Mwamulizo 39 - Luganuzi Luswanu Kuli Wanhu Wose 2002

U mugolece wa Potifa na Yusufu

¹ Nayo Yusufu yali yeza kutegulwa ku Misili, Potifa, Mumisili, mwitumami muwaha wa Falawo, mono yali yo muwaha we cipuga ce walindilizi ca Falawo, yuyo yakamugula Yusufu ku wulawa mu miwoko ye Waishumayeli wono wamuleta ku Misili.

² Nayo Muwaha Mulungu yakawa yali hamonga na Yusufu, yakamumotya muno muno. Nayo Yusufu yekalaga mu nyumba yo muwaha wakwe Mumisili.

³ Nayo muwaha wakwe, yakatanga vyono Muwaha Mulungu yali hamonga na Yusufu, na vyono Mulungu yo yakuvimotesa vyose vyono Yusufu yakuvituma.

⁴ Na ku soko yiyo, holeka Yusufu yakavumilwa muno ha mwande ya Potifa, sunga Potifa yakamunoza Yusufu yali wene du, yo yawe mwitumami wakwe mweneco. Kanyhi yakamunoza yawe yo mulanjilizi we nyumba yakwe yose, kanyhi yo yawe mulanjilizi we sawo yakwe yose.

⁵ Na ku wulawa lono Potifa yamunoza Yusufu yo yawe mulanjilizi we nyumba yakwe yose, kanyhi yawe mulanjilizi we sawo yakwe yose, Muwaha Mulungu, yakayilugutiza muno kaya yiyo ya yuyo Mumisili, ku soko ya Yusufu. Muwaha Mulungu, yakavilugutiza vinhu vyose vyono yali yena navyo Potifa, mu kaya yakwe hamba ku mugunda.

⁶ Na ku soko yiyo, Potifa yakawa kumulecela Yusufu, zisawo zakwe zose, hamonga ne vinhu vyose yavilanjilile, nayo Potifa hamba si yasaka yamanye cinji, langa yo ndigwa yono yalizaga du. Nayo Yusufu, yali muzelelo mono, yali yena futa swanu kanyhi yali muswanu, mono yakwendeza muno.

⁷ Kukawa hanyuma ya zizo, u mugolece wa Potifa, yakawa kwanza kumusulumila Yusufu, na hanyuma yakamusaka yagone nayo.

⁸ Ninga Yusufu yakalema. Yakamulonjela yuyo mugolece wo muwaha wakwe yakatya, “Gwe yaya, wulanje ta, ku wulawa wuze wangu bahano, u mulume wako si yakwigaza na cinji co cose hono kaya, mwene yanghomboleye nene sawo yakwe yose.

⁹ Na mono kaya yi yino hasina kanyhi yunji muwaha mono yanyhizize ane. Kanyhi mulume wako yakali hamba nanemeza cinhu co cose, langa yanemeze gwegwe du, vyono agwe yo gwegwe mugolece wakwe. Holeka alu, ho nosuma wule kuwituma wubi wuwaha wono winha wuwo, nimusutizye Mulungu?”

¹⁰ Ninga hamba yiwe nhavivyo, u mucekulu yuyo, yajendelela kumukwejeleza Yusufu kali kenji, ho vigone nayo, ninga Yusufu hamba siyalumbila lukulu vigone nayo, hamba kuduwana duwana nayo du bwete.

¹¹ Ninga mwi'zuwa linji, lono Yusufu yali yenjila mu nyumba ho yajendelele ne milimo yakwe ye nhondo zose, na mwipango lilyo, i wetumami wanji wose wali wali hasina mukaya,

¹² hodu yuyo mugolece wa Potifa, yakamwibata Yusufu civwalo cakwe, no kumusaka vigone nayo. Ninga Yusufu yakesukula yakatiziza kunze, yakacileka civwalo cakwe mu muwoko wo mugolece wa Potifa.

¹³ Nayo mucekulu yuyo yali yeza kuwona vyono Yusufu yamulecela civwalo cakwe yamanyhila kunze,

¹⁴ hodu yakawa kuwacema wetumami wa mu kaya yakwe, yakawalonjela yakutya, “Ta mulanje, ciletelwa Muhebelaniya ayu, ho yaze yacikoze cevu. Lanjenyi ta vyono kanyiziza, yakusaka kunyibata kwe vilungo, nane niwa kuzoza.

¹⁵ Nayo yeza kuwona nghuzoza, hodu kawa kucileka civwalo cakwe, kawa kutiziza kunze.”

¹⁶ Hodu u mucekulu yuyo yakawa kuciwika civwalo cico, sunga mulume wakwe yakawuya ha kaya.

¹⁷ Nayo yakamusimuliziza zose, yakutya, “Ayu muwanda we Cihebelaniya mono waciletela wayiko, kanyiziza ho yanghoze cevu.

¹⁸ Ninga neza zoza du, hodu kawa kucileka civwalo cakwe kawa kutiziza kunze.”

¹⁹ Nayo Potifa yali yeza kuzihulika zizo ko mugolece wakwe vyono, “Nhavivino vyo yali kusaka kunhendela u muwanda wako.” Potifa yakakolwa muno muno ne likuwo.

²⁰ Hodu yakawa kumusola Yusufu yakawa kumutajila mu jela, hanhu hono wali wafunjigwe wahodanji wo mutemi.

²¹ Ninga Muwaha Mulungu yakawa yali hamonga na Yusufu, Mulungu yakamunoza Yusufu mu nghango yo kumupela wendezwe ha mwande yo mulanjilizi we jela.

²² Nayo u mulanjilizi we jela, yakamuwika Yusufu yawe mulanjilizi we wafungwa wose mumo mu jela, na zose zono zetumwaga mumo, zetumilwaga mu wulajilize wakwe Yusufu.

²³ Nayo mulanjilizi we jela, hamba si yepiganzaga na cinhu cinji co cose, cono cali cili mu wulanjilizi wa Yusufu. Hambi Muwaha Mulungu nha yali yali hamonga na Yusufu, yakuvilugutiza vyose vyono Yusufu yetumaga.