Mwamulizo 33 - Luganuzi Luswanu Kuli Wanhu Wose 2002

Yakobo na Esawu wakwitang'anila

¹ Yakobo yakenula meso gakwe, yalanje nhavi, yakamuwona Esawu yakuza hamonga na wanhu magana mane. Hodu. Yakawa kuwatemanula wa Leya, na Laheli na wawalya wetumami wejete we cicekulu.

² Yakawasola wawalya wetumami wejete we cicekulu, yakawalongoza ku mwande hamonga ne wana wawo. Nayo Leya hamonga ne wanagwe wakatyatya, na mu nyuma ya wose, wakatyatya wa Laheli hamonga na Yusufu mwanagwe.

³ Ninga mwene Yakobo yakawalongolela wose, yakawa yakujenda akuno yakwinama ho hasi, sunga nghanghulo mupunghati, sunga yakasejelela behi no muwahawe Esawu.

⁴ Ninga mwene Esawu yakamumanyhilila lumangho mwanakwawe Yakobo, yakamuhinjiliza. Yakamukumbatila, yakamunonela mu singo, nawo wose vyono wejete wakalila muno muno.

⁵ Nayo Esawu yali yeza kwinula meso gakwe no kuwawona wawalya i wanyina zo munhu hamonga ne wana, yakawuza yakatya, “Yakobo, alu wawano wanani wono wina nawo?” Nayo Yakobo yakapitula yakatya, “Awano wo wana wono Mulungu so lihewa lyakwe, yamhela ane no mwitumami wako.”

⁶ Hanyuma i wetumami we cicekulu nawo wakasejelela hamonga ne wana wawo, nawo wakenama kwe cogopo.

⁷ Leya nayo yakasejelela hamonga ne wanagwe, nawo wakenama kwe cogopo. Hanyuma nawo wa Laheli na Yusufu wakasejelela, wakenama kwe cogopo.

⁸ Esawu yakawuza kanyhi yakatya, “Yakobo, alu litewa lilino nalyo lyono wuzize nalyo, ma, nalyo lina nhunizoci?” Nayo Yakobo yakamupitula yakatya, “Ane nali niwikanize, ho mbone lihewa hali gwegwe muwaha wangu.”

⁹ Ninga mwene Esawu yakatya, “Gwe mwanakwetu Yakobo ane nina sawo yono yinghwiliye, holeka sawo ayi yono wina nayo, yeze yako gwegwe go mweneco.”

¹⁰ Nayo Yakobo yakamutya Esawu, “Gwe muwaha wangu, ng'o ye! Hono wuwe mbeka wambocela, ale, nghukunena wucibocelaje ne cipegwa cono nghukupela. Na mbeka neza kuwuwona wusu wako, nha kotya niwuwona wusu wo Mulungu, mu wubocele wako wono wumboceleye. Hambi nha kumbocela ko wuswanu muno muno.

¹¹ Holeka nghukunena wubocele cipegwa cangu cono nghuleteye, hambi Mulungu nha kawa muswanu sunga na kuli'ne, kamhela visakwa vyose vyono nghuvihila.” Nhavivi vyo yakobo yamusinjiliza Esawu, sunga Esawu nhondo yakawa kubocela.

¹² Esawu yakawa kutya, “Alenyi le, cijendelele no muhinzo wetu, nane nomulongolelenyi ku mwande.”

¹³ Ninga Yakobo yakamutya Esawu, “Gwe muwaha wangu, agwe wumanyile nha vyono wana wawa wakali wasina vilungo, na vyono kanyhi, ne mitugo yiyino yono yikali kosa, yinojeye nene no mweneco nizilanjilile hamonga ne zinyana zayo, vyono hono zimitugo zizino wazihwaje no kuzimasya mwi'zuwa limonga du, zimitugo zose zofwa.

¹⁴ Holeka nghukunena agwe wulongole du, ane notyatya munyuma mholamhola, mu nghango vyono zimitugo hamonga ne wana wosuma kujenda, sunga kono noficila, nghwagane kuko ku Seyili.”

¹⁵ Baho nayo Esawu yakamupitula yakatya, “Alu lunji yowa viswanu hono nghulecele wanhu wacefu wa muli wanhu wangu.” Ninga yakobo yakatya, “Alu ho yili sokoci kanyhi yo kunoza nhavivyo? Ane yono nghusaka, soko mvumilwe nagwe du go muwaha wangu.”

¹⁶ Hodu Esawu yakawa kutuluka mwi'zuwa lilyo, yakawa kuwuya ku Seyili.

¹⁷ Ninga Yakobo yakabita sunga ko ku Sukoti, yakazenga kaya kuko, hamonga ne vibanda ku soko ye zimitugo zakwe. Na ku soko yiyo, i hanhu baho hakacemwa Sukoti.

¹⁸ Nayo Yakobo lono yawuyaga yakulawa ku Padani-alamu, yafika yapolile mwi'kaya lya Shekemu, mu yisi ya Kanani. Yakasimya nghambi yakwe mu mawimbi behi ne likaya lilyo.

¹⁹ Yakawa kucigula ciwanza cico cono yali yayisimizye nghambi yakwe, ku wulawa kuli wana wa Hamoli, u sogwe wa Shekemu, yacigula ciwanza cico ko wuguzi wa fweza yigana limonga.

²⁰ Yakawa kuzenga cikumbicilo baho, yakacicema Mulungu yo Mulungu we Waisilayeli.