Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mwamulizo 15 - Luganuzi Luswanu Kuli Wanhu Wose 2002


I cilagane co Mulungu kuli Abulamu

1 Hanyuma ya zizi, u Muwaha Mulungu yakamulonjelela Abulamu mu wulawilwe yakatya, “Gwe Abulamu, wulece kogopa, ane nili ngula yako. Ne cipegwa cako cowa ciwaha kuciza!”

2 Ninga mwene Abulamu yakatya, “Gwe go Muwaha Mulungu, alu ta komhela cicici, nane kuno ho nghali sina 'mba mwana, no muhazi wangu yo yuyu du Eleyezali wa ku Damesiki?

3 Lanje ta, wukali hamba sinamhela mwana, no muwanda mono yaleleywe mu nyumba yangu, yuyu yo kowa yo muhazi wangu.”

4 Nayo u Muwaha Mulungu yakamupitula Abulamu yakatya, “Ayu Eliyeza yo si kowa muhazi wako ng'o! Langa u mwana wa mu'nda yako gwegwe go mweneco, yuyo yo kowa muhazi wako.”

5 Baho u Muwaha Mulungu yakawa kumulavyaniza Abulamu hanze ye lihema, yakawa kumutya, “Abulamu, wugalamile ta, wulanje ku wulanga! Ale ta, wuziwalaje zinyelezi hono kosuma kuziwala! Ale no lulelo lwako vyo lowa lwinji nhavivyo!”

6 Nayo Abulamu yakawa kumwihuwila Mulungu, nayo Mulungu yakamuvumila Abulamu nha vyono yali ling'ani.

7 U Muwaha Mulungu yakamulonjela Abulamu, yakatya, “Ane yo nene Muwaha Mulungu mono nakuleta bahano ku wulawa ku Uli, likaya lye Wakalidayo, ho nghupele yisi yiyi yiwe yako.”

8 Ninga Abulamu yakapitula yakamutya, “Gwe go Muwaha Mulungu, alu ane nomanya nhawule vyono noyihala yisi yiyi?”

9 U Muwaha Mulungu, yakamutya Abulamu, “Ale Abulamu, wundetelaje ta ndama ye myaka midatu, ne mhene nyhekulu ye myaka midatu, ne ngholo nduwilu ye myaka midatu, hamonga ne nziwa ne nyana yayo.”

10 Nayo Abulamu yakamuletela u Muwaha Mulungu vinhu vivyo vyose, nayo Abulamu, yakawa kuvisanhanga vyose vikalawa hejete hejete, yakawa kuvipanga micilili myejete, akuno viyidomile vyejete vyejete. Langa zi nziwa, zo siyazisanha zilawe hejete yaye.

11 Nazo zi'ndi lono zazaga ho zilye zinyama zizo, umwene Abulamu nayo yakawa yakuziwinga.

12 Ne lizuwa lyaza kuswa, Abulamu yakebatwa na nhongo nyinji muno muno, woga hamonga ne citi ciwaha, vikamuziza.

13 Nayo u Muwaha Mulungu yakamulonjela Abulamu yakatya, “Nghusaka wumanyile lukulu, vyono u lulelo lwako, lokwikala mu wujenzi, mu yisi yono si yawo. Na kuko wowa wawanda, wolowetumamila myaka magana mane.

14 Ninga hamba nhavivyo, nane nololiling'aniza lilyo likungugo lyono wololitumamila. Ninga hanyuma yayo wolowuka kuko akuno wena ne zisawo nyinji.

15 Ninga agwe go mweneco kokwikala myaka minji, sunga wuze wufwe wupolile no kuzikwa.

16 No lulelo lwako lwe kane, lo lolowuya baha kanyhi, vyono u wubi we Waamoli wukali namemelecela.”

17 Kukawa lizuwa lyaza kuwa lyagwila, ne citi cenjila, lanje, kwa nhinicizo du, likejela likombo lyono lyafunghaga lyosi, hamonga ne lizinga lyono lyakaga moto, vikakolela hagati ye zisanho zizilya ze zinyama.

18 Na mwi'zuwa lilyo, ho Muwaha Mulungu yacinozeza i cilagane cakwe na Abulamu, yakumutya, “Gwe Abulamu, ane nowapela u lulelo lwako yisi yiyi, ku wulawilila kwi ‘kolongo lya Nile lya Misili, sunga ko kwi’ kolongo lililya liwaha lya Fulata.

19 Wo wutya i zisi ze Wakeni, Wakenizi, Wakadimoni,

20 Wahiti, Wapelizi, Walefayi,

21 Waamoli, Wakanani, Wagiligashi ne Wayebusi.”

Cigogo Bible © Bible Society of Tanzania, 2002.

Bible Society of Tanzania
ကြှနျုပျတို့နောကျလိုကျပါ:



ကြော်ငြာတွေ