Mwamulizo 43 - Luganuzi Luswanu Kuli Wanhu Wose 2002

Wawahaze wa Yusufu wakubita na Benyamini ku Misili

¹ Ne nzala nayo yikacila muno kuwa mbaha mu yisi ya Kanani.

² Nazo zindigwa zono wahemela ku Misili, zali zeza kumalika. Yakobo yakawalonjela wanagwe yakawatya, “Nye wanangu, ale mubite kanyhi ku Misili mukacihemelele zindigwa ndodo.”

³ Ninga Yuda yakamupitula sogwe yakatya, “Gwe baba, ninga munhu yu yulya yacikong'onheza muno muno yakatya, ‘Hono mulece kumuleta na Benyamini mwanakwawenyu mudodo, ale, si mombonela lukulu.’

⁴ Holeka ase cosuma kubita cikakuhemelele zindigwa, hono wumukombole mwanakwawetu Benyamini cibite nayo.

⁵ Ninga hono wumulemeze, ale nase hamba si cosuma kubita, hambi munhu yu yulya nha yacilonjela calinze yakatya, ‘Hono mulece kuzana na Benyamini u mwanakwawenyu mudodo, ale si mombonela lukulu.’ ”

⁶ Nayo Isilayeli yakatya, “Ka! Wanangu, alu nhawulenyi nye mukamulonjela munhu yuyo vyono mwina mwanakwawenyu yunji mudodo, alu'ne nha mwanhajila mu magayo no muyenyu?”

⁷ Nawo wakamupitula sogo yawo wakatya, “Gwe baba, u munhu yuyo, yaciwuza wuza muno muli zetu hamonga na ze mhuga yetu. Yaciwuza yakatya, ‘Wulenyi, sogo yenyu yakali cawumi? Wulenyi hoyuli manakwawenyu yunji?’ Hodu nase cikawa kumupitula nha vyono yaciwuzaga mweneco. Alu baba, ase cali cimanye wule vyono kocilonjela yatye, ‘Mumuletaje na Benyamini u mwanakwawenyu mudodo?’ ”

⁸ Hodu Yuda yakawa kumulonjela sogwe Isilayeli yakatya, “Baba, nghombolaje nene mbite nayo, cilekaje cituluce kamonga cibite cikahemele zindigwa, ho cilece kufwa ne nzala, gwegwe hamonga ne wana wetu.

⁹ Nene no mweneco nomulanjilila. Agwe wunangaje nene du. Hono ndece kumugomola wumuwone ne meso gako gwegwe mweneco, ale lisutya lyeze lyangu nene cibitilila.

¹⁰ Sunga na lulu hono cali cilece kucela, mhali baha cakondya kubita no kuwuya kali kejete.”

¹¹ Nayo Isilayeli sogo yawo yakawalonjela yakatya, “Alu hono yiwe nhavivyo vyo yawa yinha, ale munoze nhavi: Musole mikalo miswanu mutajile mu viya vyenyu, mumutegulile cipegwa muwaha yuyo. Mumutegulilaje hamonga ne mafuta madodo ge mhunjile swanu, hamonga no wuci wudodo, no wuvumba, ne manemane, hamonga na jozi na lozi.

¹² Musoleleze hamonga ne zipesa ziwe kali kejete kuciza zono zosakwa, vyono munojeye muzigomole zipesa azilya zono zali zili mu milomo ye zimhinda zenyu, na lunji kowa si zali zinojeye muwuye nazo.

¹³ Ale, mumusolaje na Benyamini u mwanakwawenyu mubitane nayo sunga ko kuli munhu yuyo.

¹⁴ Muwaha Mulungu komuwonelenyi lusungu hali munhu yuyo, ho yamuwopolelenyi no kumulecelenyi muyenyu Simiyoni hamonga na Benyamini. Ane lu ku lubavu lwangu, hono yinojeye wanangu wajilile, ale hodu du lece wajilile!”

¹⁵ Ale, wakawa kuvisola vipegwa wakasola zipesa nyinji kali kejete si nha zinongozi, wakawa kubita ku Misili hamonga na Benyamini u mwanakwawawo. Nawo wali weza kufika ku Misili, wakabita sunga kuli Yusufu, wakawa kwima ha mwande yakwe.

¹⁶ Nayo Yusufu yali yeza kumuwona Benyamini yali hamonga nawo, hodu yakawa kumulonjela mulindilizi we nyumba yakwe, yakatya, “Ale, wategulaje wanhu awano ku kaya, wusole mutugo wuwuwulaje no kuwikaniza ndigwa, hambi izuwali nha colizana nawo zindigwa ze misi.”

¹⁷ Nayo mulindilizi yuyo, yakanoza nha vyono yalajilizwa, yakawa kuwategula wajenzi wawo ku kaya kwa Yusufu.

