Mwamulizo 32 - Luganuzi Luswanu Kuli Wanhu Wose 2002

Yakobo yakwiwikaniza wetang'anile na Esawu

¹ Nayo Yakobo lono yajendelelaga no muhinzo wakwe, ale, waketang'anila ne wamalayika wo Mulungu mu nzila.

² Nayo Yakobo yali yeza kuwawona, yakatya, “Ali lyo lipuga lyo Mulungu!” Holeka yakahacema hanhu baho yakahatya, Mahanayimu.

³ Yakobo yakawatuma wanhu kuli nduguye Esawu kuko ku Seyili, mu yisi ya Edomu.

⁴ Yakawalajiliza yakutya, “Mubite mukamulonjele muwaha wangu Esawu mutye nhavi, u mwitumami wako Yakobo yakutya nhavi, ‘Ane nekala mu wujenzi, mu kaya ya Labani sunga nalu.

⁵ Nane nina ne zing'ombe, ne zindogowe, sunga ne matewa ge zingholo, hamonga ne wetumami we cilume na we cicekulu. Nane nghutumila wanhu wawa, 'gwe go mulumbwe, nitumbiye vyono nagwe kombocela.’ ”

⁶ Nawo i wanhu wawo wakamuwuyila Yakobo wakamutya, “Cifika kuli muwahawo Esawu, nayo yali mu nzila yakuza kukuhinjiliza, yena hamonga ne wanhu magana mane.”

⁷ Yakobo yali yeza kuhulika nhavivyo, Oo! Yakogopa muno muno no kuhangawa vibi. Hobaho yakawa kuwagawanula i wanhu wono yali yena nawo, wakalawa mapuga mejete, hamonga ne zingholo ne zimitugo zinji zose, sunga ne zingamiya,

⁸ akuno yakwihwesa yakutya, “Hono Esawu yalizize lipuga limonga yalihome no kulyongomeza, ale, lipuga lyono lisigaye lyotiga.”

⁹ Hobaho Yakobo yakamulomba Mulungu yakatya, “Gwe go Mulungu wa baba Abulahamu, go Mulungu wa baba Isaka, go Muwaha Mulungu mono wanonjela vyono mbuye ku yisi yangu ku wandugu zangu, kanyhi wukanyihuwiza vyono konhendela ziswanu.

¹⁰ Ane hamba sinojeye kuli wihuwilwa wako, hamonga no lusungu lwako, vyono wanhendela ane no mwitumami wako. Lono nalowocela likolongo lya Yoludani, nali sina cinhu cinji co cose, langa nali nina yo nghome du, ninga 'lanje, alu ceza cili mapuga mejete.

¹¹ Go Muwaha Mulungu, alu nghukulomba wumhonye kuli muwaha wangu Esawu, hambi ane nha nghogopa muno, vyono lunji kokuza yacihome no kuciwulaga ase wose, hamonga ne wanyina zo munhu ne wana wose.

¹² Agwe yo gwegwe mono wanyihuwiza vyono konhendela ziswanu, kanyhi wukatya vyono kolwinjifya no lulelo lwangu luwe lwinji nho musawawa wa mwi'lenga wono siwuwalikaga ku soko yo winji wayo.”

¹³ Yakobo yakagona baho mu cilo cico. Hanyuma yakasola sawo nyhefuza mu sawo yakwe, ho yamupele vipegwa muwahawe Esawu.

¹⁴ Nayo yakakoma zimhene zinyhekulu magana mejete, hamonga ne zimvulati makumi mejete, zingholo zinyhekulu nazo, yakakoma zili magana mejete, hamonga ne zinduwilu makumi mejete.

¹⁵ Zingamiya nazo zono zikosa, yakazikoma zili makumi madatu hamonga ne zinyana zayo, zing'ombe nazo, yazikoma zinyhekulu zili makumi mane, hamonga ne zinghambaku yikumi limonga. Kanyhi yakakoma zindogowe zinyhekulu zili makumi mejete, hamonga ne zinume yikumi.

¹⁶ Hanyuma yakawa kuwapela i wetumami wakwe munhu ne 'tewa lyakwe, yakawatya, “Ale, alu, munongolele ku mwande yangu, na lono mukubita mweze muli kutali kutali munhu ne tewa lyakwe, mulece jendela hamonga.”

