyi.

¹⁹ Hamonga na zizo, wuwalonjelaje wasoleleze ne magali go kukwegwa, ga mono yisi ya Misili ku soko ye wana wawo wagalika, hamonga ne wagolece zawo, kanyhi wamulete no sogo yawo.

²⁰ Walonjelaje vyono, walece kuwa na mahwele ku soko ye zisawo zawo, hambi nha wokwikala hanhu haswanu mu yisi yiyi, ya Misili.”

²¹ Hodu, wawo wana wa Isilayeli, wakawa kunoza nha vyono walajilizwa kwituma. Nayo Yusufu, yakawa kuwapela magali go kukwegwa nha vyono yali yalajiliza Falawo, yakawapela ne mhamba ye zindigwa za mu nzila.

²² Yakawa kuwapela wose ne myenda yono wokawaniza, ninga Benyamini, yakapegwa fweza magana madatu hamonga ne myenda mihano yo kukawaniza.

²³ Kanyhi yakasola ne vipegwa avino yamutegulile sogwe, ndogowe yikumi zidinghuye vinhu vinji viswanu vya mu Misili, na ndogowe zinyhekulu nazo yikumi zidinghuye wuhemba ne mikate, hamonga ne mhamba ye zindigwa za mu nzila.

²⁴ Ale, du, Yusufu yakawa kuwelaga wawahaze. Ninga lono watulukaga, yakawalonjela yakawatya, “Ninga mulanjilile, mulece kugombana mu nzila ye!”

²⁵ Nawo wakawa kutuluka ku wulawa ku Misili, wakuwuya ku kaya kuli Yakobo sogo yawo ku yisi ya Kanani.

²⁶ Nawo wali weza kufika, wakawa kumulonjela sogo yawo wakutya, “Gwe baba, Yusufu kumbe yakali mumi! Mwene kanyhi yo muwaha mu yisi yose ya Misili!” Nayo sogo yawo baho yali yeza kuzihulika zizo, yakazimuka muno, hambi nha si yasuma kuzihuwila zinghani zawo lwa kamonga.

²⁷ Ninga wali weza kumusimuliziza zose, na vyono walajilizwe na Yusufu, nayo yali yeza kugawona ne magali go kukwegwa, gono Yusufu yaletile ho gamudinghule mwene, nhondo Isilayeli ho yakawa kuzilimhuka.

²⁸ Isilayeli yakawa kutya, “Alu langa ho neguta, kumbe mwanangu Yusufu yakali cawumi! Alu langa nobita nghamuwone lono nghali si ninafwa.”