Mwamulizo 38 - Luganuzi Luswanu Kuli Wanhu Wose 2002

Yuda na Tamali

¹ Na mu vilo vivyo, Yuda yakawaleka wanduguze, mwene yakabita kwikalana na munhu yunji Mwadulamu, litagwa lyakwe Hila.

² Nayo Yuda lono yali yali kuko, viketang'anila na mwana we cicekulu wa Shuwa, Mukanani, hodu vikawa kwitola nayo.

³ Nayo muhinza yuyo mwana we cicekulu wa Shuwa, yakawa kudinghula 'nda, yakalela mwana wa cilume, yakamupela litagwa lya Eli.

⁴ Kanyhi yakadinghula muda wunji, yakalela mwana wa cilume kanyhi, wakamucemela litagwa lya Onani.

⁵ Hanyuma kanyhi yakatuga mwana yunji wa cilume, nayo wakamucemela litagwa lya Shela. Nayo Shela lono yalelelwa, Yuda yali yali ku Kezibu.

⁶ Yuda yakamutoza Eli mwanagwe mulelwa mulongozi kuli mucekulu litagwa lyakwe Tamali.

⁷ Ninga yuyo Eli u mulelwa mulongozi kuli Yuda, yali munhu mubi muno hali Mulungu, holeka Muwaha Mulungu yakamuwulaga.

⁸ Nayo Yuda yakamutya Onani, “Ale wumusolaje mugolece wo muwahawo, hambi nha vyo yikunojeye witume, ho wusume kumulelela muwahawo wana.”

⁹ Nayo Onani yali yamanyile vyono i wana wawo wono kolela, wowa si wana wakwe. Holeka Onani lono yagonaga no mugolece yuyo wo muwahawe, mwene yamwajilaga hasi zimbeyu zo lulelo, ho yalece kumutujila muwahawe wana.

¹⁰ Ne litumo lilyo likamukalaza muno Muwaha Mulungu, yakawa kumuwulaga na Onani nhavivilya.

¹¹ Hodu, Yuda yakawa kumulonjela Tamali, mugolece wo mwanagwe Eli, yakatya, “Gwe mwanangu Tamali, ale wuwuye ku kaya ko sogo, wukekale nha mufwile sunga lono mwanangu Shela kolowilucila.” Ninga Yuda yogopaga yakutya, kololeka Shela nayo yafwe bwete nhe wawahaze. Tamali yakawa kuwuya ku kaya kuli sogwe.

¹² Vyaza kupuluta vilo vicefu, mwana we cicekulu wa Shuwa, u mugolece wa Yuda, yakawa kufwa. Nayo Yuda yali yeza kutuga wusindamikwe, yakatuluka hamonga no mwiyendi muyagwe litagwa lyakwe Hila, Mwadulamu. Wakawa kubitana ku Timuna kuli wono wazicenyenhaga zingholo zakwe.

¹³ Nayo Tamali, yali yeza kuhulika vyono mukwewe Yuda yali yali mu nzila yakubita ku Timuna, ku wucenyenha zingholo zakwe,

¹⁴ mwene Tamali yakawa kuyivula myenda yakwe yo wufwile, yakawa kwigubika ne shela ku wusu wakwe, ho yunji yalece kumumanya. Hanyuma yakawa kwikala ha mulango wo kwinjilila Enayimu, citumbi cono cali cili mu nzila ku wubita ku Timuna. Tamali yanoza nhavivyo, vyono yawona Shela yeza munhu mututu, ninga hamba si yakombolwa ho vitole nayo.

¹⁵ Nayo Yuda yali yeza kumwagana Tamali baho, yakehwesa vyono wo wacekulu wasenyha, hambi Tamali nha yali yegubicize ku wusu.

¹⁶ Hodu Yuda yakawa kumubitila baho ha mhelo ye nzila, yakamutya, “Alu wukutya nhawule, ane nakusaka.” Yuda hamba si yamumanya vyono yo mugolece wo mwanagwe. Nayo Tamali yakamutya, “Alu komhela cinhuci hono nghuvumile?”