¹⁷ Yakawa kumulajiliza yu yulya mono yali yalongoleye, yakamutya, “Ale, kolo mukwitang'anila no muwaha wangu, nayo hono yakuwuze, yawe kutya, Alu agwe wuli mwitumami wa nani lo?”

¹⁸ Agwe wumutezaje nhavi, “Sawo yiyi, yo mwitumami wako Yakobo, kakuletela yiwe cipegwa cako gwegwe Esawu go muwaha wangu. Ninga mwene Yakobo yali mu nyuma yakuza.”

¹⁹ Yakobo yakalajiliza zinghani zizo du kuli mwitumami we kejete na we kadatu, sunga na kuli wanji wose yakutya, “Anye wose momulonjela zinghani zizo du wose, kolo mukwitang'anila nayo.

²⁰ Ninga hamonga na zizo, mumulonjelaje mutye, ‘Nayo Yakobo u mwitumami wako yali mu nyuma, yakuza.’ ” Yakobo yazinoza zizo vyono yehwesaga, “Na lunji ho nomutuza so vipegwa vivino vyono nghumulongozeza, hanyuma nane ho sume kwiwona nayo wusu kwa wusu, na lunji ho kombocela.”

²¹ Ale, yakawa kuvilongoza i vipegwa vyakwe, ninga mwene yakagona mu nghambi mu cilo cico.

U mwicindo wa Yakobo ku Penuweli

²² Na mu cilo cico, Yakobo yakenuka yakawa kuwasola wagolece zakwe wose vyono wejete, hamonga ne wetumami wakwe we cicekulu wose vyono wejete, hamonga ne wanagwe wose vyono wali yikumi na yumonga, ale, yakawa kulowoka ha cilowoko ca Yaboki.

²³ Nayo yali yeza kukondya kuwalowosa wose ku nhumbi ye cikolongo, sunga ne sawo yakwe yose,

²⁴ mwene Yakobo yakasigala yali wene bahalya. Na lono yali yakali yemile bahalya, yakaza munhu yunji, wakawa kwicinda nayo, nawo wakajendelela kwicinda sunga mu maza kwela hakali mitondo.

²⁵ Nayo u munhu yuyo, yali yeza kuwona vyono sikomusumiza Yakobo, hodu, yakawa kumupamiza Yakobo mwi'nyonga lye cima, ne linyonga lye cima ca Yakobo, likatinghuka mu wicinde wawo.

²⁶ Ale, baho, u munhu yuyo yakamulonjela Yakobo yakatya, “Gwe Yakobo, ale wundecelaje luno mbite, hambi nha kweza kwelelecela.” Ninga Yakobo nayo yakatya, “Ng'o ye, Ane sinokulecela sunga langa kolo wandugutiza!”

²⁷ Nayo yuyo munhu yakamuwuza yakatya, “Mwene gwegwe nani?” Nayo Yakobo yakamupitula yakatya, “Nene Yakobo.”

²⁸ Nayo munhu yuyo yakamutya, “Alu ku wulawilila lulu, sikocemwa kanyhi Yakobo, langa kocemwa Isilayeli. Hambi nha kwicinda no Mulungu ne wanhu, nagwe kusuma.”

²⁹ Nayo Yakobo yakamutya, “Nane nghukunena dedede wunonjele nagwe litagwa lyako.” Ninga munhu yuyo yakamutya Yakobo, “Ku sokoci wukusaka wumanye litagwa lyangu?” Baho munhu yuyo yakawa kumulugutiza Yakobo.

³⁰ Nayo Yakobo yakahacemela hanhu baho litagwa lya Penuweli, yakutuniliza yakutya, “Ane nimuwona Mulungu wusu kwa wusu, no wumi wangu wupona.”

³¹ Nayo Yakobo lono yawukaga baho ha Penuweli, lizuwa lyali lyakondya kusosomoka, nayo yakawa yakujenda akuno yakusenzegula ku soko ye cima cakwe.

³² Na yiyi yo soko yono yaleka Waisilayeli siwalizaga litimba lya mwi'nyonga sunga nalu, vyono u munhu yu yulya yamupamiza Yakobo mwi'nyonga lya mwi'timba lye ciwino cakwe.