Muganuzi 9 - Luganuzi Luswanu Kuli Wanhu Wose 2002

¹ Nane nghehwesa muli zizo zose, nghawona vyono, kumbe Mulungu du yali wene, yo katongaga ze metumo gose ga we mahala hamonga na ga we ling'ani, hamba wuwe wendo hamba wuwe lusulo, wanhu si wamanyile yaye. Hamba hasina munhu wo wose mono kosuma kuzimanya zono zomwijelela hanyuma,

² hambi i we ling'ani ne wabi, waswanu ne wavu, watelevu na wono wetipize, wono wakumbikaga na wono si wakumbikaga, wose wawo mudumo wawo monga du. Hambi u muswanu, nha vihwanile du no mubi, nayo mono yakwilahiza, si visimajiye yaye na mono si yakwilahiza.

³ Nayo ayi yo nghani yono 'mbi muno muli zose zono zili mononze, vyono, wose wena mudumo monga du. Kanyhi na vyono wanhu mu mikalile yawo yose, wekalaga wamemile wavu no wulele mu zinhumbula zawo, na hanyuma yayo wawa kufwa.

⁴ Ninga kuli mono yakali vili hamonga ne womi, ayo yakali yena witumbilo, hambi nha wo wutya, “Ilibwa lyono lili nyumi nha lili ciba, si nha lisimba lyono lifwiye.”

⁵ Hambi wono wakali womi, nha wamanyaga vyono wofwa, ninga wono wafwiye, si wamanyaga cinji co cose. Hambi nha wasina cipegwa cinji kanyhi, langa wene wakondya du kusemelwa lukulu.

⁶ U wendo wawo no lusulo lwawo, sunga ne masulumizi gawo, vyose vivyo vyajililana hamonga nawo, na hodu du, hamba si wowa ne'fungu lyo lyose kanyhi mono'nze.

⁷ Holeka, wubite wukalye ndigwa yako ko wusangalale, wukang'we ne divayi yako ne nhumbula yono wusangalaye, hambi Mulungu nha yakondya kuyilumbiliza milimo yako.

⁸ Ale wivwikaje viswanu, wibace ne mafuta mu mutwe wako.

⁹ Wuyisangalalile mikalile yako hamonga no mugolece wako mono wumwendile muno, mu vilo vyose vyo wikale wako wono wusina cambuzi, wono Mulungu yakupelile baha hono'nze. Hambi yiyino, nha yo wapegwa mu wikale wako wa mu milimo yako ya bahano hono'nze.

¹⁰ Nghani yo yose yono wendile kuyituma, wuyitumaje kwe vilungo vyako vyose, hambi ku yisi ye wafu kono kobita, nha kusina milimo, hamba lihweso lyo lyose, hamba wumanye, hamba mahala bwete.

Zimbali zizaga nhinicizo

¹¹ Kanyhi nakondya kuciwona cinhu cinji mono'nze, vyono i wanhu wamanyhi muno, hamba si wawasumaga wayawo mu midawalo yo kwitiga lumangho. Nawo we vilungo, hamba si wasumaga wulugu, nawo we mahala, hamba si watugaga ndigwa. Nawo wono wena wizuce, hamba si wagolipaga yaye, nawo wanghula, hamba si wapegwaga lilumbo lya hacanyha yaye. Ne lyuwa liwazizaga wose du.

¹² Hamba yunji si yamanyile lizuwa lono lipango lyakwe lyomuficila. Nha vyono zisomba zikuwa kwibatwa no lwavu wula kumanya, nha vyono kanyhi zindeje nazo, zikuwa kugwila mu mitego nhinicizo, ale, ne wanhu nawo, vyo wenjilaga mu zimbali nhavivyo lono si walanjiliye.

¹³ Ho yili nghani yinji kanyhi yono nayiwona, yono yikulajila viswanu vyono, kumbe mahala mono'nze, gakwiliye muno muno.

¹⁴ Kwali na cikaya cinji cidodo vivi, cono cina wekazi waco wacefu. Ale yakaza mutemi yunji we vilungo, yakacipilima cikaya cico, yakewikaniza yacihome.

¹⁵ Na mu cikaya cico, mwali moyuli yunji, munhu we mahala, ninga muciwa muno, mono ku so mahala gakwe, yasuma kuciponya cikaya cico. Ninga hamba nhavivyo, hasina hamba munhu monga mono hanyuma yasuma kumukumbucila u muciwa yuyo.

¹⁶ Ku soko yiyo, holeka nane nghutya nhavi, “Mbeka kumbe mahala gacizize vilungo, hamba yiwe mahala go muciwa si gatondowozwa, ne zinghani zakwe hamba kuhulicizwa yaye.

¹⁷ Ninga yili ciba wuzihulicize zinghani zo wutule za we mahala, si nha kuhuliciza mazozo go mutemi mu wihangulize we wanhu walele.

¹⁸ Holeka ku wuwa ne mahala, kuswanu muno, kucizize u witumbila vitwalo. Ninga hamba nhavivyo, u munhu mubi yumonga, kahodangaga nyinji ziswanu.”