Mwamulizo 10 - Luganuzi Luswanu Kuli Wanhu Wose 2002

I zindelo ze wana wa Noha

¹ I wana wa Noha, Semu na Hamu na Yafeti, lono lihwazi lye malenga lyali lyapuluta, nawo walela wana awano,

² I wana wa Yafeti wali wo awa, Gomeli, Magogu, Madayi, Yavani, Tubali, Meshaki na Tilasi.

³ Nawo i wana wa Gomeli wali, Ashikenazi, Lifati, na Togalima.

⁴ Ne wana wa Yavani wali, Elisha, Talishishi, Kitimu na Dodanimu.

⁵ Awo wawo, wo mwamulizo we wanhu wono wakatandala ku zimbavu ze zi mhwani na mu vizingwa. Wawo zo ndelo za Yafeti wono wetemanuka temanuka, wakawa wanhu na yisi yawo, ne nonga yawo, mu nghango ye zimhuga zawo, mu zinghungugo zawo.

⁶ Nawo i wana wa Hamu wali, Kushi, Misili, Puti na Kanani.

⁷ Nawo wana wa Kushi, wali, Sheba, Havila, Sabuta, Lama na Sabuteka. Ne wana wa Lama wali, Sheba na Dedani.

⁸ Nayo yuyo Kushi, yali yo sogwe wa Nimulodi, mono yali yo citung'ati mulongozi muwaha mono'nze.

⁹ Na so lihewa lyo Mulungu, mwene Nimulodi, yakawa mupelembi muwaha. Na holeka kowuli mulongo wono wutezaga, “Nha vyono yenha Nimulodi u mupelembi muwaha ko wutazi wo Mulungu.”

¹⁰ U mwamulizo wo wutemi wakwe Nimulodi, wali Babiloni na Eleki na Akadi, mu yisi ya Shinali.

¹¹ Na ku wulawilila kuko, yakawa kubita ku Ashuli, yakazenga makaya ga Ninawi, na Lehoboti-li, na Kala na

¹² Leseni, wono wuli haciligati ye Ninawi ne likaya liwaha lya Kala.

¹³ Misili yali, yo kuku yawo i Waludi, Wanamu, Walehabi, Wanafutu,

¹⁴ Wapatulusi, Wakasilu (wono wo mwamulizo we Wafilisiti,) na Wakelete.

¹⁵ Nayo Kanani yali, yo kukuye wa Sidoni, u mwanagwe u mulongozi kulelwa, na Heti,

¹⁶ kanyhi ne Wayebusi, Waamoli, Wagiligashi,

¹⁷ Wahivi, Waliki, Wasini,

¹⁸ Walwadi, Wasemali, ne Wahamati. Na hanyuma yayo i wanhu we zimhuga hayo hayo za Kanani wakeyagala,

¹⁹ no mupaka we yisi yawo, wali wulawiliye Sidoni, sunga kutakama ku Gelali behi na Gaza, na ku wubita kucilima, sunga ku Sodoma na Gomola, na Adima na Seboyimu behi na Lasa.

²⁰ Nawo wawo wo we ndelo ya Hamu, mu nghango ye zimhuga zawo, ne zinonga zawo, ne zi'si zawo, ne zinghungugo zawo.

²¹ Nayo Semu u muwahawe wa Yafeti, yali yo sogo we Wahebelaniya wose.

²² Ne wana wa Semu wali, Elamu, Ashuli, Alipakishadi, Ludi na Alamu.

²³ Ne wana wa Alamu, wali Usi, Uli, Geteli, na Mashi.

²⁴ Nayo Alipakishadi yakamulela Shela, nayo Shela yakamulela Ebeli.

²⁵ Nayo Ebeli yakawa na wana wejete, u mwana mulongozi, yakamucemela litagwa lya Pelegu, ku soko vyono i wanhu mu vilo vivyo, wakawa wagawanuka mono'nze. Nayo we kejete yakamucemela litagwa lya Yokitani,

²⁶ nayo Yokitani yakawalela, Alimodadi, Shelefu, Haasa Halimaweti, Yela,

²⁷ Hadolamu, Uzali, Dikila,

²⁸ Obali, Abimayeli, Sheba,

²⁹ Ofili, Havila, na Yobabu. Wawo wose wali wana wa Yokitani.

³⁰ Ne yisi yono wekalaga, yali yilawiliye ku wulawa Mesha, sunga ko ku Sefali mu matunda ga ku lubavu lwa kucilima.

³¹ Nawo wawo zo ndelo za Shemu, mu nghango ye zimhuga zawo, ne zinonga zawo, ne zisi zawo, ne zinghungugo zawo.

³² Na wawa wose, wo we mhuga ya Noha, mu nghango ye zindelo zawo mu zinghungugo zawo. No wulawilila muli wawo, i zinghungugo zose zikawa kwiyagala ako na ako mono'nze yose lono lihwazi lye malenga lyali lyapuluta.