Muganuzi 8 - Luganuzi Luswanu Kuli Wanhu Wose 2002

¹ Alo nani mbi mono yehwanile na we mahala? Hamba nani mono yadahile kuwulolosa wuwe weneco, we vinhu vyono vinha? Hambi mahala go munhu, nha gang'alazaga wusu wakwe, no kugawusa manghunya-nghunya ga mu wusu wakwe.

Weze ne cihuliko kuli mutemi

² Nane nghukulonjela nghutya, Weze wuli cihuliko kuli zose zono mutemi yakuzilajiliza, ku soko yo wilahize wako wa kuli Mulungu.

³ Wulece kuwuka musunho hali mutemi, hamba wulece kujendelela kwituma zono si zikwendeza, hambi mutemi, nha kanozaga nha vyono yendile mweneco.

⁴ Nalyo lilajilizo lyo mutemi, nha yo nghani ye ndumilizo, nani kanyhi 'mbi mono kosuma kumuwuza yawe kutya, alu wukunoza nhawule.

⁵ Nayo mono kakamisaga malajilizo, yuyo kekalaga yapolile du, nayo munhu we mahala, kamanyaga vyono ko lili lizuwa lyo wulipicizwe.

⁶ Heya, hambi nha ho wuli wuling'anizwe we vinhu vyose, holeka munhu, mbeka yena mahodango mawaha,

⁷ hambi nha si yacimanyile cicici cono cokwijela hanyuma yayo. Alo nani 'mbi mono kosuma kumumanyiza zono zolokwijela ha nyuma?

⁸ Hambi nha hasina munhu wo wose mono kosuma kuyibatiliza nhumbula yakwe ho yalece kufwa, hamba hasina munhu wo wose mono kosuma kwiyimila ho yalece kufwa. Wumanye vyono, mwipango lyo wulugu, hasina mono kosuma kulekwa, ale, nhavivyo no wubi nawo, si womuponya u munhu mubi.

I wabi, na we ling'ani

⁹ Na mu wulondole-londole wangu, nghaziwona zizi zose zono zikwitumwa bahano hono yinze, vyono, hono munhu yawe yena vilungo, hodu kovitumamila vilungo vivyo ko kumwiwonela no kumutamisa munhu muyagwe.

¹⁰ Na kanyhi niwawene ne wanhu wabi vyono wakuzikwa, i wanhu wono wali wazoweye kwinjila no kulawila mu Nyumba yo Mulungu, hamonga no kukumywa muno mwi'kaya mono wetumilaga zo wavu wawo. Ninga yiyo nayo nghani ya bwete du.

¹¹ Alu na vyono wubi si wulipicizwaga musunho, holeka zinhumbula ze wanhu, zihidimbalilaga mu wituma zimbi du.

¹² Wuwalangaje ta wanyo wubi, vyono wetumaga zimbi kali cigana, ninga hamba nhavivyo, vyo wajendeleye du kuwumipa. Ninga ane manyiye lukulu vyono, i nyemo yiwalindiye wono wamogopile Mulungu, ku soko ye cogopo cawo,

¹³ ninga kuli wabi, ako kusina nyemo hamba hadodo. Wawo wene, wopuluta nha mwenzenze, si wosuma kuwuponya wumi wawo, hambi nha si wamogopile Mulungu yaye.

¹⁴ Kanyhi hoyili nghani yinji 'mbi yono nakondya kuyiwona baha hono yinze, vyono i wanhu waswanu, wakuwa kutendelwa zimbi, zono ziwanojeye i wanhu wabi wo watendelwe, nawo i wabi wakutendelwa ziswanu, zono ziwanojeye i i wanhu waswanu, wo watendelwe. Nane nghatya, ayi mbeka yo nghani ya bwete du.

¹⁵ Ninga ane nihuwiye vyono, u munhu yanojeye yawe yali mu wumote muno, vyono ahano hono yinze, hasina cinji ciswanu cono cicizize kulya no kung'wa, hamonga no kwiyendeza. Azi zo munhu kosuma kuzituma mu wipiganze wakwe we milimo, mu vilo vyo wikale wakwe wa baha hono yinze, vyono Mulungu komupela.

¹⁶ Na lono najelaga kuhidimbala muno, ho sume kumanya mahala, hamonga no kwiyijiza zono zikwitumwa mono'nze, nghatanga vyono kosuma kugona meso bwete,

¹⁷ hamba kusuma kuzimanya zo Mulungu. Hamba wuhidimbale muno muno gwee, si kosumila lukulu kuzimanya yaye. Wanhu we mahala, wadahile kwiyitya wene wazimanyile, ninga i mbeka kumbe, ho si wamanyile cinji yaye.