Mwamulizo 41 - Luganuzi Luswanu Kuli Wanhu Wose 2002

Yusufu yakulolosa ndoto zo Mutemi Falawo

¹ Kukawa yali yeza kupuluta myaka myejete, Falawo nayo yakalota ndoto, yakalota yemile ha nyenje ye likolongo lya Nile.

² Na lono yali yemile baho, yakawona ng'ombe zili mupunghati zijinile kanyhi swanu muno, zikulawilila mwi'kolongo, zikulya mahanze.

³ Hanyuma kanyhi, yakawona ng'ombe zinji nazo zili mupunghati, zikulawilila mwi'kolongo lya Nile, nazo zikawa zigandile muno muno, mafupa gose du, nazo zikaza behi na zizilya zing'ombe zono swanu zijinile muno muno ha nyenje ye likolongo.

⁴ Ati lanje, zing'ombe zizilya zo mupunghati zono zali swanu, kanyhi zijinile muno muno, zikawa kuligwa na zizilya zing'ombe zo mupunghati zono zali zigandile mafupa gose. Hodu, Falawo yakawa kusinhuka mu zinhongo.

⁵ Nayo yali yeza kugona kanyhi, yakalota kanyhi lwe kejete. Na mu wulote wakwe, yawona maso mupunghati mawaha, maswanu, gakucindika mwi'sina limonga.

⁶ Na hanyuma ya zizo, maso ganji kanyhi gali mupunghati, nago gakacindika mu nyuma yayo, gono masisili, kanyhi gagugumiye so mbeho ya kucilima.

⁷ Gago i maso go mupunghati gono gali gagandile, gakagamela i maso go mupunghati gono gali maswanu, kanyhi gena mhece nyinji. Ninga Falawo yali yeza kusinhuka mu zinhongo, yakatanga vyono zali ndoto du.

⁸ Wali weza kwela hakali mitondo, Falawo yali yazinguce muno muno. Ale, yakawa kulajiliza i waganga wose na we mahala wose wa mu yisi ya Misili waze kuli mwene. Nawo wali weza kuza, Falawo yakawalonjela ze zindoto zakwe, ninga hasina hamba monga mono yasuma kumuloloseza Falawo nhunizo ye zindoto zizo.

⁹ Hobaho yuyulya mulindilizi muwaha we ving'wegwa, yakamulonjela Falawo yakatya, “He, nagakumbucila masutya gangu zuwali!

¹⁰ Bahalya lono wacikolelwa likuwo ase co wetumami wako, ane hamonga no muyangu muteleci muwaha we mikate, wumanyile vyono wacidindila mu nyumba yo mulindilizi muwaha we cipuga ce walindilizi.

¹¹ Na mwi'zuwa linji ne cilo, ase calota ndoto, munhu na ndoto yakwe, yono yina nhunizo yono yisimajiye ne ndoto yo muyagwe.

¹² Na mumo, mwali na muzelelo yunji Muhebelaniya, mwitumami wo muwaha we cipuga ce walindilizi, mwene nayo yali yali hamonga nase mumo mu jela. Nase cali ceza kumulonjela ze zindoto zetu, ale, mwene yakasuma kuciloloseza nhunizo ye zindoto zetu munhu na lwakwe nha vyono yali yinha ndoto yakwe.

¹³ Na vyono yalolosa, yo nhavivyo du vyo zikawa, ane nghagomolwa mu mulimo wangu, na ayulya muyangu muteleci muwaha we mikate, yakatumbikwa mwi'bici.”

¹⁴ Hodu hobaho, Falawo yakalajiliza Yusufu yaletwe. Nayo yakawa kuwuswa mu jela mbela mbela. Nayo Yusufu yali yeza kukondya kwinyonyola zimvwili zakwe, no kukawaniza vivwalo vyakwe, yakawa kuza ha mwande ya Falawo.

¹⁵ Nayo Falawo yakamulonjela Yusufu yakatya, “Ane ndota ndoto, ninga hasina hamba munhu monga mono yasumile kundoloseza nhunizo yayo. Nane hulika zo lukumyo lwako, nha vyono agwe hono wulonjelwe ndoto hamba yiwe vyono yinha, kosuma du kuyilolosa nhunizo yayo.”

¹⁶ Nayo Yusufu yakamupitula Falawo yakamutya, “Ane mutemi, sina vilungo vyo kusumila kukuloloseza nhunizo ye ndoto yako, ninga u Mulungu yo kokupela lipitulo lyono likwiliye.”

¹⁷ Baho Falawo yakawa kwanza kumuloloseza Yusufu ze ndoto yakwe, yakatya, “Ane nghalota nimile ha nyenje ye likolongo lya Nile.

