Mwamulizo 36 - Luganuzi Luswanu Kuli Wanhu Wose 2002

Zindelo za Esawu

¹ Azi zo ndelo za Esawu, nha cinji yo Edomu.

² Esawu yatola wacekulu we Cikanani, Ada mwana we cicekulu wa Eloni Muhiti, na Oholibama mwana we cicekulu wa Ana, u mwizukulu wa Sibeyoni Muhivi,

³ na Basemati mwana we cicekulu wa Ishumayeli, u lumbulye wa Nebayoti.

⁴ Ada yakamulelela Esawu mwana litagwa Elifazi, nayo Basemati yakamulelela mwana litagwa Lewuyeli.

⁵ Nayo Oholibama yakamulelela Yewushi, Yalamu na Kola. Wawa wo wana wa Esawu wono wagolece zakwe wamulelela lono yekalaga mu yisi ya Kanani.

⁶ Hanyuma Esawu yakawa kuwasola i wagolece zakwe, hamonga ne wanagwe, ne wanhu wose wa mukaya yakwe, ne zing'ombe zakwe, ne zimitugo zakwe zose, hamonga ne sawo yakwe yose yono yayisawila mu yisi yiyo ya Kanani. Yakawa kuhamila hanhu hanji, kutali no mwanakwawe Yakobo.

⁷ Esawu yanoza nhavivyo, vyono sawo zawo zali nyinji muno, mu nghango yono wali si wasume kwikalana hamonga. Yisi yono wekalaga nha wajenzi, si yali yiwakwile ku soko yo winji we mitugo zawo.

⁸ Holeka Esawu yakabita kwikala mu yisi ye matunda ga Seyili. Litagwa linji lya Esawu, yo Edomu.

⁹ Awa wono wetyatizye, zo ndelo za Esawu u sogo ye Waedomu, mu yisi ye matunda ga Seyili.

¹⁰ Nawo wana wa Esawu wali wo awano, Elifazi mono yalelwa na Ada mugolece wakwe, na Lewuyeli mono yalelwa na Basemati u mugolece yunji wa Esawu.

¹¹ Nawo wana wa Elifazi, wali wa Temani, Omali, Sefo, Gatamu na Kenazi.

¹² Nayo Elifazi yali yena mujitulwa, litagwa lyakwe yali Timuna. Yuyu Timuna yakamulelela Elifazi mwana litagwa lyakwe Amaleki.

¹³ Na Basemati mugolece wa Esawu, yakamulela Lewuyeli. Nawo wana wa Lewuyeli wali Nahati, Zela, Shama na Miza.

¹⁴ Nayo Oholibama mwana we cicekulu wa Ana, mwizukulu wa Sibeyoni, yamulelela Esawu mulume wakwe, wana wadatu, nawo wowa, Yewushi, Yalamu na Kola.

¹⁵ Awa nawo wono wetyatizye ahano, wo walongola we zimbeyu zono zilawiliye muli Esawu. Yo Elifazi mono yali mulelwa mulongozi kuli Esawu, yuyo yakawalela wa Temani, Omali, Sefo na Kenazi.

¹⁶ Kola, Gatamu na Amaleki na wose wakawa walongola, munhu na lwakwe mu mbeyu yakwe. Na wawo wose wo wana wa Elifazi mu yisi ya Edomu, wono walawilila muli Ada mugolece wa Esawu.

¹⁷ Nayo Lewuyeli mwana wa Esawu, yakawalela Nahati, Zela, Shama na Miza. Nawo wose wakawa walongola munhu na lwakwe mu mbeyu yakwe. Na wawo wose wo wana wa Lewuyeli mu yisi ya Edomu, wono walawilila muli Basemati u mugolece wa Esawu.

¹⁸ Ne wana wa Oholibama u mugolece wa Esawu, wali wo awano, Yewushi, Yalamu na Kola, nawo wose wakawa walongola, munhu na lwakwe mu mbeyu yakwe. Na wawo wose wo wana wa Oholibama mwana we cicekulu wa Ana mugolece wa Esawu.

