Mwamulizo 37 - Luganuzi Luswanu Kuli Wanhu Wose 2002

Ndoto za Yusufu

¹ Nayo Yakobo yakajendelela kwikala mu yisi ya Kanani, mumo mono yekala u sogwe nha mujenzi.

² Na azino ahano zo ndelo za Yakobo. Yusufu lono yali yakali muzelelo mudodo wa myaka yikumi na mupunghati, yadimaga zingholo ne zimhene, hamonga ne wanduguze i wana wa Biliha na Zilipa, i wagolece wo sogwe. Nayo Yusufu yakamuletela sogwe Yakobo nghani 'mbi za mu mikalile ye wanduguze.

³ Nayo Isilayeli yakawa yamwendile muno muno yuyu mwanagwe Yusufu, si nha wanagwe wanji wose, vyono yali yo mwana wo wukombi wakwe. Holeka yakamuhonela Yusufu kanzo nhali.

⁴ Ninga i wanduguze wali weza kuwona vyono sogo yawo yamwendile Yusufu si nha weneco, hodu wakamusula, hamba si walonganaga nayo kanyhi ko mulamu.

⁵ Mwizuwa linji ne cilo, Yusufu yakalota ndoto, nayo yali yeza kuwalonjela wawahaze, oho! Wene nhondo ho wakacila kumusula muno muno.

⁶ Mwene yakawalonjela yakutya, “Ta, muhulicize ndoto yono ndotile zuwali.

⁷ Ane ndota vyono, wose cali cili ku mugunda cikuwopa madulu ga ngano, na lanje ta, niwa kuwona lidulu lyangu likwima wima. Ne madulu genyu, gawa kwikongholela hamonga gose, gawa kulizinga haciligati lidulu lyangu, gawa kulinamila.”

⁸ Nawo wawahaze wakamuwuza wakatya, “Alu mwene, wukusaka kucilonjela vyono kowa mutemi wetu, hamba nhawule?” Na ku soko yiyo, wakacila kumusula muno muno ku soko ye zindoto zakwe hamonga ne zinghani zakwe.

⁹ Yusufu yakalota ndoto yinji kanyhi, nayo yakawalonjela wawahaze, yakatya, “Ta muhulicize, ane ndota ndoto yinji kanyhi, niliwona lizuwa no mwezi, hamonga ne zinyelezi yikumi na monga vikunyinamila.”

¹⁰ Ninga yali yeza kuwalonjela u sogwe hamonga ne wawahaze ze ndoto yiyo, u sogwe yakamukalipila muno muno, yakamutya, “Alu ndoto mucici yiyi yono wulotile? Alu, hongo mbeka, ane no sogo, hamonga no nyina yako, hamonga ne wawahazo, cokuza cikwinamile gwegwe sunga ho hasi?”

¹¹ Ale wanduguze wakamuwonela wivu, ninga u sogo yawo Yakobo, yakajendelela kuyihwesa muno nghani yiyo.

Yusufu yakuguzwa ne wanduguze no kutegulwa ku Misili

¹² Mwizuwa linji, lono wawahaze wa Yusufu, wali wabita kuwudima zimitugo zo sogo yawo Yakobo, behi na Shekemu.

¹³ Isilayeli yakamulonjela Yusufu yakamutya, “Gwe Yusufu, si kotya wumanyile vyono wawahazo wali ku wudimizi ku Shekemu. Holeka ane nghusaka nghutume kuko kuli wene.” Nayo Yusufu yakatya, “Ane nili baha baba wunhumaje.”

¹⁴ Nayo sogwe yakawa kumutya, “Ale, wubite wukawalanje wawahazo hamonga ne zimitugo, hono wawe wapolile, ale, wuze wunonjele nane manye.” Hodu Yakobo yakawa kumutuma Yusufu ku wulawa mwi'lolo lya Hebuloni, nayo yakawa kubita ku Shekemu.

¹⁵ Munhu yunji yakawa kumwagana Yusufu mu nyika, nayo yuyo munhu yakamuwuza Yusufu yakutya, “Alu wukulondola cici?”

¹⁶ Nayo Yusufu, yakamupitula, yakatya, “Ane nghulondola wawaha zangu. Holeka nghukunena wunonjele hanhu hono wakuzidimila zimitugo.”

¹⁷ Nayo munhu yu yulya yakamutya, “Nitumbiye vyono kowa wakondya kuwuka ahano, ku soko nawahulika wakulonga wakutya, ‘Vyono wakubita ku Dotani.’ ” Hodu Yusufu yakawa kuwatyatya wawahaze, nayo yakawagana kuko ku Dotani.