¹⁸ Nane nghawona ng'ombe mupunghati swanu kanyhi zijinile muno, zikulawilila mwi'kolongo, zikulya mahanze.

¹⁹ Lanje, ku nyuma yazo, zikalawila kanyhi ng'ombe zinji mupunghati, ziwipile muno, kanyhi zigandile muno, zigogodaye, mafupa gose du, nane nghali sinawona hamba hadodo ng'ombe zono zinha zizi mu yisi yose ya Misili.

²⁰ Zing'ombe zizilya zo mupunghati zono zijinile, zikawa kuligwa na zizilya zono zigandile.

²¹ Ninga na lono zali zakondya kuzilya azilya zing'ombe zono zijinile, hamba nhavivyo hasina munhu mono kosuma kumanya nha vyono zo zene zono ziziliye azilya zinzawo, hambi nha zali zikali vyo zigandile du nha halulongozi. Hodu nane nghawa kusinhuka mu zinhongo.

²² Na mu ndoto yinji nayo, nghawona maso go 'hemba gali mupunghati, maswanu kanyhi gamemile mhece, gakutula mwi'sina limonga.

²³ Na mu nyuma yayo, gawa kwijela kanyhi maso ganji mupunghati, gono gagugumiye gasina mhece, masisili, kanyhi ganyalile ku so mbeho ya mu nyika.

²⁴ Alu, gagalya i maso mupunghati masisili, gakawa kugamela i maso gagalya go mupunghati gono gena zimhece. Nane nghawa kuwalonjela waganga ze zindoto zangu zizo, ninga hasina hamba monga muli wene mono yasuma kundoloseza nhunizo yayo.”

²⁵ Nayo Yusufu yakamutya Falawo, “Ndoto zako zose vyono nyejete, zina nhunizo monga du. Mulungu kakugubulila zono kozinoza mu vilo vivi.

²⁶ Ng'ombe zizilya zo mupunghati ziswanu, yo myaka mupunghati, ne maso nago gagalya go mupunghati maswanu, nago yo myaka mupunghati nhavivyo, ndoto yo monga du.

²⁷ Ng'ombe mupunghati zizilya zono zigandile, zono zazityatya azilya zono zijinile, ne maso gagalya mupunghati gono gapuluywe, ganyalile so mbeho ya mu nyika, nhunizo yayo, yo myaka mupunghati ye lizala.

²⁸ Nha vyono nghulonjeye 'gwe Falawo, Mulungu kakugubulila zono kozinoza mu vilo vivi.

²⁹ Kowa na myaka mupunghati ye ciguto mu yisi yose ya Misili.

³⁰ Ninga hanyuma yayo, yokuza myaka mupunghati yono yolowa nzala, yono yonoza wanhu wasemwele lukulu ciguto. Ne nzala yiyo yoyongomezeza lukulu yisi yiyi.

³¹ Wanhu wosemwela lukulu ciguto, vyono nzala yiyo yono yikuza, yolowa mbaha muno muno.

³² No wuwuyajile we ndoto yako, 'gwe Falawo, yikukulajila vyono Mulungu yalamula, nayo kozituma zizo mu vilo vivi du.

³³ “Holeka alu, yowa viswanu, 'gwe Falawo, wumuwice munhu monga mono yena wizuce ne mahala, wumupele mulimo wo kuyilanjilila yisi yose ya Misili.

³⁴ Kanyhi 'gwe Falawo, wuwawikaje walanjilizi wanji mu muno mono yisi, wuwalonjele wakonghole lifungu lye yihano, kwe kumi ye zindigwa zose za mu myaka yiyi mupunghati ye ciguto.

³⁵ Wuwalonjelaje wawo walanjilizi, wakonghole zindigwa zose mu myaka yiyino mupunghati, yono yikuza, ye nhwanga mbaha. No wuhemba wose wuwikwe mu wulanjilizi wako 'gwe Falawo, nawo wuwe ciwutwa ca ndigwa kuli makaya gose, nawo yiwanojeye wawukamise viswanu wuhemba wuwo.

³⁶ Ne ndigwa yiyo cowa ciwutwa cono coyitaza yisi ya Misili, ho yisi yilece kutecemela ne lizala mu myaka mupunghati yono yikuza.”

Yusufu yakunozwa muwaha we yisi ya Misili

³⁷ Nghani yiyi yikejela swanu hali Falawo, hamonga ne wetumami wakwe wose.

³⁸ Holeka Falawo yakawa kuwawuza wetumami wakwe, yakutya, “Alu comutuga hayi munhu yunji mono yehwanile yuyuno, munhu mono yena muhe wo Mulungu?”

³⁹ Hanyuma yakawa kumutya Yusufu, “Alu vyono Mulungu kakugubulila gwegwe zizi zose, na vyono hasina munhu yunji mono yena wizuce ne mahala nha vyono winha gwegwe.

