Mwamulizo 44 - Luganuzi Luswanu Kuli Wanhu Wose 2002

I cikombe cono cali cajiliye, wakucagana cina Benyamini

¹ Hanyuma yayo Yusufu yakamulajiliza mulindilizi we nyumba yakwe yakatya, “Ale, wutajile wuhemba mu zimhinda ze wanhu awa, wuzimemye mu nghango ye vilungo vyawo ha wudinghule, hanyuma, wusole ne zipesa zawo nazo wuzitajile ha milomo ye zimhinda zawo.

² Langa mu mhinda ya ayulya u mudodo muno muno, wutajile cikombe ca fweza hamonga ne zipesa zakwe.” Nayo mulindilizi yuyo, yakanoza nha vyono yalajilizwa na Yusufu.

³ Kwali kweza kudandawuka, hakali mitondo muno muno, wakawa kukombolwa watuluce hamonga ne zindogowe zawo.

⁴ Nawo lono wali wajenda cipango cidodo du, Yusufu yakamulonjela mulindilizi we nyumba yakwe yakamutya, “Ale, ta wumanyhe wuwalonde wanhu wawalya, nagwe kolo weza kuwagana, wuwawuzaje wutye nhavi, ‘Alu nye, nhawulenyi lu mukulipa zimbi mu ziswanu zono mutendeywe?

⁵ Alu nhawule muhiza cikombe ce fweza co muwaha wangu? Alo si mumanyile vyono co cikombe cico co kang'welaga no kutowela cisangu, no kumanyila zinghani zono hundikwe? Nye anye, mbeka musutya muno muno so wituma nhavivyo.’ ”

⁶ Ale du, nayo mulindilizi yali yeza kuwagana, yakawa kuwalonjela zizo nha vyono yatumwa yalonje.

⁷ Nawo ninga wakamuwuza wakatya, “Gwe go mulumbwe, alu wina nhunizoci yo kuciwuza zono zinha zizo? Ase co wetumami wako sicosuma hamba hadodo kuzinoza zono zinha zizo!

⁸ Wukumbucile ta, 'gwe go mulumbwe, vyono zipesa zono cikazagana mu milomo ye zimhinda zetu, cazigomola zose du telele, ku wulawa ku yisi ya Kanani. Alu yowa wule kanyhi ho cihize pesa hamba zahabu ku wulawa mu nyumba yo muwaha wako?

⁹ Holeka alu citye nhavi, munhu wo wose wa muli sese co wetumami wako, hono yejele yena cikombe cico, ciba munhu yuyo yawulagwe, nase wose mono cisigaye, hodu cowa wetumami wako.”

¹⁰ U mulindilizi nayo yakatya, “Ale viswanu, nalumba, nha vyono muteye. Ninga langa, munhu wo wose mono kokwijela yena cikombe cico, ale, yuyo yo kowa muwanda wangu. Ninga anye wose mowa musina masutya.”

¹¹ Hodu wose wakawa kuyitimya mbela mbela mitegulo yawo wakawa kuziwopola zimhinda zawo munhu na mhinda yakwe.

¹² Ale, mulindilizi yakawa kwanza kulondola, yakamuliziza kuli muwaha wawo, yakamaliliziza kuli mwanakwawawo Benyamini, ne cikombe yakawa kucagana mu mhinda ya Benyamini.

¹³ Wose hamonga wakawa kuvidemulanga vivwalo vyawo ko wukalale wuwaha muno muno. Hodu, wakawa kuyipaciza mitegulo yawo mu zindogowe munhu na ndogowe yakwe, wakawa kuwuya ne nyuma kanyhi kuli Yusufu.

¹⁴ Nayo Yuda hamonga ne wayagwe wali weza kufika ku kaya kwa Yusufu, nayo Yusufu yali yakali yali mu kaya, hodu, wakawa kumwinamila.

¹⁵ Nayo Yusufu yakawa kuwawuza yakutya, “Alu nye, nghanici yiyi kanyhi yono munhendeye no muyenyu? Alo si mumanyile vyono ane nosuma kutowa cisangu no kumanya zono hundikwe?”

¹⁶ Nayo Yuda yakamupitula yakatya, “Alu ta mwene cilonje ciwe kutya cici kanyhi go mulumbwe? Ta mwene 'se hamba cina kanyhi ya kulonga? Hamba si cosuma kwiyeza mwi 'sutya lilino? U Mulungu nha kakondya kucilajila masutya getu ase co wetumami wako. Holeka ase wose, alu caweza cili wetumami wako, ase hamonga na yuyo mono cikombe cijeye mu mhinda yakwe.”

