Muganuzi 6 - Luganuzi Luswanu Kuli Wanhu Wose 2002

¹ Nayiwona kanyhi nghani yinji 'mbi mono yinze, kanyhi yo nghani nzito muno kuli wanhu.

² Mulungu kamupelaga munhu wugoli, sawo, hamonga ne lilumbo, ho yalece kwanjila cinji co cose cono yakucisaka, ninga si kamupelaga wusume wo kuvisangalalila vinhu vivyo, langa mujenzi yo kovilya. Yiyi nayo yo nghani ya bwete du, kanyhi yo nghani 'mbi.

³ Munhu yadahile kuwa na wana yigana limonga, hamonga no wikale mononze myaka minji. Ninga hono munhu yuyo yalece kuyisangalalila mikalile yakwe, hamba kuzikwa mu citenjelo kwe lilumbo kose, mbeka, u mwana mono yaleligwe yafwiye, kowa yali ciba, si nha munhu yuyo.

⁴ Hambi u mwana mono yafwiye, nha si kamotaga cinji co cose so wulelwe wakwe, langa mwene kajililaga du mu citi, hodu, wawa kumusemwa.

⁵ Hamonga na zizo, u mwana we liwala lilyo, si yawuwene no wuzelu we lizuwa yaye, hamba kusuma kuwumanya wumi vyono winha.

⁶ Ninga hamba nhavivyo u mwana yuyo, yakutuga wucehe wono ayulya munhu si kowutujila lukulu, hamba yekale sunga yamale myaka elufu nyejete. Hambi wose nha wobita hanhu hamonga du.

⁷ Hambi munhu nha katugutilaga so wusaka ndigwa du, ninga lu, hamba si kegutaga yaye.

⁸ Alu, wule, wukwihwesa vyono u munhu we mahala, kowa yali ciba hongo, si nha yulya u munhu mulele? Ma, u munhu muciwa, katugaga cambuzici, hono yawe yamanyile vyono yimunojeye yekale, mu mikalile yakwe?

⁹ Mbeka yiyo yo nghani ya bwete du, kanyhi wo wigaze we bwete wono wusina cambuzi co cose. Ciba weze wuceye na cono wina naco, si nha kugazika nhondo zose, ne masulumizi go wusulumila kutuga vinhu vinji.

¹⁰ Ninga wumanye vyono, vyose vyono vikwijela, vyawikwa ku wulawa katali na katali, u wuwe wo munhu nha wumanyice, kanyhi cimanyiye lukulu vyono u musocele, si kosuma kwisumaniza no munhu we vilungo.

¹¹ Kanyhi wumanye vyono, u wuwanji, wusina cambuzi hamba hadodo, hambi nha si wusumaga kumunyasuliza munhu.

¹² Hambi nani lo mono yazimanyile zono zomukwila munhu, mu mikalile yiyi micefu, yono yisina hamba cambuzi co cose, i mikalile yono yipulutaga du nha mwenzenze? Hamba nani lo mono yali mono'nze yiyi, mono yazimanyile zono zomwagana munhu, kolo yakondya kufwa?