⁴⁰ Alu yo gwegwe du mono koyilanjilila yisi yangu, ne wanhu wangu wose, wowa wali hasi yo wulajilize wako. Ane yo nowa muwaha du kuciza agwe, vyono ane yo nene mono nikaye mwi'goda lyo wutemi.

⁴¹ Holeka ku wulawa lulu, nakondya kukuwika gwegwe wuwe muwaha mu yisi yose ya Misili!”

⁴² Baho, Falawo yakawa kuyiwopola nyamwidole yakwe ye citanjilo mu cidole cakwe, yakawa kumuvwika Yusufu, yakawa kumuvwaliza no mwenda wo wuhamba wuswanu, hamonga no mukufu wa zahabu mu singo yakwe.

⁴³ Falawo yakawa kumuwika mucanyha ye ligali lyakwe lye kejete, lyono lyali kukwegwa ne zifwalasi, ne walanjilizi wakalongola ku mwande ya Yusufu, akuno wakuzoza wakutya, “Ale, mufugame wose!” Ale du, Falawo yakamupela Yusufu wulajilize wuwaha muno mu yisi yose ya Misili.

⁴⁴ Hamonga na zizo, Falawo yakamulonjela Yusufu yakatya, “Ane nene Falawo nghulavya wulajilize, nghutya nhavi, hono si wukomboye gwegwe, munhu wo wose yalece kwinula muwoko wakwe hamba mugulu wakwe mu'si yose ya Misili.”

⁴⁵ Falawo yakamucemela Yusufu, litagwa lye Cimisili, lya Zefanati-paneya. Yakawa kumutoza mugolece mono yakucemwa Asenati, mwana we cicekulu wa Potifela u mukohani we likaya lya Oni. Hobaho baho nayo Yusufu, yakawa kwanza kuyijendela yisi yose ya Misili.

⁴⁶ Yusufu yali yaficila myaka makumi madatu lono yamulila kumwitumamila Falawo, mutemi wa Misili. Nayo yatulucila mwi'kulu lya Falawo, yakawa kubita kuyijendela yisi yose ya Misili.

⁴⁷ Na mu myaka yiyilya mupunghati ye ciguto, migunda yikafisa ndigwa nyinji muno muno.

⁴⁸ Nayo Yusufu yakakonghola ndigwa yose mu myaka yiyo ye ciguto, yakawa kuyiwika ciwutwa mu makaya ga Misili. Nayo yakawika ciwutwa mu makaya gose, wulawa mu ndigwa yono yalawaga mu migunda ye behi behi ne likaya lilyo.

⁴⁹ Yusufu yakawika ciwutwa ca wuhemba winji muno muno, winha musawawa wa mwi'lenga, hamba siwasumika sunga no kuwupima kose.

⁵⁰ Na lono myaka ye nzala yali yikali sinanza, Yusufu yali yakondya kutuga wana wejete kuli mugolece wakwe Asenati, mwana we cicekulu wa Potifela u mukohani we likaya lya Oni.

⁵¹ Yusufu yakamucemela mwanagwe mulongozi litagwa lya Manase, yakutuniliza yakutya, “Mulungu kanoza ho semwe magayo gangu gose, hamonga na za mu mhuga yose ya baba.”

⁵² No mwanagwe we kejete nayo, yakamucemela litagwa lya Efulayimu, yakutuniliza yakutya, “Mulungu kamhelela wana mu yisi ye magaziko gangu.”

⁵³ Ale, myaka yiyilya ye ciguto mu yisi ya Misili, yikapuluta.

⁵⁴ Yikawa kwanza i myaka ye lizala, nha vyono yali yalonjile Yusufu ha mwamulizo. Ne zisi zinji zose nazo, nhavivyo, zikenjililwa na nzala mbaha muno. Ninga yisi yose ya Misili du, yo yikawa yina ndigwa.

⁵⁵ Na mwi'pango lyono wanyawusi wa Misili wali weza kwinjilwa ne lizala, wakamulilila Falawo yawapele ndigwa. Nayo Falawo yakawa kuwalonjela Wamisili wose yakawatya, “Ale mubite kuli Yusufu, nanye mwitumaje nha vyono komulonjelenyi.”

⁵⁶ Nzala yikacila kuwa mbaha muno muno, yikatandala mu yisi yose ya Misili. Nayo Yusufu yakawa kuzidigula zinyumba zose ze viwutwa vyo wuhemba, yakawa kuwaguziza zindigwa Wamisili.

⁵⁷ Hamonga na zizo, wanhu wakalawa mbavu zose ze yinze, wakaza ku Misili kuli Yusufu kuhemela wuhemba, hambi lizala nha lyali litandaye lulo mu yinze yose.