Mwamulizo 35 - Luganuzi Luswanu Kuli Wanhu Wose 2002

U Mulungu yakumulugutiza Yakobo ku Beteli

¹ Mulungu yakamulonjela Yakobo, yakamutya, “Ale wuwuce bahano, wuhamile ku Beteli ko wukekale kuko. Na lono kowa wuli kuko, ale wunzenjelaje wukumbicilo nene no Mulungu mono nakulawila mwi'daha lono wamutizaga muwahawo Esawu.”

² Hodu Yakobo yakawa kuwalonjela mhuga yakwe na wose wono yali yena nawo, yakawatya, “Ale, mutajile lukulu kutali vihwani vye milungu mijenzi vyono mwina navyo, mwiyeze, kanyhi mukawanize ne vivwalo vyenyu.

³ Hanyuma cibite ku Beteli, nghamuzenjele wukumbicilo Mulungu mono yanhaza lono nali nili mu wugaye, kanyhi yakawa yali hamonga nane hanhu hose hono nabitaga.”

⁴ Hodu, wakawa kumupela Yakobo vihwani vyose vye milungu mijenzi vyono wali wena navyo, hamonga ne viheleni vyono wali wavwalile mu makutu gawo, nayo yakavifuciliza he'sina lyo mubici wo Munghola wono wali wuli behi na Shekemu.

⁵ Nayo Yakobo hamonga ne wanagwe lono wali wali mu muhinzo, Mulungu yakawogofya wanya wusi we makaya gose ge behi behi, hamba siwejelela kuwatyatilila.

⁶ Nayo Yakobo yakafika ku Luzu, wo wutya ku Beteli, mu yisi ya Kanani, hamonga ne wanhu wose wono yali yena nawo.

⁷ Yakazenga baho wukumbicilo, yakahacema Eli-beteli, vyono ho baho hono Mulungu yelajilila kuli Yakobo, mwi'daha lono Yakobo yamutizaga muwahawe Esawu.

⁸ Nayo Debola mono yamukocaga Labeka, yakafwa, yakazikwa he'sina lyo mubici wo Munghola lubavu lwe takama ya Beteli.

⁹ Na lono Yakobo yali yakondya kuwuya ku wulawa ku Padani-alamu, Mulungu kanyhi yakamulawila, yakamulugutiza.

¹⁰ Mulungu yakamulonjela Yakobo yakamutya, “Litagwa lyako Yakobo, ninga alu sikocemwa kanyhi Yakobo, langa ku wulawa lulu, litagwa lyako kocemwa Isilayeli.” Holeka Yakobo yakacemwa mweneco Isilayeli.

¹¹ Mulungu yakamulonjela Yakobo kanyhi, yakatya, “Ane yo nene Mulungu u Mudaha Vyose, holeka wulele wonjelezece. Na muli gwegwe, mono nozeza likungugo, sunga ne makungugo, sunga ne watemi wose wolawilila muli gwegwe.

¹² Ne yisi yono nawapela wa Abulahamu na Isaka, ale, nokupela gwegwe yiwe yako hamonga no lulelo lwako.”

¹³ Hodu Mulungu yakawa kuwuka i hanhu baho hono vyalonganilaga na Yakobo.

¹⁴ Nayo Yakobo yakawa kusimya wima lisumbili lye libwe liwe cikumbucizo, vyono baho ho Mulungu yalonganila nayo. Yakobo yakalijidila mafuta mucanyha yayo, hamonga ne ving'wegwa, yakalisiwanula.

¹⁵ Ale, Yakobo yakawa kuhacema Beteli, baho hanhu hono vyalonganila no Mulungu.

Wufwe wa Laheli

¹⁶ Nayo Yakobo hamonga ne mhuga yakwe yose, wakajendelela no muhinzo wawo ku wulawa ku Beteli, na lono wali wasigala cihinzo cidodo vivi du wafice ku Efulata, hodu Laheli yakawa kwibatwa no wusungu wuwaha muno muno wo kusawa.

¹⁷ Nayo lono yali yali mu wusungu wuwo wuwaha, u mudala mono yamulanjililaga yakamutya, “Gwe Laheli, wulece kugopa, hambi nha watuga mwana yunji wa cilume.”

¹⁸ Nayo Laheli lono yali yali mu wufwe, yakamucemela mwana yuyo litagwa lya Benoni. Ninga sogwe yakamucemela mwana yuyo litagwa lya Benyamini.

¹⁹ Hodu Laheli hobaho yakawa kufwa, wakawa kumuzika ha mhelo ye nzila yono yibitile ku Efulata, wo wutya Betelehemu.

²⁰ Yakobo yakasimya yibwe mucanyha ye citenjelo ca Laheli ho liwe cikumbucizo, nalyo lili baho sunga nalu.

²¹ Nayo Isilayeli yakajendelela no muhinzo wakwe, yakasimya nghambi yakwe lono yali yakondya kuwupuluta munala wa Edeli.

²² Na lono Isilayeli yekalaga mu yisi yiyo, mwanagwe Lubeni, yakamwinjilila Biliha u mujitulwa wo sogwe, yakagona nayo. Nayo Isilayeli yali yeza kuzihulika zizo, yakakolwa ne likuwo muno muno. Yakobo yali yena wana yikumi na wejete.

Wana wa Yakobo

²³ Nawo wana wa Leya wali wo awano, Lubeni u mulelwa mulongozi wa Yakobo, Simiyoni, Lawi, Yuda, Isakali, na Zabuloni.

²⁴ Nawo wana wa Laheli wali wo awano, Yusufu, na Benyamini.

²⁵ Ne wana wono walelwa na Biliha u mwitumami wa Laheli, wali Dani na Nafutali.

²⁶ Na wono walelwa na Zilipa u mwitumami wa Leya, wali Gadi na Asheli. Wawo wo wana wa Yakobo wono walelelwa ku Padani-alamu.

Wufwe wa Isaka

²⁷ Yakobo yakabita kuli sogwe Isaka, ku yisi ya Mamule, likaya lya Alaba, nha cinji Hebuloni, hanhu hono Abulahamu na Isaka wekala kotya wajenzi.

²⁸ Isaka yekala mono'nze myaka yigana limonga na makumi munana.

²⁹ Isaka yakafwa, yaweza mukombi muno muno. Wa Esawu na Yakobo wanagwe wakamuzika.