Mwamulizo 21 - Luganuzi Luswanu Kuli Wanhu Wose 2002

U wulelwe wa Isaka

¹ U Muwaha Mulungu, yakamukumbucila Sala, yakamutendela nha vyono yamwihuwiziza,

² Nayo Sala yakadinghula 'nda, yakamulelela Abulahamu mwana wa cilume (lono Abulahamu yali yeza mukombi,) mwi'pango lililya du lyono Mulungu yalonjela.

³ Nayo Abulahamu yakamucemela litagwa lyakwe Isaka.

⁴ Abulahamu yakamutegula Isaka ku calamo, lono yali yaficila vilo munana, nha vyono yali yalajilizwa no Mulungu.

⁵ Abulahamu nayo yali yaficila myaka yigana limonga, lono Isaka mwanagwe yalelelwa.

⁶ Nayo Sala yakatya, “Alu he langa! Mulungu kamhela luseko he! No munhu wowose mono kozihulika zizi, cosekana nayo.”

⁷ Kanyhi yakajendelela kulonga yakutya, “Hambi nani mono yali yasume kumulonjela Abulahamu yawe kutya, vyono ane no Sala nosuma kosa mwana? Ninga alu lanje! Ane namulelela Abulahamu mwana wa cilume mu wukombi wakwe!”

⁸ Nayo Isaka yakajendelela kuwiluka. Na mwi'zuwa lyono wamulesesa, wakanoza sikukuu mbaha.

Hagali hamonga na Ishumayeli wakuwingwa

⁹ Ale, mwizuwa linji, Sala yakamuwona Ishumayeli u mwana mono Abulahamu yamulela kuli Hagali Mumisili, yakwidawala na Isaka mwanagwe.

¹⁰ Hodu Sala yakawa kumulonjela Abulahamu, yakatya, “Gwe Abulahamu! Wumuwinjilaje kutali u mucekulu yuyu muwanda, Hagali, hamonga no mwanagwe Ishumayeli. Hambi nha siyosumika hamba hadodo u mwana wo mucekulu muwanda yahale hamonga no mwanangu Isaka.”

¹¹ Ne nghani yiyi yikamukalaza muno muno Abulahamu, vyono na Ishumayeli nayo yali mwanagwe.

¹² Ninga Mulungu yakamutya Abulahamu, “Wulece kukalala ku soko yo mwana yuyu, hamba muwanda wako. Yoyose du yono kokulonjela Sala, agwe wuyitumaje, vyono ululelo lwako lolawilila muli Isaka.

¹³ Ayu nayo u mwanago mono yaleligwe no muwanda, nayo nhavivyo nomunoza yawe yikungugo yiwaha, vyono nayo nha mwanago.”

¹⁴ Nayo Abulahamu yakawa kwilawa hakali mitondo muno muno, yakasola ndigwa ne citungu ce malenga, yakamupiciza Hagali mwi'wega, yakawa kumuwinga mu kaya, hamonga no mwanagwe Ishumayeli. Nayo Hagali yakawa kutuluka, hamonga no mwanagwe, yakawa yakuyega yega mu nyika ye Belisheba.

¹⁵ Malenga ga mu citungu gali geza malika, hodu Hagali yakawa kumuwika mwanagwe hasi yo mubici.

¹⁶ U mwene yakabita yakekala ha mhelo, kotya nha wutali wa mita yigana limonga, akuno yakutya mu nhumbula yakwe, “Ho ndece kumuwona mwanangu yakufwa.” Ninga lono yali yakali yekaye bahalya, u mwana yakalila kwe'zi 'waha.

¹⁷ Nayo Mulungu yakamuhulika mwana yuyo vyono yalilaga. Malayika wo Mulungu yakamucema Hagali ku wulawa ku wulanga yakamulonjela yakatya, “Alu Hagali, cono cikukugaza cicici? Wulece kogopa, u Mulungu kamuhulika mwana vyono yakulila.

¹⁸ Holeka winukaje wubite wukamusole mwanago, hambi ane nha nomunoza yawe yikungugo yiwaha.”

¹⁹ Ale, u Mulungu yakamwenzelula Hagali meso, nayo yakaliwona lisima lye malenga. Yakawa kubita yakanega no kucimemya citungu cakwe, yakamupela mwanagwe yakang'wa.

²⁰ U Mulungu yakajendelela kuwa na yuyo mwana, nayo mwana yakajendelela kuwiluka. Nayo yakajendelela kwikala mu nyika ya Palani, yakawa citung'ati muno mu wupelembi.

²¹ No nyina yakamutoza mugolece munya yisi ya Misili.

U wilumbanize wa Abulahamu na Abimeleki

²² Mu vilo vivyo, Abimeleki hamonga na Fikoli, u mwana we wasilikale wakwe wo wulugu, wakamubitila Abulahamu wakamutya, “U Mulungu yali hamonga nagwe muli zose zono wukwituma.

²³ Ale, nghukunena wunyilahizizaje hali Mulungu, lulu baha, nha vyono sikonhendela vibi, nene no mweneco, ne wanangu, hamba no lulelo lwangu. Na munghango vyono ane nali nili mwihuwilwa kuli'gwe, ale na gwegwe nha vivyo, weze wuli mwihuwilwa kuli 'ne na kuli yisi yiyi yono wikaye.”

²⁴ Nayo Abulahamu yakatya, “Heya! Nghwihuwiza.”

²⁵ Abulahamu nayo yakamung'ung'ulicila Abimeleki ku soko ye lisima lye malenga lyono wetumami wa Abimeleki wakamuboka.

²⁶ Nayo Abimeleki yakatya, “Alu 'ne simanyile no muyago, yo nani lu, mono yetuma zizo, nagwe lu, wali wukali hamba nanonjela, hamba kuzihulika kose nali nghali, ho lulu du nghuzihulika.”

²⁷ Ale, Abulahamu yakasola zingholo hamonga ne zing'ombe zinji, yakamupela Abimeleki. Nawo ku wulawa lulo, hodu wakawa kwilumbaniza.

²⁸ Nayo Abulahamu yakawa kuzikoma ngholo zili mupunghati zinyhekulu.

²⁹ Nayo Abimeleki yakamuwuza Abulahamu yakatya, “Alu ku sokoci wukuzikoma zingholo zizi zo mupunghati zinyhekulu?”

³⁰ Abulahamu nayo yakatya, “Izingholo zizino zo mupunghati zinyhekulu, ane nghukupela gwegwe ko muwoko wangu nene no muweneco, wuwe nha wuhomelezi wono wukulajila vyono, lisima lilyo nalihimba nene no mweneco.”

³¹ Holeka lisima lilyo likacemwa Belisheba.

³² Nawo vyo welumbaniza. Nayo Abimeleki hamonga na Fikoli u muwaha we wasilikale wakwe wo wulugu, wakawa kuwuka, wakawuya ku yisi ye Wafilisiti.

³³ Abulahamu yakawuhadika kuko ku Belisheba u mubici wo musisi, yakamuhembo Mulungu, u Mulungu we cibitilila.

³⁴ Nayo Abulahamu yekala mu yisi ye Wafilisiti vilo vinji muno muno.