Mwamulizo 11 - Luganuzi Luswanu Kuli Wanhu Wose 2002

Umunala wa Babiloni

¹ Ku wulawa ku mwamulizo, i yinze yose yali yina milonjele mimonga du, ne zinghani zose zihwanile.

² Alu i wanhu lono wali weza kwanza kujendajenda wakulawilila ku lubavu lwa kucilima, nawo wali weza kufika mu yisi yo wuhihi ya Shinali, hodu wakawa kwikala kuko.

³ Ninga hanyuma yayo, wakanza kwilonjela wakutya, “Nye, alenyi cinoze matofali, ciganyanye viswanu mu moto.” Holeka wakawa watuga matofali ne lami yo kugalunziza i matofali hamonga.

⁴ Nawo wakeyitya, “Alenyi le ciyinzenjele co weneco likaya lyono lyowa lina no munala wono wofika ku wulanga, ho cisume kwitujila litagwa, kanyhi ho cilece kwiyagala mono'nze yose.”

⁵ Nayo u Muwaha Mulungu, yakawa kutima ho yaliwone likaya lilyo lyono wanhu walizenjile, hamonga no munala walyo.

⁶ U Muwaha Mulungu yakatya, “Alu, lanje ta, wanhu awa, wose wali nghungugo monga, kanyhi wose wakulonga milonjele mimonga, na awuno wo mwamulizo du wa zose zono wosaka kwituma. Na vyono yikwijela, ku wulawa lulu, wosuma kwituma yoyose yono wosaka kwituma.

⁷ Holeka alenyi le citime ciwabitile cikawewajize nonga yawo, ho walece kwihulika weneco wose.”

⁸ Holeka u Muwaha Mulungu yakawa kuweyagaziza mono yinze yose, wakawa kuwuleka no mulimo wu wulya wo wuzenga likaya lilyo.

⁹ Ne likaya lilyo likacemwa likaya lya Babiloni, vyono ho baho hono u Mulungu yawewajiziza i wanhu wose milonjele yawo. Na kanyhi ha wulawilila baho, ho Mulungu yaweyagaziza i wanhu wakeyagala mono yinze yose.

I zindelo za Semu

¹⁰ Awano wo we ndelo ya Semu. Yali yeza kupuluta myaka myejete ku wulawa he 'hwazi lye malenga, nayo Semu lono yali yeza yaficila myaka yigana limonga, yakamulela Alipakishadi.

¹¹ Nayo lono yali yamulela Alipakishadi, mwene Semu yekala kanyhi myaka magana mahano, nayo yakawa na wana wanji we cilume na we cicekulu.

¹² Nayo Alipakishadi, yamulela Shela lono yali yaficila myaka makumi madatu na mihano.

¹³ Alipakishadi lono yali yakondya kumulela Shela, u mwene Alipakishadi yakekala kanyhi myaka magana mane na midatu, nayo yakawa na wana wanji we cilume na we cicekulu.

¹⁴ Nayo Shela, lono yamulelela Ebeli, yali yaficile myaka makumi madatu.

¹⁵ Nayo Shela lono yali yamulela Ebeli, mwene Shela yakekala kanyhi myaka magana mane na midatu, nayo yakawa na wana wanji we cilume na we cicekulu.

¹⁶ Na Ebeli nayo, lono yali yaficila myaka makumi madatu na mine, yakamulela Pelegu.

¹⁷ Na lono yali yamulela Pelegu, u mwene Ebeli yekala kanyhi myaka magana mane na makumi madatu, nayo yakawa na wana wanji we cilume na we cicekulu.

¹⁸ Lono Pelegu yali yaficila myaka makumi madatu, nayo yakamulela Lewu.

¹⁹ Nayo Pelegu lono yali yamulela Lewu, u mwene Pelegu yekala kanyhi myaka magana mejete ne 'cenda, nayo nhavivyo, yakawa yena wana wanji we cilume na we cicekulu.

²⁰ Lewu nayo, lono yali yaficila myaka makumi madatu na myejete, yakamulela Selugi.

²¹ Nayo Lewu lono yali yamulela Selugi, u mwene Lewu yekala kanyhi myaka magana mejete na mupunghati, nayo yakawa yena wana wanji we cilume na we cicekulu.

²² Lono Selugi nayo, yali yaficila mu myaka makumi madatu, yakamulela Naholi.

²³ U mwene Selugi yekala kanyhi myaka magana mejete lono yali yamulela Naholi, nayo yakawa na wana wanji we cilume na we cicekulu.

²⁴ Nayo Naholi lono yali yaficila mu myaka makumi mejete ne 'cenda, yamulela Tela.

²⁵ Nayo Naholi yakekala kanyhi myaka yigana limonga ne kumi ne 'cenda lono yali yamulela Tela. Nayo yakawa na wana wanji we cilume na we cicekulu.

²⁶ Nayo Tela lono yali yaficila myaka makumi mupunghati, yakawalela Abulamu, Naholi na Halani.

I zindelo za Tela

²⁷ Azi ahano zo ndelo ze wana wa Tela, u sogo ya wa Abulamu, Naholi na Halani. Yuyu Halani yali yo sogo wa Loti.

²⁸ U mwene Halani yafwila ku Uli, likaya lye Wakalidayo kono yalelelwa u sogwe, lono sogwe Tela yali yakali mumi.

²⁹ Nawo wa Abulamu na Naholi, wose wakawa kutola. U mugolece wa Abulamu yacemwaga Salayi. No mugolece wa Naholi, nayo yacemwaga Milika u mwana wa Halani, mono kanyhi yali yo sogo wa Isika.

³⁰ Nayo Salayi yakawa yasina mwana, hambi nha yali si kalelaga.

³¹ Nayo Tela yakawa kuwasola u mwanagwe Abulamu, hamonga na Loti u mwizukuluwe, mono yali yo mwana wo mwanagwe Halani, hamonga na Salayi u mugolece wa Abulamu. Wakawa kutuluka wose hamonga ku wulawa ku Uli, likaya lye Wakalidayo, wakubita ku yisi ye Wakanani. Ninga wali weza kufika mu Halani, hodu wakekala kuko.

³² Nayo Tela yakafwila kuko ku Halani, yali yaficile myaka magana mejete na mihano.