¹⁷ Nayo Yuda yakatya, “Ane nokupela nyana ye mhene ya mwi'tewa lyangu.” Nayo Tamali yakamutya, “Ale wumhelaje cipingo cono colajila vyono kondetela yiyo nyana ye mhene.”

¹⁸ Nayo Yuda yakamuwuza yakatya, “Alu kosaka nghupele cinhuci?” Tamali yakatya, “Wumhelaje muhuli wako hamonga no mulejehe wayo, ne nghome yono wina nayo mu muwoko wako.” Hodu Yuda yakawa kumupela i vinhu vivyo vyose, yakawa kugona nayo. Tamali yakatuga muda.

¹⁹ Hanyuma Tamali yakawa kuwuka. Yakayiwusa shela yono yali yegubicize ku wusu, yakavwala kanyhi vivwalo vyakwe vyo wufwile.

²⁰ Yuda yali yeza kumutuma Hila Mwadulami mwiyendi muyagwe ho yamutegulile mucekulu yu yulya nyana ye ngholo, nayo ho yagomolelwe vinhu vyakwe vyono yamulecela, ninga Hila yamulondola Tamali hamba siyamuwona.

²¹ Nayo Hila yakawawuza wanyawusi yakutya, “Ati nye wayangu, mbonelenyi baha ayulya mucekulu musenyha mono yali yali ku Enayimu ha mhelo ye nzila?” Nawo wakamupitula wakatya, “Ase ahano hasina mucekulu wowose musenyha.”

²² Hodu, yuyo Hila yakawuya kwa Yuda yakamulonjela yakatya, “Wayiko, hamba sinimuwene yaye. Kanyhi hamba nhavivyo, i wanyawusi wa kuko wanonjela watya vyono kuko kwawo yakali sinekala mucekulu wo wose musenyha.”

²³ Yuda yakatya, “Ale hodu, lece cimulecele vinhu vivyo viwe vyakwe du, ho cilece kukozwa cevu bwete. Nagwe yo gwegwe kuhomelela vyono, ane nimutegulila nyana ye mhene, ninga agwe siwumuwene yaye.”

²⁴ Yaza kupuluta myezi midatu, Yuda yakalonjelwa vyono Tamali mugolece wo mwanago, alu yeweza musenyha, sunga nalu yadinghula'nda. Hodu, Yuda yakatya, “Mumulavyanize kunze yatakamizwe mu moto!”

²⁵ Ninga lono wamulavyanizaga kunze, Tamali yakatuma munhu kuli Yuda mukwewe, yakutya, “Munghala vinhu avino, yuyo yo yamhela muda wuwu. Holeka nghukunena wumumanyaje munhu yuyo munya muhuli awuno hamonga no mulejehe wayo, kanyhi ne nghome ayino.”

²⁶ Nayo Yuda yakavumila vyono vinhu vivyo vyose vyakwe mweneco, holeka yakatya, “Mwene Tamali yo yena ling'ani si nha nene no mweneco, ku soko vyono si namutoza kuli mwanangu Shela.” Na ku wulawa mwi'zuwa lilyo, Yuda hamba si yejelela kanyhi kugona na Tamali.

²⁷ Lidaha lya Tamali lyo kusawila lyali lyeza kufika, yikamanyika nha vyono kolela wana wejete wa metundu.

²⁸ Na lono yali yali mu wusungu wo kulela, mwana monga yakalavyaniza muwoko wakwe kunze, u mudala yakawuwopa na ciputi cidunghu, yakatya, “Ayu yo mulelwa mulongozi.”

²⁹ Ninga mwana yuyo yali yeza kuwugomoleza muwoko wakwe, hodu mwanakwawe yakawa kulelwa! Mudala yakamulonjela yuyo mono yalongola kulelwa yakamutya, “Alu 'gwe nhawule wukwipongholeza kwa vilungo nhavivi?” Holeka yakacemwa Pelezi.

³⁰ Hanyuma ho yakawa kulelwa u muwahawe akuno yena na cicilya ciputi cidunghu mu muwoko. Nayo yakacemwa Zela.