Muganuzi 7 - Luganuzi Luswanu Kuli Wanhu Wose 2002

I mafundo ga mu mikalile

¹ Lilumbo liswanu lili ciba, si nhe mafuta gono gena mhunjile swanu go wuguzi wukamu. Kanyhi lizuwa lyo kufwa lili ciba si nhe lizuwa lyo kulelelwa.

² Ciba kubita ku cililo, si nho kubita ku sikukuu, kanyhi i womi yiwanojeye wakumbucile vyono, lifwa licilindiye sese wose.

³ Kanyhi wukalale wuli ciba, si nho luseko, hambi nhumbula nha yitugaga cambuzi ku soko yo wukalale wa ha wusu.

⁴ I nhumbula ya we mahala yizitununhicilaga zinyumba za wono wafwiliywe. Ninga nhumbula yo munhu mulele, yene yihwesaga zo wumote du.

⁵ Yo nghani swanu kuhuliciza mafundo ga we mahala, si nha kuzihuliciza zinyimbo ze wanhu walele.

⁶ Hambi luseko lo munhu mulele, nha lwihwanile no mulilo we mamivya, lono gakutakamila mu moto. Yiyo nayo yo nghani ya bwete du.

⁷ Nayo munhu we mahala, hono yamusolele munhu yunji cinhu cakwe ko kumwiwonela, yakwituma nghani ya wulele. Nawo wubocela mafupo, wubofuzaga mahala.

⁸ No mudumilizo we nghani, wuli ciba, si nha ku mwamulizo wayo, nayo munhu mukangalizi, yuyo yo muswanu, si nho munhu mwidunhumuzi.

⁹ Holeka wulece kuwa mupelu ku wukolwa likuwo, hambi likuwo nha wo wuwe we wanhu walele.

¹⁰ Kanyhi, wulece kuwuza wuwe kutya, “Alo nhawule i vilo vye katali vyali viswanu, si nhe vilo vya lulu?” Wumanye vyono liwuzo lyono linha lilino, si lilawaga mu mahala yaye.

¹¹ Nago mahala, makamu muno gehwanile no wuhazi, holeka yo nghani mbaha yono yinojeye kuli wanhu wose wono wakali womi.

¹² Holeka, wudimwa ne mahala, wihwanile no wudimwa ne mapesa, hambi mahala, nha gamukamisaga mono yena nago.

¹³ Wihwesaje ta ze metumo go Mulungu, wukwihwesa nani 'mbi mono kosuma kugolosa cono yacipetizye Mulungu?

¹⁴ Holeka mu vilo vyono wukali watuga vinji, ale, weze wina wusangalale, na mu vilo vyo wugaye navyo, ale wihwesaje nghani yiyi, vyono, u wutuga vinji, no wugaye, vyose vilawaga kuli Mulungu, ninga munhu si kosuma kumanya za hanyuma zono zikuza.

¹⁵ Na mu mikalile yangu yo wuciwa, nakondya kuziwona nghani zose, vyono kumbe u munhu we ling'ani, nayo kafwizaga du hamba yawe yali ling'ani, ninga u munhu mubi kajendelelaga kuwumipa du hamba yawe mubi.

¹⁶ Holeka, wulece kuciziliza kuwa we ling'ani, hamba wulece kuwa we mahala muno! Alo socici wiyongomeze go mweneco?

¹⁷ Ninga kanyhi, wulece kuwa wuli munhu mubi kuciza, hamba wulece kuwa wuli mulele! Socici lo wufwe lono vilo vyako vikali?

¹⁸ Holeka yikunojeye wulece kuciziliza muli vivyo vinhu vyejete. Hambi mono yamogopile Mulungu, nha si kosuma kugwizwa na nghani yo yose muli zizo.

¹⁹ Nago mahala gamupelaga vilungo munhu we mahala, kuciza wanhu yikumi, wono watemile mwi'kaya.

²⁰ Na mbeka, hasina munhu wo wose mono'nze mono yali ling'ani, mono ketumaga ziswanu du nhondo zose, hamba kwituma wubi yaye.

²¹ Kanyhi wulece kuwa kwihwesa vyono, nghani zose za mbeka zono walongaga wanhu, hambi nha kosuma kuhulika vyono mwitumami wako kakuliga,

²² nagwe komanya go mweneco vyono nagwe kuwaligaga wanhu kali kenji.

Kulomba mahala

²³ Nane nghazipima kwe mahala zizo zose, hanyuma nghawa kwihwesa mu nhumbula yangu nghatya, “Alu mwene nghusaka niwe munhu we mahala, hongo!” Ninga lu mahala, nha gali kutali muno nane.

²⁴ Alu mwene, munhu kosuma kumanya nhawule nhunizo yo wikala mumi? Mbeka nghani yiyi nzito, kanyhi nghamu muno muno kuli'se.

²⁵ Ninga hamba nhavivyo, nghahidimbala muno mu wumanye, no kulanga-langa, sunga no kulondola muno mahala, hamonga ne nhunizo ya zono zili baha, kanyhi ho sume kumanya u wubi wo wulele vyono winha, u wulele wo wu wula mahala.

²⁶ Kanyhi ho yili nghani yinji yono nghayiwona, nghani yono 'mbi muno muno kuciza lifwa, yo nghani yo mucekulu, mono nhumbula yakwe, yikuwa kugwiza nha mutego hamba lwavu, ne miwoko yakwe yihwanile manyolo. Ninga munhu mono yamogopile Mulungu, yakuwa kumwilega u mucekulu we liwala lilyo. Ninga u munhu mubi, ayo ketegulizaga du ho yagwizwe nayo.

²⁷ Azi zo nghukulonjela ane no Muganuzi, vyono zo naziwona lono nazilondelelaga hadodo hadodo.

²⁸ Nane nghahidimbala muno kali kenji ho nizimanye zizo, ninga hamba si nasuma yaye. Mu wanhu walume elufu monga, nghasuma kumuwona mulume monga du mono yanojeye lilumbo, ninga muli wacekulu wose we liwalo nha lilyo, si nasuma kumuwona mucekulu hamba monga mono yanojeye lilumbo.

²⁹ Alu kanyhi ko yili nghani yinji monga, yono nakondya kuyimanya, nayo yoyi, vyono Mulungu yaciwumba cili waswanu kanyhi cili wedodofyi, ninga sese co weneco, ciketajila mu mahodango.