¹⁷ Ninga Yusufu nayo yakapitula yakatya, “Aa, ng'o, ane nane si nonozeza lukulu nhavivyo! Langa yuyo du mono yejeye yena cikombe cangu, ale, yuyo du yo kowa muwanda wangu. Ninga anye mo wanji wose, muwuye mupolile ko sogo yenyu.”

Yuda yakumutetela Benyamini

¹⁸ Hodu, Yuda yakamubitila behi Yusufu, yakamulonjela yakutya, “Gwe go mulumbwe, ane nghukunena dedede, wunghombole ho nitetele hali'gwe mu nghani nyhefu du, kanyhi nghukunena wulece kukalazwa nane, hambi agwe nha winha Falawo du mweneco.

¹⁹ Gwe go mulumbwe, yo gwegwe mono waciwuza hono ciwe cina sogo yetu, hamba mwanakwawetu.

²⁰ Nase si caleka, langa cikakulonjela vyono, cikali cina no sogo yetu, langa mwene yo yaweza mukombi muno, cikakulonjela kanyhi nha vyono, cina no mwanakwawetu yunji mudodo, mono yalelelwa mu wukombi wo sogo yetu. Na vyono u muwahawe wa yuyo mudodo, ayo yakondya kufwa, hodu yakawa kusigala yali wene du ko nyina yawo, nayo sogo yetu yamwendile muno muzelelo yuyu.

²¹ Gwe go mulumbwe, wacilajiliza ase co wetumami wako, vyono hono cikuza kanyhi cimulete na yuyo mwanakwetu ho wuze wumuwone nayo.

²² Nase cikakuloloseza nha vyono, muzelelo yuyo si vyosuma kwileka no sogwe, na hono yejelele du yanoze nhavivyo, hodu sogwe kofwa.

²³ Hanyuma kanyhi 'gwe go mulumbwe, wacilonjela ase co wetumami wako wukatya, ‘Hono mulece kuzana no mwanakwawenyu mudodo, ale, si mosuma kwiwona nane hamba hadodo.’

²⁴ “Nase cali ceza kuwuya ku kaya kuli mwitumami wako sogo yetu, nase si caleka, langa cikamuloloseza zose zono wacilajiliza 'gwe go mulumbwe.

²⁵ Nayo yali yeza kucituma ho cize akuno kuhemela zindigwa,

²⁶ si caleka, langa cikamulonjela vyono, ‘Ase si cobita. Langa hono mwanakwawetu mudodo nayo yabite, aho langa cobita, vyono hono cilece kubita nayo, hodu sicomuwonela lukulu munhu yuyo.’

²⁷ Nayo sogo yetu mwitumami wako, yakawa kucilonjela yakutya, ‘Ninga mumanyile vyono mugolece wangu Laheli yandelela wana wejete du.

²⁸ Na yumonga yakondya kundeka. Nane nghatya, aa, ale du kanyhi, lunji kowa kademulangwa ne lilimu lya mu mbago, nane nghali hamba si ninamuwona kanyhi.

²⁹ Alu hono musolele na yuyu nayo kanyhi, ma hono yetang'anile ne zimbali kuko, ane mowa mwambulaga mu wukombi wangu, nina hamonga no wukalale wuwaha.’

³⁰ “Holeka 'gwe go mulumbwe, hono nimubitile baba, u mwitumami wako, akuno si nili hamonga no muzelelo yuyu, na kumbe wumi wa baba nawo wuli mu wumi wo muzelelo yuyu,

³¹ nayo kolo yeza kuwona vyono si cimugomoye muzelelo yu yuno kuli mwene, mbeka kofwa! Na mu nzila yiyo ase co wetumami wako, cowa camuwulaga sogo yetu ko wukalale.

³² Hamonga na zizo, nene no mweneco nghelavya kuli baba, ho niwe mulanjilizi wo muzelelo yuyuno, nghamutya nhavi baba, ‘Hono ndece kumugomola Benyamini kuli'gwe, hodu wuhoswe weze wuli muli nene cibitilila.’

³³ Holeka 'gwe go mulumbwe, ane no mwitumami wako nghukunena muno muno, ane sigale baha, niwe mwitumami wako homele ho muzelelo yuyu. Ninga mwene wumukombole yabite ku kaya hamonga ne wawahaze.

³⁴ Ane 'mbi nosuma nhawule kumuwuyila baba akuno nimusina Benyamini? Na mbeka si nosuma kukangalila hamba hadodo kuziwona zimbi zono zomutuga baba.”