¹⁸ Nawo i wawahaze wali weza kumuwonela kutali yakuza, hodu wakawa kwilumbaniza wamuwulaje.

¹⁹ Wakalongana weneco wose, wakutya, “Ale, ayulya mulota zindoto yakuza.

²⁰ Alenyi cimuwulaje, ciwutaje muwili wakwe mwi'kombo linji. Hanyuma ase cotya vyono, lilimu lya mu mbago limuwulaga. Na hanyuma ho cowona zizo zindoto zakwe vyono zowa.”

²¹ Ninga Lubeni yali yeza kuzihulika zinghani zizo, yakasaka yamuponye Yusufu, holeka yakawatya wanduguze, “Dedede cilece kumuwulaga.

²² Mulecele lukulu kuyimwaga sakami. Langa ane nghuwona, yili ciba hono mumugwilize mwi'kombo alino ahano hono nyika, ninga mulecele lukulu kumutamisa.” Nayo yalonga nhavivyo, ho yasume kumuponya Yusufu mu miwoko yawo, hanyuma ho yamugomole ku kaya ko sogwe.

²³ Nayo Yusufu yali yeza kufika kuli wawahaze, hodu wene wakamuwopola kanzo yakwe.

²⁴ Hanyuma wakamusola, wakamugumila mwi'kombo. Ninga likombo lilyo nalyo lyali yikavu lisina malenga.

²⁵ Nawo lono wali wekala hasi wakulya zindigwa, wakawona Waishumayeli wapulutaga wali mu muhinzo wakulawa ku Gileyadi, wakubita ku Misili. Zingamiya zawo zali zidinghuye wuvumba, zeli na mane mane.

²⁶ Baho nayo Yuda yakawalonjela wanduguze yakatya, “Alu mwene nye, mwene ho cotuga cambuzici hono cimuwulaje yuyu mudodo wetu no kuhundika i cifwile cakwe?”

²⁷ “Ane nghuwona, yili ciba cimuguze kuli Waishumayeli wawano, ninga cilece kumutamisa yaye, hambi mwene nha mwanakwawetu, sakami monga na sese.” Nawo wanduguze vikelumbaniza nayo.

²⁸ Nawo Wamidiyani wasuluza wali weza kufika baho, wene wakawa kumukwega Yusufu ku wulawa mwi'kombo, wakamuguza kuli Waishumayeli kwa wuguzi wa fweza makumi mejete, nawo Waishumayeli wakamutegula Yusufu ku Misili.

²⁹ Nayo Lubeni yali yeza kubita ku kulya kwi'sima, hamba siyamwagana Yusufu mwi'sima. Hodu yakawa kuvidemulanga vivwalo vyakwe ko wukalale wuwaha muno muno.

³⁰ Yakawa kuwabitila wanduguze, yakawalonjela yakutya, “Nye, mwanakwetu, Yusufu yali musina mwi'sima, alu hamba nonoza nhawule?”

³¹ Hodu wakasola mhene wakayiwulaga, wakasola kanzo ya Yusufu, wakayizabika mu sakami ye mhene yiyo.

³² Wakawa kuyisola kanzo yiyo, wakamutegulila u sogo yawo, wakamutya, “Kanzo ayi ase ciyikuga, ale ta wuyilangaje wuyimanye hono yowa yo kanzo yo mwanago Yusufu hamba ng'o.”

³³ Nayo sogo yawo yakayimanya kanzo yiyo, hodu yakatya, “Heya yo yeneco! Ane nghuwona vyono kowa lilimu lya mu mbago limuwulaga, liwa kumulya. Mbeka Yusufu yilimu limuhawanga.”

³⁴ Baho Yakobo yakavidemula vivwalo vyakwe ko wukalale muno muno, yakawa kuvwala ligunila mu ciwino. Yakamulilila mwanagwe Yusufu vilo vinji muno.

³⁵ Nawo wanagwe hamonga ne wanagwe we cicekulu, wose wakamuziza ho wamusindamice, ninga mwene Yakobo siyasaka kusindamikwa, yakatya, “Nye wanangu, ane mundekaje ye, ane nojendelela kumulilila mwanangu Yusufu, sunga kono nobitila nane kuko ku yisi ye wafu kono koyuli mwanangu.” Nhavivi vyo Yakobo yamulilila u mwanagwe Yusufu.

³⁶ Nawo wawalya Wamidiyani, wakamuguza Yusufu kuko ku Misili, kuli munhu yunji litagwa lyakwe Potifa u mwitumami muwaha wa Falawo, mono yali yo muwaha we walindilizi.