Mwamulizo 23 - Luganuzi Luswanu Kuli Wanhu Wose 2002

¹ Sala yakafwa yaficile myaka yigana limonga, makumi mejete na mupunghati, yo wikale wakwe.

² Yakafwila ku Kiliyati-aleba, (wo wutya, Hebuloni,) mu yisi ya Kanani. Nayo Abulahamu yakalila muno muno ku soko ye lifwa lya Sala u mugolece wakwe.

³ Ale, Abulahamu yakawa kuwuwika u muwili wa malehemu mugolece wakwe baho, yakawa kubita kulongana ne Wahiti, yakawatya,

⁴ “Nye wayangu, ane nikaye baha nha nili mujenzi muli nyenye. Holeka nghumunenenyi munguzize ciwanza, nihanoze hawe hanhu ha vitenjelo, ho sume kumuzika malehemu mugolece wangu.”

⁵ Nawo wakamutya,

⁶ “Gwe go Mulumbwe! Ta, wuhulicize! Agwe wuli mulongola mono wumanyicigwe muno muno muli sese. Holeka kosuma kumuzika malehemu mugolece wako mu citenjelo co cose cono kokwihagulila gwegwe go mweneco, hamba hasina munhu wowose wa muli sese mono kosuma kukulemeza citenjelo cakwe, hamba kukwimila ho wulece kumuzika malehemu mugolece wako.”

⁷ Nayo Abulahamu, yenuka, yakenama kwe cogopo ha mwande ye wanyawusi Wahiti,

⁸ yakawatya, “Hono muwe mukunghombola ho nimuzice malehemu mugolece wangu, ale dedede, munhazaje kumunena Efuloni u mwana wa Sohali,

⁹ ho yanguzize mhango yakwe ya ku Makipela, yono yili mu mupaka wo mugunda wakwe. Mumunenaje yanguzize, nihanoze hawe ho hanhu ha vitenjelo vyangu, nane nomulipa cifo cayo bahano du ha mwande yenyu.”

¹⁰ Nayo Efuloni mweneco yali yali baho mu wihangulize wuwo, hamonga ne Wahiti wawo wono wali wehangulizize he 'lango lye likaya. Holeka mweneco Efuloni Muhiti, yakamupitula Abulahamu, hamonga ne Wahiti wose wono wali wali baho wakuhulika, yakatya,

¹¹ “Ng'o ye vyo si vinha go Mulumbwe! Langa ane nghukupela u mugunda wuwo wose, hamonga ne mhango yono yili mumo, ho wumuzice mumo malehemu mugolece wako. Na kanyhi, ane nghukupelela ha mwande ye wanyawusi wawa wose wono wali bahano izuwali.”

¹² Hodu, Abulahamu yakenama kanyhi kwe cogopo ha mwande ye wanyawusi.

¹³ Yakawa kumulonjela Efuloni hamonga ne wanya wusi wose wakuhulika, yakatya, “Nghukunena dedede, wuhulikaje. Ane nokupela wuguzi wono wukwilaniciye ne cifo co mugunda wako, nane nghukunena wubocele imalipo gago, nane ho sume kumuzika mumo malehemu mugolece wangu.”

¹⁴ Nayo Efuloni yakamutya Abulahamu, “Gwe go Mulumbwe, ta wuhulicize,

¹⁵ mwene mugunda wo wuguzi wa fweza magana mane du, alo cowa cicici kuli'gwe na nene? Ale wubite wumuzice malehemu mugolece wako.”

¹⁶ Abulahamu na Efuloni vikawa kwilumbaniza, yakawa kumupela zifweza zono wetumamilaga wasuluza, mu nghango yo wuguzi wono yasakaga, wono yawulonga ne Wahiti wose wakuhulika.

¹⁷ Holeka u mugunda wuwo wa Efuloni wono wali Makipela, kucilima ya Mamule, ne mhango yayo, hamonga ne mibici yose yono yali yili mugati yayo, vyose vivyo,

¹⁸ yakaguzizwa Abulahamu, ha mwande ye Wahiti wose wono wali wekongholeye he'lango lye likaya.

¹⁹ Zali zeza kukondya zizo, nhondo ho Abulahamu, yakawa kumuzika malehemu Sala u mugolece wakwe, mu mhango yiyo yono yali yili mu mugunda wono wuli Makipela, kucilima ya Mamule (wo wutya Hebuloni) mu yisi ya Kanani.

²⁰ U mugunda ne mhango yono yali yili mumo, i Wahiti wakamuguziza Abulahamu, hawe ho hanhu ha vitenjelo vyakwe.