Mwamulizo 40 - Luganuzi Luswanu Kuli Wanhu Wose 2002

Yusufu yakuzilolosa zindoto ze wafungwa

¹ Kukawa hanyuma ya zizi, mulanjilizi muwaha we ving'wegwa, hamonga no muteleci muwaha we mikate wo mutemi wa Misili, wamusutizya muwaha wawo, mutemi wa Misili.

² Nayo Falawo yakawakolelwa likuwo wawo walanjilizi wakwe wawaha wejete, u mulanjilizi muwaha we ving'wegwa, hamonga no muteleci muwaha we mikate.

³ Yakawa kuwadindila mu jela, mu nyumba yo muwaha we cipuga ce walindilizi, mu jela mono nayo Yusufu yali mudindile.

⁴ Nayo muwaha we cipuga ce walindilizi, yakamuhagula Yusufu, yo yawetumamile. Nawo wakawa mumo mu jela kwa vilo vilo.

⁵ Ikawa mwi'zuwa linji mumo mu jela, wawo wafungwa wejete, mulanjilizi muwaha we ving'wegwa na yuyulya muteleci muwaha we mikate wo mutemi wa Misili, wakalota ndoto munhu na ndoto yakwe, ne zindoto zose zikawa na nhunizo zono zisimajiye.

⁶ Nayo Yusufu yali yeza kubita hakali mitondo kuwawona, yakawagana wose vyono wejete wasina nyemo hamba nhavi.

⁷ Nayo Yusufu yakawawuza wawo wetumami wawaha wa Falawo, wono wali wali mu jela hamonga nayo mu kaya yo muwaha wakwe, yakawatya, “Alu nhawulenyi zuwalili musina nyemo?”

⁸ Nawo wakamupitula wakatya, “Ase cilota ndoto, na hasina baha hamba munhu monga mono yakusuma kuciloloseza nhunizo ya zizo zindoto zetu.” Nayo Yusufu yakawatya, “Ninga mumanye vyono yo Mulungu du mono kaletaga wusume wo kulolosa zindoto. Ale ta nonjelenyi zindoto zenyu.”

⁹ Nayo mulanjilizi muwaha we ving'wegwa wo Mutemi, yakamuloloseza Yusufu ze ndoto yakwe, yakatya, “Ane mu wulote wangu, nghawona muzabibu ha mwande yangu,

¹⁰ nawo wali wina manhambi madatu. Nawo wali kotya wukutula, ne maluwa gakubonhola, ne vinhambi vyayo vyali vilelile ne zizabibu zipiye.

¹¹ Na mu muwoko wangu, nali nibate cikombe ca Falawo, nane niwa kuzihepa zizabibu, niwa kuziminyila mu cikombe cico, niwa kumupela Falawo nayo kawa kubocela.”

¹² Nayo Yusufu yakawa kumulonjela yuyo mwitumami yakutya, “Nhunizo yayo yoyi: Gagalya i manhambi madatu, vyo vilo vidatu.

¹³ Kolo vyeza kupuluta vilo vidatu, Falawo kokuwusa mono jela, nayo kokugomola mu mulimo wako kanyhi. Nagwe kowa kumupela kanyhi Falawo i cikombe nha vyono wetumaga halulongozi, lono wali wuli mulanjilizi muwaha we ving'wegwa.

¹⁴ Ninga ane nghukunena, wunghumbucilaje nane kolo zakuwela swanu, nane wunhazilize, nghukunena wulitambulaje tambulaje litagwa lyangu kuli Falawo, nane ho sume kulawila mono jela.

¹⁵ Ane ha mwamulizo, natoloswa ku wulawa ku yisi ye Wahebelaniya, na bahano hono Misili, nghali hamba si ninetuma nghani yinji yo yose 'mbi, yono yali yinyambuze ho ndindilwe mu muno mono jela.”

¹⁶ Nayo u muteleka mikate yali yeza kuwona nhunizo ye ndoto yo muyagwe vyono swanu, hodu nayo yakawa kumutya Yusufu, “Gwe Yusufu, hamba na nene nane ndota ndoto! Na mu wulote wangu, nali ndinghuye mu mutwe wangu maheneko madatu ga mikate.

¹⁷ Na mwi'heneko lyono lyali lili mucanyha, mwali mozili ndigwa nyanywe ze mawala gose, ku soko ya Falawo. Ninga zindeje zikawa kuzilya zindigwa zizo zono zali zili mwi'heneko mu mutwe wangu!”

¹⁸ Nayo Yusufu yakamulonjela yakamutya, “Nhunizo ye ndoto yako yoyi: Gagalya maheneko madatu, vyo vilo vidatu.

¹⁹ Kolo vyeza kupuluta vilo vidatu, Falawo kokudumula mutwe wako, yakutumbice mwi'bici, no muwili wako, woligwa ne zindeje.”

²⁰ Na mwi'zuwa lye kadatu, lyono lyali lye 'zuwa lyono yalelelwa Falawo, Falawo yakawanozeza ndigwa wetumami wakwe wose. Yakawa kuwalavyaniza mu jela u mulanjilizi wakwe muwaha we ving'wegwa, hamonga no muyagwe u muteleka mikate muwaha, yakawaleta wose ha mwande ye wetumami wakwe wawaha.

²¹ Yakawa kumugomola ayulya u mulanjilizi muwaha we ving'wegwa, nayo ku wulawilila baho, yakawa yakumupela Falawo cikombe mu muwoko wakwe.

²² Ninga ayulya u muteleci muwaha we mikate, yakamutumbika mwi'bici, nha vyono Yusufu yali yakondya kuwalonjela mu zinhunizo ze zindoto zawo.

²³ Ninga hamba nhavivyo, ayulya u mulanjilizi muwaha we ving'wegwa, yakawa kumusemwa Yusufu, hamba si yamukumbucila yaye.