Mwamulizo 34 - Luganuzi Luswanu Kuli Wanhu Wose 2002

Dina yakwinjililwa na Shekemu

¹ Dina mwana we cicekulu wa Yakobo, mono yali mulelwe na Leya, mwi'zuwa linji yakawa kubita yakawalamuse i wacekulu wa mu yisi yiyo.

² Nayo mwana wa Hamoli Muhivi, mono yali muwaha we yisi yiyo mono yacemwaga Shekemu, yali yeza kumuwona Dina, hodu yakawa kumwibata kwa nguvu yakagona nayo, yakamukoza cevu.

³ Nhumbula yakwe vikeyenda muno muno na Dina mwana wa Yakobo, yakamwenda muno muno sunga yakawa kwanza kumupepeleza.

⁴ Holeka Shekemu yakawa kumulonjela sogwe yakutya, “Dedede wunondolelaje yuyo muhinza nimutole.”

⁵ Nayo Yakobo yakahulika vyono Shekemu kamuhodanga mwanagwe Dina. Ninga vyono i wanagwe we cilume wali wakali wali ku wudimizi, siyanoza cinji sunga wakawuya.

⁶ Hamoli sogwe wa Shekemu yakabita kuli Yakobo ho waduwane nayo muli zizo.

⁷ Na mwi'daha lilyo baho, nawo wana wa Yakobo wakawa wakuwuya ku kaya, wakulawa ku wudimizi. Nawo wali weza kuzihulika zinghani zizo, wazelelo wawo wakatuga wusungu muno muno wakakolwa ne likuwo, ku soko yo wubi wuwo wono Shekemu yali yawatendela i wanhu wa Isilayeli, wo kumwibata kwa nguvu Dina mwana we cicekulu wa Yakobo no kumutendela zono sizinojeye, hambi nghani yiyo nha yali yili mwiko muno muno.

⁸ Ninga Hamoli yakawatya, “Nye wayangu yuyo mwanangu Shekemu yamwenda muno mwana wenyu Dina. Holeka nghumunenenyi, mumukombolaje yamutole.

⁹ Nye wayangu, citolanilaje wahinza wetu.

¹⁰ Na mu nzila yiyo, ho mosuma kwikalana nase, kanyhi mowa welecele mu yisi yiyi. Mwikale, munoze wusuluza, mwitujile sawo.”

¹¹ Na Shekemu nayo yakawalonjela wanduguze za Dina hamonga no sogo yawo, yakatya, “Nghumulombenyi munenele, nane nomupelenyi co cose cono molonga.

¹² Munonjelaje du nghango yoyose yono mosaka ye cigumo ne vipegwa, hamba yiwe mbaha muno muno, ane nosuma kulavya, langa soko du munhoze u muhinza yuyuno.”

¹³ Wene nawo wana wa Yakobo, vyono Shekemu yali yakondya kumuhodanga Dina lumbu lyawo, holeka wakawapitula ko wungwele Shekemu hamonga no sogwe Hamoli.

¹⁴ Wakawatya, “Ase sicosuma kumutoza lumbu lyetu kuli munhu mono si yalame. Hambi nghani yiyo nha nghani ya cevu kuli'se.

¹⁵ Langa cidahile kwilumbaniziza nanye mu nghani monga du hono mwende, nayo yoyi, anye mokwihwana nha vyono ase cinha, hono muwategule ku calamo walume wose wa muli nyenye.

¹⁶ Nase baho langa, ho cosuma kumutozenyi i wana wetu we cicekulu, nase ciwatole i wahinza wenyu, kanyhi ho cosuma kwikalana hamonga nanye no kuwa mhuga monga.

¹⁷ Ninga hono mulece kwilumbaniza nase no kwalama, hodu, nase comusola mwana wetu no kubita nayo kwetu.”

¹⁸ Wulonje wuwo, wukawendeza muno muno Hamoli hamonga na Shekemu mwanagwe.

¹⁹ Na Shekemu nayo hamba si yatinya yaye kuwufisiliza wilumbanize wuwo, vyono yali yamwendile muno Dina mwana wa Yakobo. Hamba si nhavivyo du, langa mwene Shekemu kanyhi, yali yena lilumbo yiwaha si nha wose sunga na mu mhuga yawo.

²⁰ Hodu, Hamoli no mwanagwe Shekemu, wakawa kubita kwi'lango lye likaya, hanhu ha wihangulizize we mikung'ano, wakawa kuduwa hamonga ne wanhu wawo wakutya.

²¹ “Nye, wanhu awano weyendi wayetu. Holeka ciwabocelaje, wekale mono yisi yetu, no kunoza wusuluza, hambi nha cina yisi yono yicikwiliye ase na weneco nhavivyo. Hanyuma ciwatole wahinza wawo, nawo ciwatoze wahinza wetu.

²² Ninga wene wovumila kwikalana nase no kuwa mhuga monga na'se ku soko yo wilumbanize wu wuno, wa vyono yicinojeye walume wose muli sese walame, nha vyono wene walame.

²³ Wulenyi! Si mukuwona vyono zimitugo zawo, hamonga ne zisawo zawo zose vyowa vyetu? Ale, holeka cali cilumbanize nawo mu nghani yiyi, ho wasume kwikalana hamonga nase.”

²⁴ Nawo i walume wose wa mwikaya lilyo wakevumila na Hamoli hamonga na Shekemu mwanagwe. Holeka i walume wose wakalama.

²⁵ Na mwi'zuwa lye kadatu, lono wali walama akuno wakali no wusungu wuwaha, wa Simiyoni hamonga na Lawi i wana wejete we cilume wa Yakobo, walumbuze za Dina, wakayisola mimaje yawo, wakawa kuwaziza mu kaya nhinicizo, wakawa kuwawulaga i walume wose.

²⁶ Wakawawulaga ko mumaje sunga na Hamoli hamonga na Shekemu mwanagwe, wakawa kumusola Dina mu wulawa mu kaya ya Shekemu, wakawa kwibitila kwawo.

²⁷ Nawo wali weza kukondya kuwawulaga, wakaza wana wanji wa Yakobo, nawo wakenjila mwi'kaya wakawa kupumha zisawo, ku soko vyono lumbu lyawo yali yahodangwa.

²⁸ Wakasola zingholo, ne zimhene, ne zindogowe, sunga na vyose du vyono vyali vili mumo mwi'kaya hamba ku migunda.

²⁹ Wakayipumha du ne sawo yose, sunga ne wana wose, hamonga ne wacekulu wose, sunga ne vinhu vyose vyono vyali vili mu zikaya, vyose du wakasola.

³⁰ Yakobo yakawalonjela wanagwe wa Simiyoni na Lawi, yakawatya, “Nye wanangu, alu langa mwandetela wulugu no muyenyu, hambi luno, Wakanani hamonga ne Wapelizi i wekazi wa mono yisi yiyino, nha wosula. Na hono wasace, wosuma kulagana ho wahome no kunyongomeza hamonga ne mhuga yangu yose, hambi ane nha nina wanhu wacefu du.”

³¹ Ninga wene Simiyoni na Lawi, wakapitula wakatya, “Alo mwene yamunoza lumbu lyetu nha musenyha hongo?”