¹⁹ Ale, wawano zo ndelo za Esawu, nha cinji yo Edomu, nawo wose wakawa walongola munhu na lwakwe mu mbeyu yakwe.

Zindelo za Seyili

²⁰ Awano zo ndelo za Seyili Muholi, nawo wawa wo wanyawusi we yisi yiyo, Lotani, Shobali, Sibeyoni, Ana,

²¹ Dishoni, Eseli, na Dishani, nawo wose wakawa walongola, munhu na lwakwe mu mbeyu yakwe, muli Waholi wo lulelo lwa Seyili mu yisi ya Edomu.

²² I wana wa Lotani, wali, Holi na Hemani, no lumbulye wa Lotani yakacemwa Timuna.

²³ Nawo i wana wa Shobali, wali Alwani, Manahati, Ebali, Shefo na Onamu.

²⁴ Ne wana wa Sibeyoni, wali, Ayiya, na Ana. Nayo yuyuno Ana yo yayiwona i mimvwilo ye malenga ge moto mu nyika, lono yazidimaga zindogowe zo sogwe Sibeyoni.

²⁵ Wana wa Ana nawo wali Dishoni hamonga no mwana we cicekulu monga, litagwa lyakwe Oholibama.

²⁶ Nawo wana wa Dishoni, wali, Hembani, Eshibani, Ifilani, na Kelani.

²⁷ Wana wa Eseli wali, Bilihani, Zayawani na Akani.

²⁸ I wana wa Dishani nawo wali, Usi na Alani.

²⁹ Ale, wawo wo walongola we Waholi, Lotani, Shobali, Sibeyoni, Ana,

³⁰ Dishoni, Eseli na Dishani. Na wawano wose wakawa walongola, munhu na lwakwe mu mbeyu yakwe mu yisi ya Seyili.

Watemi we yisi ya Edomu

³¹ Awa nawo, wo watemi wono wali wayitemile yisi ya Edomu, lono hali hakali si hanawa na mutemi wo wose mono yali yawatemile Waisilayeli.

³² Bela u mwana wa Beyoli, yali yatemile yisi ya Edomu, no wikalo wakwe wuwaha wali mwi'kaya lya Dinihaba.

³³ Nayo Bela yali yeza kufwa, Yobabu mwana wa Zela, mulawilila Bosila, yakahalila wutemi wakwe.

³⁴ Yobabu nayo yali yeza kufwa, Hushamu we yisi ye Watemani, yakahalila wutemi.

³⁵ Hushamu nayo yali yeza kufwa, Hadadi mwana wa Bedadi yakahalila wutemi, no wikalo wakwe wuwaha wali ku Awiti. Yuyu yo yawahoma no kuwasumiza Wamidiyani mu yisi ya Mowabu.

³⁶ Nayo Hadadi yali yeza kufwa, Samula mulawa ku Masileka, yakahalila wutemi.

³⁷ Samula nayo yali yeza kufwa, Shawuli mulawa ku Lehoboti, mbavu ze likolongo lya Efulata, yakahalila wutemi.

³⁸ Shawuli yali yeza kufwa, Baali-hanani, mwana wa Akiboli, yakahalila wutemi.

³⁹ Nayo Baali-hanani, mwana wa Akiboli yali yeza kufwa, Hadali yakahalila wutemi, no wikalo wakwe wuwaha, wukawa ku Pawu. Mugolece wa Akiboli, yacemwaga Mehetabeli mwana we cicekulu wa Matiledi u mwizukulu wa Mezahabu.

⁴⁰ Nawo i walongola we zimbeyu zono zalawilila muli Esawu, mu nghango ye zimbeyu zawo ne hanhu hawo, wo awano, Timuna, Alwa, Yeteti,

⁴¹ Oholibama, Ela, Pinoni,

⁴² Kenazi, Temani, Mibisali,

⁴³ Magidiyeli na Ilamu. Wawo wo walongola wono walawa mu mbeyu ya Edomu, wo wutya Esawu. Nawo matagwa gawo, matambulwe mu wulawa hanhu hawo, mu zi'si zono wali wazitemile.