¹⁸ Nawo wali weza kuwona vyono wakutegulwa ku kaya kwa Yusufu, hodu woga wukawebata muno muno, wakawa kwanza kulongana weneco wose wakutya, “Alu mwene nye, wacileta kukuno ku soko ye zipesa zizilya zono cikagomolelwa lululya lono caziza muhinzo mulongozi lo, ho yatuje cikojelwa co kucihungucila no kuciboka zindogowe zetu, yacinoze ciwe wetumami wakwe.”

¹⁹ Holeka wakawa kumubitila yu yulya mulindilizi we nyumba ya Yusufu, wakamulonjela lono yali yemile ha mulango,

²⁰ wakatya, “Cikulomba wucinenelaje muwaha, ase yo sese mono ha lulongozi cikaza kuhemela ndigwa bahano.

²¹ Na lono cawuyaga kwetu, cali ceza kufika hanhu ho kugona wajenzi mu nzila, cikawa kuziwopola zimhinda zetu, nase cikezina muno, cali ceza kuwona zipesa zetu, mu milomo ye zimhinda zetu wose, hamba kupamizwa bwete. Alu cazigomola zipesa zizo.

²² Hamba si cimanyile nani mono yaciwicila kanyhi zipesa zizo mu zimhinda zetu. Ninga aluno cileteleza ne zipesa zinji kanyhi zo kuhemela zindigwa.”

²³ Nayo mulindilizi yu yulya yakawapitula yakatya, “Nye wayangu, mulece kwihwelela hamba kuwa no woga. Mulungu wenyu, u Mulungu wo sogo yenyu, yo yuyo mono yamugomolelenyi zipesa zizo mu zimhinda zenyu. Ninga ane nha nazibocela zipesa zangu.” Hanyuma yakawa kumuleta muyawo Simiyoni hali wene.

²⁴ Nayo u mulindilizi yuyo, yakawa kuwenjiza mu kaya ya Yusufu, yakawapela malenga ho wezuguze migulu yawo, yakawa kuzilisa ne zindogowe zawo.

²⁵ Nawo wakawa kuviwikaniza vipegwa vyawo ho wamupele Yusufu, hambi nha wali wakondya kuhulika vyono wolizana nayo.

²⁶ Nayo Yusufu yali yeza kuwuya ha kaya, wene wakamuletela vipegwa vyono wali wena navyo, wakamwinamila.

²⁷ Nayo Yusufu yali yeza kukondya kuwatambuza, ale, yakawa kuwawuza yakatya, “Nghumbuciye vyono mwanonjela zo sogo yenyu, Alu wulenyi, muswanu? Wulenyi yakali cawumi?”

²⁸ Nawo wakamupitula wakamutya, “Mwitumami wako sogo yetu, yali baho muswanu du, yakali cawumi.” Hanyuma wakawa kumwinamila so cogopo.

²⁹ Nayo Yusufu yelanje nhavi, yakawa kumuwona mwanakwawe Benyamini, u mwana wo nyina, hodu yakawa kutya, “Nitumbiye vyono ayuno yo Benyamini u mwanakwawenyu mudodo mono mwanonjela. Ale du Mulungu yakumotye mwanangu!”

³⁰ Hodu Yusufu yakawa kuwuka musunho hanhu baho, hambi mahozi nha galengalengaga mu meso gakwe ku soko ye cisukwa co mwanakwawe Benyamini. Yakawa kwinjila mu cumba cakwe yakalila muno.

³¹ Nayo yali yeza kukondya kwizuguza ha meso, hodu yakawa kulawila akuno yakwikamiliza, yakalajiliza zindigwa zitengwe.

³² Wakamutenjela Yusufu ndigwa yakwe du yali wene, wawahaze nawo wakatenjelwa ndigwa yawo nawo wali wene, kanyhi sunga ne Wamisili wono vyalizanaga nayo nhondo zose, nawo nhavivyo, wakatenjelwa ndigwa yawo nawo wali wene, hambi nha iwifyo kuli Wamisili kulizana ndigwa hamonga ne Wahebelaniya.

³³ Nawo wawahaze wa Yusufu wakekala ha mwande ya Yusufu nha vyono wali wetyatizye mu ndelwa yawo, kwamuliziza u mulongozi kulelwa, sunga wo mudumo, nawo wakawa welanjile ko wizine wuwaha.

³⁴ Ne ndigwa yasolwaga ha meza yono yali yekaye Yusufu, ho wawa kuwategulila wene. Ninga Benyamini yakagawilwa ndigwa yono yali yicizize nghanghulo yihano ye nghango yono wapegwa i wawahaze. Ale du, wakang'wa no kusangalalana nayo.